Sako Tachi Upwe ni Kulongesa Kanawa mu Mulimo wa Kwambujola

1. Yika Akwa-Kristu eswe atamba kulinga, nawa mumu liaka? (2 Timoteu 4:2) (Tala nawa chizulie.)

YESU kalwezele tumbaji twenyi ngwenyi: “Yeenu nukapwise atu a ku mavungu eswe tumbaji, . . . ni kwalongesa hanga ononokene yuma yeswe yize nanutumine.” (Mateu 28:19, 20) Usongwelo uno unasolola ngwo, Akwa-Kristu eswe katamba kupwa alongeshi. Kwamba pundu, Yehova mwe wakukoka “akwa-kulikehesa.” Alioze, angelo no kakutukwasa kuwana atu jacho. (Yili. 13:48; Yoa. 6:44; Uso. 14:6) Chipwe chocho, twatamba kunyingika chize mutulongesa akwetu hakutwala kuli Yehova. Tutalenu chilweza cha apostolo Paulu ni Mbarnabe. Mbimbiliya yakwamba ngwo: “Mu Ikoniu, Paulu ni Mbarnabe anjilile hamuwika mu sunangonga ya A-Yunda. Mumu lia kulongesa cho, chizavu chinene cha A-Yunda ni A-Ngresia afulielele.” (Yili. 14:1) Chino chinasolola ngwo, Paulu ni Mbarnabe te ‘kakulongesa kanawa.’ (Tanga 2 Timoteu 4:2.) Akwa-Kristu eswe musono, no katamba kunyingika chize malongesa kanawa.

2. Mumu liaka Akwa-Kristu amwe akunyonga ngwo keshi kulongesa kanawa?

² Amwe mahasa kunyonga ngwe keshi kulongesa kanawa, mumu ngwo kakalilongesele chinji ku shikola, hanji ngwo, kakasemukine ni utotombo wacho. Mbimbiliya yakutongola malunga amwe waze no anyongene chocho. (Kutuhu. 4:10; Jere. 1:6) Akwo mahasa kulivwa ngwe keshi kulongesa kanawa mumu keshi ni alongi a Mbimbiliya, hanji ya kulitakana nayo ngwe akwa kwambujola akwo. Kwamba umwenemwene, hi atu eswe ko waze mutwambulwila matayiza sango jipema. Ngwe chize hitwamba kulu, Yehova ni angelo e akutukwasa kuwana atu a mbunge yipema. Kashika, nyi atu matupanjika mu mulimo wa kwambujola nyi ka, yino kuyatalile wika ha tachi jize yetu ene twakusa. Chipwe chocho, tunazange kulinga yeswe yize mutuhasa hanga twambujole sango jipema. Mutwe uno, muuhanjika ha majila atatu waze matukwasa kupwa alongeshi apema mu mulimo wa kwambujola.

TWATAMBA KULIHULUMBA NI ATU

3. Mumu liaka atu anji te akuzanga malongeso ja Yesu?

³ Mbimbiliya yakwamba ngwo, Yesu “kanyingika yize yili mu mbunge ja atu.” (Yoa. 2:25) Maliji wano kanalumbunuka ngwo, Yesu te kanyingika yize atu akunyonga ni yize yakwatwala hanga anyonge mu jila yacho. Yesu kanyingikine yuma yize atu apwile ni kufupa, kashika apwile ni kuhanjika yuma yize te yakwakwata ku mbunge. Iye kanyingikine nawa ngwenyi, atu te kanafupu usongwelo ni utakamiso, mumu mangana a mayingeleja kapwile ni kukalisa chinji mwono wo. (Mateu 9:36; 23:4) Kashika Yesu akwashile atu ha kwalongesa yuma yinji yize yapwile ni kwashiwisa mwono wo. Kuchi tunachinyingika? Tunachinyingika mumu lia Longeso lia ha Mulundu. Atu anji te kakuzanga malongeso ja Yesu, mumu iye kapwile ni kuhanjika ha yuma yize ayo te akulipikala nayo.

4. Kuchi mutuhasa kusolola ngwetu twakulihulumba ni atu? (Tala nawa yizulie.)

⁴ Mutuhasa kusolola ngwetu twakulihulumba ni atu, ha kweseka kunyingika yize analipikala nayo. Atu eswe twakwambulwila, kanapalika mu yimwe yipikalo mu chifuchi chino cha Satana. Kunyingika chino, muchitukwasa kulisa mu chihela cha atu a mu njiza yize twakwambulwila. Ngwe chilweza, shina kuli sango jaha jize atu analipikala najo mu njiza yenu? Shina yisemi kanalihulumba ha chize mafunga ana jo ku shikola? Shina kuze watwama chili chikalu kuwana mulimo? Eseka kunyingika chize uli mwono wa atu waze keshi ni kutalatala chize Mbimbiliya yakuhana ha ‘mashimbu wano akalu chinji.’—2 Timo. 3:1; Iza. 65:13, 14.

5. Kalisa muka wapwile hakachi ka Yesu ni A-Fwariseu? (Mateu 11:28-30)

⁵ Yesu kapwile ni kulihulumba ni atu. Ayo kapwile ni kuchimona ha chize iye te akutwama no. Yesu te kalisa ni mangana a mayingeleja waze apwile ni kulimona ngwo kali alemu chinji kuhiana akwo. Chikwo nawa, ayo kapwile ni kumwesa atu lamba linji. (Mateu 23:13; Yoa. 7:49) Alioze, Yesu kapwile ni kuvumbika atu ni kwasolwela umbovu. Chikwo nawa, Yesu kapwile “chihomboloji, mukwa-kulikehesa ni mbunge yeswe.” Chino chamukwashile kupwa longeshi mupema. (Tanga Mateu 11:28-30.) Ni yetu twatamba kusolola umbovu ni vumbi kuli atu waze akutupanjika.

