Panjika Kanawa Muze Uli ha Kukunguluka

1-2. (a) Yika Yehova akulingila tuvumbi twenyi musono? (Samu 23:1, 2, 5) (b) Yika mutulilongesa ha mutwe uno?

MUSONO, Yehova kakutwaha kulia chinji cha ku ufulielo. Pundu lume, twakutayiza maliji a Ndawichi muze embile ngwenyi: “Yehova kali Kafunga kami. Chichi kuhona chuma nichimwe.”—Tanga Samu 23:1, 2, 5.

² Jila yimwe yize Yehova akutuhelamo kulia cha ku ufulielo, yili muze twakupwa ha kukunguluka cha chikungulwila. Ha kukunguluka, kanji-kanji twakufunyina yuma yize hitunalilongesa kulu. Chipwe ngwe tuli mu umwenemwene ha mashimbu anji, nihindu tunazange hanga atwiwulule malongeso jacho. (2 Petulu 1:12) Alioze, nyi ngwe ha kukunguluka mahanjikaho yuma yize hitunalilongesayo ha yisuho yinji, shina chakupwa chashi kulihulikila ha yize analongesa? Nyi kuchishi kupwa chashi, mutwe uno muukukwasa. Mutumona mumu liaka twatamba kupanjika kanawa muze tuli ha kukunguluka. Mutumona nawa chize mandumbu waze akulongesa ha kukunguluka, mahasa kukwasa akwo hanga apanjike kanawa, ni chize umwe ni umwe wa kuli yetu mahasa kuchilinga. Alioze, chitangu mutukumbulula chihula chino: Iya wakutulongesa ha kukunguluka?

YEHOVA MWE WAKUTULONGESA HA KUKUNGULUKA

3. Kuchi Yehova akuhanjika ni yetu, mba kuchi tuvumbi twenyi akusolola ngwo kakulemesa Liji lienyi muze akulongesa?

³ Yehova kakutulongesa kupalikila mu Liji lienyi, Mbimbiliya. (2 Timoteu 3:16, 17) Yesu kananyingika chikuma chino. Muze apwile ni kulongesa, iye te kakutongola Yisoneko yalita ha mashimbu alita. Kashika waze apwile ni kumupanjika te akuhula ngwo, “Kuchi mutu yono ali ni chinyingi chipwahaha cha Yisoneko, se kakalilongesele ku shikola?” (Yoano 7:15) Akwa-mbunge yipema, kevile kuwaha muze amwene Yesu malumbununa Liji lia Zambi. Postolo Paulu ni Apolu, no kapwile ni kulumbununa kanawa Yisoneko muze te akuhanjika ni akwo. (Yili. 17:2, 3; 18:24, 28) Tunanyingika ngwetu, yuma yize twakulilongesa ha mikanda yetu, ha TV JW Broadcasting, ha pande ni ha yinema, yakukatuka mu Mbimbiliya. Atu anji waze akuya ha kukunguluka cha Yela ja Yehova ha chisuho chitangu, kakukomoka ha kumona chize akulumbununa kanawa Liji lia Zambi. Chikwo nawa, mandumbu waze akulongesa ha kukungulula, kakulongesa yuma yize yakukatuka mu Liji lia Zambi. Ayo keshi kutanga wika Mbimbiliya, alioze kakusolola ha mbunga, chize mutuhasa kukaula yize Mbimbiliya yakulongesa.—Luka 24:32.

4. Maliji “kwiva” ni “kupanjika,” nyonga lika akusolola?

⁴ Kanji-kanji mu Mbimbiliya, maliji “kwiva” ni “kupanjika,” kakusolola nyonga lia kwononokena umwe mutu. Kashika, muze Yehova akuhanjika ni yetu kupalikila mu Liji lienyi ha kukunguluka, ni muze twakunyingika kanawa upale wenyi, chakupwa chashi kumwononokena. Mutuhasa kupwa ni shindakenyo ngwetu, Yehova kakuwahilila muze twakumupanjika ni kulinga yuma kulita ni yize iye akutulongesa.—Yishima 27:11.

