1 ENOK
I ti mars avek Bondye
ENOK ti konnen ki i vedir santi tou sel. I ti diferan avek lezot dimoun dan son letan. I ti sa sel dimoun dan son letan ki Labib i dekrir koumsa: “Enok ti kontinyen mars avek sa vre Bondye.” Ki mannyer i ti posib pour en senp imen lo later fer sa? Ki Enok i kapab ansenny nou ozordi lo kouraz?
Enok ti mars avek sa vre Bondye dan omwen de fason, dan sa ki i ti refize fer e dan sa ki i ti fer. I ti refize adapte avek sa lemonn enpir ki ti otour li. I ti setyenm zenerasyon depi Adan ek Ev. Adan ti vreman vye me i ti ankor vivan. (Get laliny kronolozik “Depi lepok bann patriars ziska lepok bann ziz.”) Depi ki Adan ek Ev ti’n dezobeir Zeova, preski tou dimoun ti pe swiv zot legzanp. Zot garson Kaen ti touy son prop frer Abel ki ti sa premye dimoun pour demontre lafwa. Serten desandans Kaen ti osi vyolan parey li petet menm pli vyolan ankor. (Zen. 4:23, 24) Avek kouraz, Enok pa ti les sa bann dimoun vyolan enfliyans li. I ti en dimoun ki ti kontan lape e sa ti fer Bondye plezir.
Detrwa zenerasyon avan ki Enok ti ne, “dimoun ti konmans kriy non Zeova.” (Zen. 4:26) I paret ki zot ti fer sa dan en fason ki zot ti mank respe pour non Zeova e sa ti en fo larelizyon. Enok ti refize pran par dan sa fo ladorasyon. I ti kontan e i ti annan respe pour non sakre Zeova, alor i ti diferan avek bann dimoun dan son letan.
Ler dimoun ti anvi touy Enok akoz mesaz ki i ti anonse, Zeova ti protez li
Enok ti bezwen plis kouraz ankor ler i ti fer sa ki Zeova ti demann li pour fer. Bondye ti donn Enok en misyon spesyal, pour vin en profet. I ti pou anons en mesaz avek bann dimoun ki ti vreman diferan avek li. Sa ti sa mesaz: “Gete! Zeova in vin avek plizyer dizenn milye lanz sen pour anmenn zizman lo tou dimoun e pour kondann tou bann ki napa respe pour Bondye akoz tou move aksyon ki zot ti fer e pour tou keksoz sokan ki sa bann move dimoun ti dir kont li.”
Remarke ki profesi Enok ti ganny ekrir konmsi zizman Bondye ti en levennman istorik ki ti’n fini arive, akoz i ti asire ki sa ti pou vin vre. Sa mesaz ti en mesaz zizman ki ti vreman for. Dan kat diferan fason, Enok i repet sa menm nide pour montre ki sa bann dimoun ti “napa respe,” zot ti bann “move dimoun” e zot ti fer bann “move aksyon” ek bann “keksoz sokan.” Sirman, sa bann parol ti fer sa bann dimoun ki ti tann sa mesaz ki Enok ti pe anonse ankoler. Me avek kouraz i ti dir zot sa ki Zeova ti anvi zot tande.
Ki mannyer bann dimoun ti reazir? Labib pa dir nou egzakteman sa ki ti arive me aparaman i ti annan en letan kot lavi Enok ti an danze. Akoz nou dir sa? Nou lir: “Apre personn pa ti vwar li ankor, akoz Bondye ti pran li.” Ki ti arive? I paret ki bann move dimoun ti pe persekit Enok. Vi ki Zeova ti kontan Enok, i pa ti les sa bann move dimoun fer li ditor. Alor Zeova ti pran son zanmi, andotmo i ti fer li dormi dan lanmor. Dan sa fason, Enok ti reste an sekirite dan memwar Zeova kot personn pa ti kapab fer li ditor.
Me zis avan sa ti arive, Zeova ti donn Enok en kado spesyal. Nou lir: “Avan ki Bondye ti transfer li, Enok ti ganny en temwannyaz ki i ti’n vreman fer plezir Bondye.” Petet, Zeova ti fer Enok vwar dan en vizyon ki i ti pou viv anpe dan Paradi lo later. Avan ki Enok ti ferm son lizye pour en dernyen fwa, i ti asire ki Zeova ti kontan li e beni li pour son lafwa for ek kouraz!
Lir sa resi dan Labib:
Pour diskit lo la:
Ki mannyer Enok ti demontre kouraz?
Al pli o profon
1. Ki mannyer bann dimoun ti konmans “kriy non Zeova”? (Zen. 4:26; w01-E 15/9 29 ¶3)
2. Enok ti sa premye dimoun fidel pour fer kwa? Ki mannyer i ti reisi akonpli son misyon? (w01-E 15/9 31 ¶5)
3. Menm avan i ti konmans anons son mesaz, akoz Enok ti konnen ki i ti pou bezwen en kantite kouraz? (w06 1/10 18 ¶13-14) A
Portre A
4. Ki mannyer ou kapab montre ki Enok pa ti ganny anmennen dan lesyel parey serten i krwar? (Zan 3:13; Ebr. 11:5, 13)
Reflesir lo sa bann leson
Sirtou kan ki nou bezwen kouraz pour prese? Baze lo legzanp Enok, kwa ki kapab ed nou? B
Portre B
Ki mannyer Zeova i santi ler avek kouraz nou mars avek li? (Prov. 27:11; Ebr. 11:5)
Ki mannyer ou kapab annan kouraz parey Enok?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Enok ler i resisite?
Aprann plis
Ki mannyer legzanp Enok i kapab ed ou fer fas avek vyolans?
Imit legzanp bann ki annan lafwa, pa bann ki napa lafwa—Enok, pa Lamek (2:53)
Reflesir lo sa ki ti ed Enok pour devlop lafwa.