Lusango yono kanasolola yize muyihasa kulingwa kuli umwe ni umwe wa kuli yetu. Hanyima lia kulinga shili yinene, mutuhasa kuputuka kunyonga ngwetu shili yacho yalingiwa “washi-washi.” Amwe hanji mamba ngwo, “Yino yalingiwa susumuku.” Alioze nyi mutunyonga kanawa ha yize yalingiwa, mutuhasa kumona ngwetu shili yacho yalingiwa mumu lia yiyulo yipi yize mutu akwachile. Hanji yeswe yaputukile mumu lia kusakula masepa api, yiheho ni yinema ya luchisa, kuya ku yihela yize kuyalitele hanji kunjila ha site jipi. Hanji mutu wacho haneche kulemba, kutanga Mbimbiliya, kukunguluka ni kwambujola. Ngwe chizechene yalingiwile kuli mukweze anatongola ha Yishima, hanji shili yacho kuyakalingiwile susumuku. Yika twalilongesa? Twalilongesa ngwetu, kutwatambile wika kwehuka shili, alioze twatamba nawa kwehuka yuma yize muyihasa kututwala ku kulinga shili. Solomone kasolwele chikuma chino zwalala muze asolwele yize yalingiwile kuli mukweze ni pwo chikoi.—Mateu 5:29, 30. w24.07 16 ¶10-11

Upite uka wenawo? Upite wacho uli sango jipema ja Wanangana jize jakulamwina atu. (2 Kori. 4:1) Mba yikwachilo ya uma yika? Yikwachilo yino, yinalumbunuka tuvumbi twa Zambi waze akwambujola sango jipema kuli akwo. Ha mashimbu ja Paulu, akwa-mingoso te kakuzachisa milondo ya uma hanga ambachilemo hanji kutulikilamo yuma ya ndando ngwe kulia, vinyu ni mbongo. Chizechene nawa, yetu tuli yikwachilo ya uma yize Yehova akuzachisa hanga tumbate sango jipema. Ni ukwaso wa Yehova, twakupwa ni tachi jize tunafupiwa hanga tununge ni kwambujola ni ushishiko. Ha mashimbu amwe, mutuhasa kuvwila atu woma hanji kwivwa woma wa kuhona kutupanjika. Kuchi mutuhasa kukumba kapinda wacho? Tutalenu kulemba cha apostolo muze aalwezele hanga alitwamine kwambujola. Shimbu evwile atu woma, o yeta ukwaso kuli Yehova hanga anunge ni kwambujola ni hamu. Ha shimbu lizeliene, Yehova yakumbulula yilemba yo. (Yili. 4:18, 29, 31) Nyi musakalala mu mulimo wa kwambujola mumu lia kuvwila atu woma, eta kuli Yehova hanga akukwase kumona ngwe zango lize ukwete hali atu lili linene chinji kuhiana woma uze wakwaevwila. w24.04 16 ¶8-9

Kuzanga Yehova chakututwala kuhalisa jina lienyi. Maliji wano kanalumbunuka ngwo, tunazange kulweza atu ngwetu yuma yeswe yize Satana ambile hali Yehova yili ya mahuza. (Uputu. 3:1-5; Yombi 2:4; Yoa. 8:44) Muze twakwambujola, twakuzanga chinji kulweza atu eswe waze matupanjika hanga anyingike Yehova ni utu wenyi. Twakuzanga nawa atu eswe anyingike ngwo, chitanga chenyi chilemu chili zango; kuyula chenyi chapwa cha ululi. Chikwo nawa ngwo, kwasala hakehe Wanangana wenyi muhwisa lamba lieswe hano hashi ni kuneha sambukila ni uwahililo kuli atu eswe. (Samu 37:10, 11, 29; 1 Yoa. 4:8) Muze twakuhanjika umwenemwene hakutwala kuli Yehova, acho twakuhalisa jina lienyi. Chikwo nawa, twakuwahilila ha kunyingika ngwetu, tunalingi yize yetu Yela ja Yehova twatamba kulinga. w24.05 18 ¶12