MUMU LIAKA TWATAMBA KUPANJIKA KANAWA MUZE TULI HA KUKUNGULUKA?

5. Nyi twazanga Yehova, yika mutulinga? (Yoano 4:23, 24; 1 Yoano 5:3)

⁵ Twakupanjika kanawa muze tuli ha kukunguluka, mumu twakuzanga Yehova. (Mateu 22:37) Muze twakulilongesa yuma yinji hakutwala kuli Yehova, zango lietu hali iye liakwoka. Mumu lia zango lietu hali iye, twakuzanga kumupanjika, kumwononokena ni kumuwayila ngwe chize iye mwene ambile kupalikila mu Liji lienyi.—Tanga Yoano 4:23, 24; 1 Yoano 5:3.

6. Kuchi akutulongesa ha kukunguluka chetu, chize mutuhasa kukwasa akwetu?

⁶ Twakupanjika kanawa muze tuli ha kukunguluka, mumu twakuzanga atu. (Mateu 22:39) Ha kukunguluka chetu, Yehova kakutulongesa chize mutukwasa mandumbu jetu ni atu waze kamunyingikine. Ngwe chilweza, kamukanda Zangenu Atu—Mba Nwapwise Tumbaji, kakutukwasa kupwa ni yitanga yize muyitukwasa mu mulimo wa kwambujola. Shina chakupwa chikalu kuli yena kuhanjika kanawa ni atu muze uli mu mulimo wa kwambujola? Nyi chenacho, kupanjika kanawa muze mandumbu analingi yihanda yo ha chihanda cha alongi, ha kukunguluka cha mukachi ka poso, muchikukwasa chinji.

7. Mumu liaka chili chilemu kununga ni kupanjika Yehova?

⁷ Twakupanjika kanawa muze tuli ha kukunguluka, mumu twakuzanga mwono. Yehova kalwezele tuvumbi twenyi ku mashimbu a kunyima, amwononokene mba atwame kanawa. Ni yetu nyi tunazange kuwahilila ni kupwa ni mwono wa mutolo, twatamba kumwononokena. (Shimbi 32:44-47) Muze twakupanjika kanawa ha kukunguluka, kakututakamisa. Chikwo nawa, twakulilongesa chize mutuhasa kunyongonona mu yipikalo ni kushimbwila chifuchi chaha ni uhumikizo. (Roma 8:25) Chili chilemu kupanjika Yehova, mumu tuli ha matangwa akusula. Chikwo nawa, twatamba kulawola ku ufulielo.—Mateu 24:42-44; Uso. 1:3.

TUKWASENU AKWETU HANGA APWE NI KUPANJIKA KANAWA HA KUKUNGULUKA

8. Mumu liaka mandumbu waze akulongesa ha kukunguluka atamba kusa tachi hanga anunge ni kululieka utotombo wo wa kulongesa?

⁸ Mandumbu waze akulongesa ha kukunguluka, chipi-chipi waze akuhanjika pande ja mbunga, katamba kununga ni kululieka utotombo wo wa kulongesa. Nyi mutu malulieka kanawa chihanda chenyi ni kulongesa kulita ni yize Mbimbiliya yakwamba, chino muchikwasa atu anji eze mu umwenemwene. Chikwo nawa, muchikwasa mandumbu hanga anunge mu umwenemwene. Nyi uli ni chimwe chihanda ha kukunguluka iwuluka ngwe, chihanda che muchihasa kukwasa chinji akwenu kuhiana chize yena mwene wakunyonga. Nyi uli ni chiwape cha kuhanjika pande ha kukunguluka, tala chize muhasa kukaula yikuma yino muze muhanjika pande. Chipwe ngwe yikuma yino kayisonekenanga waze akuhanjika pande ja mbunga, nihindu muyihasa kukwasa atu eswe waze akulinga yihanda ha kukunguluka.—2 Timo. 4:2; Titu 1:9.

