2 NOE
I ti kondann lemonn
APRE letan Enok, serten lanz dan lesyel ti rebel kont Bondye. Bann move lanz ti annan sa move dezir pour annan relasyon seksyel. Alor, zot ti desann lo later, pran en lekor imen e marye avek tou bann imen ki zot ti anvi. Zot zanfan ti vin bann zean ki ti ibrid, vyolan e kriyel. Zot ti apel Nefilim. Sa ti fer ki bann dimoun ti vin pli koronpi. Bondye ti vwar ki son zoli kreasyon setadir bann imen lo later ti’n gate. Me i ti annan en dimoun ki ti diferan, sa ti Noe, aryer pti zanfan Enok.
Noe ti fer sa ki byen parey Enok. Nou lir: “Noe ti mars avek sa vre Bondye.” Pli tar, Noe ti marye e li ek son madanm ti ansenny zot trwa zanfan pour obeir Zeova. Sa ti fer sa fanmir diferan avek tou lezot dimoun otour zot.
En zour, Zeova ti dir Noe ki i ti’n deside pour detrir tou bann move dimoun lo later. Me Zeova ti osi donn Noe en lespwar. Zeova ti demann Noe pour konstri en gran lars oubyen kof pour ki serten dimoun i kapab ganny sove. Noe pa ti’n zanmen vwar en deliz ki ti kouver later antye parey Zeova ti pe dir ti pou arive. I pa ti’n zanmen fer en travay parey sa enn pour konstri en gran lars me i ti annan konfyans dan bann promes Zeova. Alor i ti konmans travay.
Noe ek son fanmir ti annan bann lennmi pwisan ki ti ay zot mesaz ek travay
Noe ek son fanmir ti bezwen kouraz pour fer sa travay. Sirman zot ti fer fas avek en kantite lopozisyon e dimoun ti monk zot. Sa bann move lanz ti bann lennmi pwisan e zot ti fer per. Zot zanfan osi ti vreman vyolan. Me Noe, son madanm fidel, son trwa garson ek zot bann madanm, wit dimoun an tou ti kontinyen travay dir. Pandan plizyer deseni, petet apepre 50 an, zot ti kontinyen travay dir lo sa lars. Dousman dousman i ti konmans vwar laform.
Pandan sa letan Noe pa ti reste trankil. Labib i dir ki Noe ti “en zonm ki ti pe pres lo ladrwatir.” Konman sef fanmir, i ti pare pour li averti bann dimoun lo sa ki ti pou arive. Me personn pa ti ekoute. I paret ki menm son fanmir pa ti ekout li. Bann dimoun pa ti anvi sanz zot bann move fason viv. I ti annan en gran diferans ant sa zonm ki ti annan lafwa ek lezot dimoun otour li. I pa drol alor ki Labib i dir sa lo Noe: “Akoz son lafwa, Noe ti kondann lemonn.”
Finalman, Noe ek son fanmir ti fini konstri lars. Aprezan, zot ti pou bezwen anmas manze, delo ek lezot keksoz ki zot ti pou bezwen pour zot e pour tou bann zannimo ki ti pou dan lars avek zot. Avek letan, en keksoz ekstraordiner ti arive. Tou sort kalite zannimo, mal ek femel, ti konmans antre dan lars! Zot “ti al kot Noe dan lars de par de,” volonterman.
Bondye ti’n fini demann Noe pour pran son fanmir pour antre dan lars parski lapli ti pe al konmans tonbe dan set zour. Nou kapab imazin sa fanmir pe degaze pour fini tou sa ki ti reste pour fer. Ou kapab vwar zot pe anmenn konmisyon dan lars e pe met lord dan bann keksoz ki deza dan lars. Petet dimoun ti pe sikann zot plis ankor. Me ler tou keksoz ti’n fini ganny mete dan lars, Zeova li menm ti ferm laport. Petet sa ti fer bann ki ti pe sikann zot ferm labous. Apre sa lapli ti konmans devide e delo ti konmans monte. Delo ti kontinyen monte pandan 40 zour ziska ki bann montanny osi ti ganny kouver. Koumsa menm ki Zeova ti tir tou bann move keksoz lo later.
Noe ek son fanmir ti reste sen e sof dan lars pour plis ki enn an. Sa delo ti pe desann dousman dousman. Finalman, sa lars ti aret lo en montanny e pli tar Zeova ti dir Noe ki i kapab sorti dan sa lars. Ler Noe ek son fanmir ti sorti dan lars, zot ti ador Zeova e zot ti rekonesan akoz i ti’n sov zot. Zeova ti promet ki i pa pou zanmen anmenn en deliz ankor e Zeova ti donn bann imen en larkansyel konman en siny oubyen en garanti ki sa promes i vre.
Tou dimoun ki egziste ozordi i bann desandans Noe. Alor, nou vreman rekonesan ki zot ti annan kouraz pour zot reste diferan dan en move lemonn!
Lir sa resi dan Labib:
Pour diskit lo la:
Ki mannyer Noe ti demontre kouraz?
Al pli o profon
1. Ki mannyer lemonn ti ete avan deliz? (w02-E 1/3 5 ¶3–6 ¶4)
2. Kan ki Zeova ti demann Noe pour konstri lars? Kan ki i ti konnen ki deliz ti pe al konmanse? (w12 1/4 25 ¶5-8)
3. Akoz nou kapab krwar ki deliz ti vreman arive? (Lartik ijwbq 156 ¶2-5, bwat) A
Historic Collection/Alamy Stock Photo
Portre A: En vye zistwar Endou ki pe rakont zistwar en zonm ki ti konstri en bato pour sirviv en deliz lo later antye. Apre deliz, sa zonm ti ofer en sakrifis e apre i ti vin zanset tou dimoun
4. Ki i ti arive san-t-an apre deliz e ki lefe sa ti’n kapab annan lo Noe ki ti aze? (it-E “Noah” No. 1 ¶12) B
Portre B
Reflesir lo sa bann leson
Ki mannyer sa letan ki nou pe viv ladan i parey dan lepok Noe? (Mat. 24:36-39)
Ki legzanp Noe i ansenny ou lo lenportans pour . . .
byen organize? C
Picture C
travay dir? D
Portre D
annan pasyans? E
Portre E
Ki mannyer ou kapab imit legzanp Noe pour annan kouraz dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki ou ti pou kontan demann Noe ler i resisite?
Aprann plis
Gete ki mannyer en sef fanmir i travay dir pour imit legzanp Noe.
Imit legzanp bann ki annan lafwa, pa bann ki napa lafwa—Noe, pa bann dimoun son lepok (2:57)
Ed ou zanfan aprann avek legzanp Noe.