9. Yika muhasa kulinga hanga akwenu akaule pande jize unahanjika?

⁹ Lilulieke kanawa. Muze unahanjika pande, watamba kuhanjika mu jila yashi hanga akwenu anyingike yize unambe ni kuyikaula. Muchipwa chikalu atu kukupanjika, nyi ngwe mwalongesa yuma yikalu. Yika muhasa kulinga hanga uhanjike kanawa pande? Tala yikuma yimwe yize muhasa kukaula. (1) Solola yikuma yize muhanjika ha pande. (2) Kanda ulumbununa yikuma yeswe ha shimbu limuwika, lumbununa chikuma ni chikuma. (3) Ha kuhwisa pande, hitulula yikuma yize washimutwina. Muze muhwisa kuhanjika chimwe chikuma, muhasa kumana yimwe ndambu hanga atu waze anakupanjika anyingike ngwo unayi ha chikuma chikwo.

10. Mumu liaka chili chilemu yena mwene kuzanga yikuma yize mulongesa ha pande?

¹⁰ Watamba kuzanga yikuma yize mulongesa ha pande je. Nyi wakuzanga chimwe chikuma, muchihanjika ni chiseke. Atu waze makupanjika, no machimona. (Yishi. 2:4, 5; Yili. 4:20) Kupukuna ha yisoneko ni ha yikuma yize yili ha pande jize muhanjika, muchikukwasa kuzanga yikuma yize mukalongesa. Umwe ndumbu yoze watwama mu Estados Unidos, kanewuluka jimwe pande evile muze te uchili kanuke. Iye yamba ngwenyi: “Ndo haliapwila, ngunewuluka chize mutu yoze wahanjikile pande atukolwezele ha kupukuna muze tunatange Liji lia Zambi. Iye kahanjikile ni shindakenyo, chikwo nawa, kalumbunwine mu jila yashi chize mutuhasa kuchilinga. Pande jacho jalumwine mwono wami. Jangukwashile ngupwe ni kuwana malongeso anji muze ngunatange Mbimbiliya. Jangukwashile nawa kupwa ni usepa upema ni Yehova.”

11. Mumu liaka chili chipema kulongesa atu yuma yize anafupu? (1 Timoteu 4:13-16)

¹¹ Nyonga ha yuma yize atu waze makupanjika anafupu, hanga walongese yuma yize muyakwasa. Shimbu ulihulikile ha kulongesa yuma yinji, kolweza atu waze anakupanjika ni kwakwasa hanga amone chize mahasa kukaula ku mwono wo yuma yize Mbimbiliya yakulongesa. Ngwe chilweza, Paulu kalwezele Timoteu yuma yize atamba kulinga hanga akundame kuli Yehova, muze te anakalakala hanga akwase mandumbu jenyi mu Efwesu. (Tanga 1 Timoteu 4:13-16.) Nyonga ha yize atu waze anakupanjika anafupu. Chikwo nawa, akwase kumona majila waze mahasa kukawilamo lusango wacho ku mwono wo.

12. Mumu liaka chili chilemu kuhanjika pande ngwe unashimutwina?

¹² Muze unalulieka pande, funyina maliji jacho ni liji mwilu hanga ukahanjike ngwe unashimutwina. Hanjika pande mu jila yashi, kanda usoneka ni kutanga liji ni liji. Nyi wachilinga, muchipwa chashi kuli atu waze anakupanjika, kunyingika yize unambe. Kamukanda Likolweze Kutanga ni Kulongesa kakwamba ngwo: “Hanjika ni mbunge ye yeswe ngwe chize wakuhanjika matangwa eswe usolole chize unevu ha yize unahanjika kuli waze anakupanjika.” Nyi wahanjika ngwe unashimutwina, atu mazanga kukupanjika kanawa, hanga anyingike yikuma yize unalongesa ni kumona chize mayikaula ku mwono wo.

13. Mumu liaka waze akulongesa mu chikungulwila atamba kwita ukwaso kuli akwa-kuhanjika pande waze ajama? (Tala nawa chizulie.)

¹³ Eta ukwaso kuli umwe mukwa-kuhanjika pande yoze wajama. Kuchi muhasa kuchilinga? Muhasa kusolola yikuma yize wasoneka kuli umwe mukwa-kuhanjika pande yoze wajama, ni kukaula yiyulo yize makwaha. Chikwo nawa, muhasa kumwita akupanjike hanga akukwase kupwa longeshi mupema. (Yishi. 1:5) Ha yisuho yimwe, kuchishi kupwa chashi kunyingika yize twatamba kulinga hanga tupwe ni kuhanjika kanawa pande. Kashika, ndumbu yoze yena wetanga ukwaso, makulweza chize muhasa kululieka manyonga hanji yikuma ya mu pande je hanga chipwe chashi kuyinyingika ni kuyikaula. Tunazange kupwa akwa-kuhanjika pande ni alongeshi apema, hanga tukwase atu waze matupanjika ayuke ni yikuma yilemu yize twakuwana mu Lijia lia Zambi.

YIZE MUYIKUKWASA KUPANJIKA KANAWA

14. Nyonga lika twatamba kupwa nalio hakutwala ku malongeso ja Zambi? (Samu 119:24, 111, 167)

¹⁴ Nyi twapwa ni kupanjika kanawa muze tuli ha kukunguluka mutusolola ngwetu, yuma yize Yehova akutulongesa yili yilemu chinji kuli yetu. Nyi twewuluka yuma yize Yehova akutulongesa, mutuhasa kunyongonona mu yipikalo ha ‘mashimbu wano akalu chinji.’ (2 Timo. 3:1) Ha mashimbu amwe, nyi ngwe mutwiva yuma yize hitunalilongesa kulu, muchipema kupukuna ha nyonga lize mukwa-kusoneka Samu 119 apwile nalio hakutwala ku malongeso ja Zambi.—Tanga Samu 119:24, 111, 167.

15. Yika muyitukwasa kununga ni kumona yuma yize twakulilongesa ha kukunguluka ngwo yili yilemu chinji? Hana chilweza.

¹⁵ Ngwe chizechene A-Izalele atambile kupwa ni nyonga lialita ha manaa waze Yehova ahele ha mashimbu waze apwile mu puya, ni yetu twatamba kupwa ni nyonga lialita ha kulia cha ku ufulielo chize twakutambula. (Kutuhu. 16:15, 31) Ku uputukilo, A-Izalele te kakuwahilila ni chawana chize ahele. Chawana chacho, chakatukile kuli Yehova, te chipema, chikwo nawa, chaakwashile kununga ni mwono. Alioze ha kupalika cha mashimbu, amwe yahonga mumu lia kulia manaa matangwa eswe. (Kwa. 21:5) Musono, yuma yize Yehova akutulongesa ha kukunguluka, kota hitunayivu ha yisuho yinji. Chipwe chocho, kutwatambile kuyimona ngwe kuyishi ni ulemu. Ngwe chize hitwamona, twatamba kununga ni kusolola usakwililo wetu ha kulia cha ku ufulielo, mumu tunanyingika ngwetu, chinakatuka kuli Yehova. Twatamba kwiwuluka ngwetu, ndungo washishika, wakanyama, mwe wakusakula yuma yize twatamba kulilongesa ha kukunguluka. Twatamba nawa kwiwuluka ngwetu, yuma yize twakulilongesa, yakutukwasa kukwata yiyulo ya mana, mba tukapwe ni mwono wa mutolo.—Yishi. 3:13, 16-18; Yoa. 17:3.

16. Yika yakukwasa tuvumbi a mwe a Yehova waze akumulingila ha miaka yinji, anunge ni kupanjika kanawa? (Tala nawa mushete, “Yuma Yize Muyitukwasa Kupanjika Kanawa.”)

¹⁶ Mutupwa akwa-kupanjika apema, nyi twakaula yiyulo yize akutwaha. Ngwe chilweza, tutalenu yize yakwashile amwe tuvumbi a Yehova waze akumuwayila ha miaka yinji, mba anunge ni kupanjika kanawa muze ali ha kukunguluka. Ashley, yoze wakuwayila Yehova ha miaka kuhiana 30, yamba ngwenyi: “Kulianga kulilongesa yize mutushimutwina ha kukunguluka, chakungukwasa kupanjika kanawa. Nyi ngwe chaliluliekele, chakupwa chikalu kuli yami kukumbulula, chikwo nawa, nakunyonga ha yuma yeka muze nguli ha kukunguluka.” József, yoze wakuwayila Yehova ha miaka 52, yamba ngwenyi: “Nakuzanga kwiva yuma yize ngunanyingika, mumu muze mutu akuhanjika yuma yoyene, alioze mujila yeka, chakungukwasa kunyingika yuma yinji.” Iye yamba nawa ngwenyi: “Nyi ngwe ndumbu yoze unahanjika pande keshi ni utotombo wa kulongesa, yami nakusa tachi hanga ngulihulikile ha yize anambe, shimbu ngulihulikile ha mutapu uze iye anahanjika, mumu ngunanyingika ngwami, yize iye analongesa, yinakatuka mu Liji lia Zambi.”

17. Yika muyikukwasa upwe ni kupanjika kanawa ha kukunguluka? (Tala nawa chizulie.)

¹⁷ Tutalenu yuma yimwe yize muhasa kulinga hanga upwe ni kupanjika kanawa muze uli ha kukunguluka. (1) Kanda ulia chinji nyi unayi ha kukunguluka, hanga uchine kuya tulo. (2) Lianga kuheta ha kukunguluka hanga umone haze mutwama, shimbu kukunguluka kanda chichiputuka. (3) Sako shindakenyo ngwe, telefone hanji tablet ye, kuyichi kukupinjisa ha mashimbu waze uli ha kukunguluka. (4) Nyonga ha yikuma yize mukwa-kuhanjika pande malongesa. (5) Lihulikile hali mutu yoze unahanjika pande. (6) Soneka yikuma yilemu, hanji kuyifunjeka kawashi-washi. (7) Kaula yisoneko yize matanga. Chikwo nawa, eseka kunyonga ha chize chisoneko chimwe chinakwata ha chikwo. (8) Lihule ngwe, ‘Kuchi munguhasa kukwasa umwe mu chikungulwila chetu hanji mu njiza yetu ni lusango yono?’ (9) Shimbu kukunguluka cha mbonge hanji cha mambonge kanda chichiputuka, tala ha katalilo, tanga mutwe wa tangwa liacho, mitwe ya pande jize mahanjikaho, ni yisoneko yize matanga. (10) Lulieka mbunge ye ha kutwama ni kulihumikiza hanga upanjike miaso ni kutala yinema ku uputukilo wa kukunguluka.

NUNGA NI KUPANJIKA YEHOVA

18. Mumu liaka twatamba kununga ni kupanjika kanawa ha kukunguluka?

¹⁸ Twatamba kununga ni kupanjika kanawa ha kukunguluka, mumu muze twakuchilinga, Yehova kakutusongwela “mu jila ya ululi.” (Samu 23:3; 31:3) Chikwo nawa, tunazange hanga Yehova atusongwele, mba tununge ni kulinga yuma yalita. Kashika, nunga ni ‘kukanyama ha chize wakwiva.’ Chikwo nawa, kaula ku mwono we, usongwelo uze wakutambula. (Luka 8:18) Waze akupanjika Yehova kakuwahilila, chikwo nawa, makapwa ni mwono wa mutolo kulutwe lia matangwa.—Samu 119:2, 14.