6. Kuchi mutuhasa kusolola umbovu ni vumbi kuli waze akulimika ni yetu hanji waze keshi kutayiza sango jize twakwambulwila?

⁶ Amwe keshi kuzanga kwivwa sango jize twakwambujola, akwo kakutuvwila uli. Yesu katulwezele hanga tuhone kulinga yuma yipi kuli atu waze akutuhungumiona. Katulwezele nawa ngwenyi: ‘Nwatamba kulinga yuma yipema kuli waze akunuvwila kole,’ “wahisenu waze akunushinga, lembelenu waze akunusaula.” (Luka 6:27, 28) Muchipwa chashi kusolola umbovu kuli atu waze akutulinga yuma yipi, nyi twewuluka ngwetu, kota kuli chimwe chize chakwatwala ahone kutupanjika. Kwamba umwenemwene, amwe kakuzanga kutukwika kwambujola. Alioze amwe keshi kuzanga kutupanjika mumu kali ni umwe kapinda mu usoko, eka kanasakalala ni chimwe chuma chize kuchatalile hali yetu. Muchihasa kupwa nawa ngwe, twaya ku zuwo lio ha shimbu lize ayo anevu uli. Mashimbu eswe twatamba kukaula chiyulo chize chinambe ngwo, “maliji jenu akapwe apema mashimbu eswe, akulungiwa ni mungwa hanga nukanyingike chize munukumbulula mutu ni mutu.” (Kolo. 4:6) Nyi twalisa mu chihela cha atu ni kweseka kunyingika yize ayo anafupu, chino muchitukwasa kuhona kwivwa uli ni kawashi ni kupwa alongeshi apema.

JIKIJILA HA LIJI LIA ZAMBI

7. Kuchi Yesu asolwele ngwenyi kakujikijila ha Liji lia Zambi muze apwile ni kulongesa? (Yoano 7:14-16)

⁷ Yesu kakalongesele atu manyonga jenyi. Alioze kaalongesele yize yinakatuka mu Liji lia Zambi ni chize mahasa kuyikaula ku mwono wo. Chikwo nawa, kachilingile mu jila yashi yize te muyihasa kwalumbunuka ni kwiwuluka malongeso jacho. Mbimbiliya yakwamba ngwo, Yesu te kakwalongesa “ngwe yoze uli ni chiyulo, hi ngwe alongeshi a shimbi ko.” Chocho, “atu alishimwokene ha chize iye apwile ni kulongesa.” (Marku 1:22) Mangana a mayingeleja kapwile ni kulongesa atu yize mangana akwo a lufuma apwile ni kwamba. Alioze, Yesu kapwile ni kulongesa atu yize Mbimbiliya yakwamba. Amu apwile Mwana wa Zambi nawa katwamine mu malilu, Yesu kachi kakomwesene ni mana jenyi atu waze apwile ni kumwivwa hanji kwalongesa yuma yinji. Alioze iye kakachilingile. Shimbu achilinge, iye yalihulikila ha kulongesa atu upale wa Zambi ni Liji lienyi Mbimbiliya. (Tanga Yoano 7:14-16.) Yesu kahichikile chilweza chipema kuli Akwa-Kristu eswe ha chize atamba kulongesa akwo.

8. Kuchi postolo Petulu akawile chilweza cha Yesu?

⁸ Tumbaji twa Yesu no kapwile ni kujikijila ha Liji lia Zambi muze apwile ni kulongesa. Tutalenu chilweza cha pande jize Petulu ahanjikile ha Pentekoste 33 M.J. Petulu kakalilongesele chinji, alioze jila yize apwile ni kulumbunwinamo uprofeto uze Yesu amanunwine, yakwachile atu ku mbunge. (Yili. 2:14-37) Yika yalingiwileko? “Waze atayijile maliji jenyi ni uwahililo, yaapapachisa. Ha tangwa lize atu 3,000 yalichinga no.”—Yili. 2:41.

9. Mumu liaka twatamba kutanga Liji lia Zambi muze tunalongesa atu?

⁹ Mbimbiliya ye wika yili ni ndundo ja kukwasa atu kwalumuna mwono wo, mba evwise Zambi kuwaha. (Hepre. 4:12) Kashika, twatamba kutanga Mbimbiliya muze tunalongesa. Chikwo nawa, tunazange ‘kwambujola liji,’ hi manyonga jetu ko. (2 Timo. 4:2) Mukanda wa Yishima 2:6 unambe ngwo: “Mumu Yehova kakuhana mana. Ku kanwa lienyi kwakutuhuka yinyingi ni malinjekela.” Maliji wano kanasolola ngwo, nyi ngwe mututanga Mbimbiliya muze tunalongesa, chili ngwe Yehova mwene mwe unahanjika. (Mala. 2:7) Tunazange hanga atu anyingike ngwo, mu Mbimbiliya muli mana waze ahiana mana ja atu. Chikwo nawa, yize Mbimbiliya yakulongesa yakukatuka kuli Sakatanga wetu. Yakutukwasa nawa kuwahilila ni kuvwisa Zambi kuwaha.—2 Timo. 3:16, 17.

10. Kuchi mutuhasa kukwasa longi yetu anyingike ngwo yize tunamulongesa yinakatuka mu Mbimbiliya?

¹⁰ Muze unalilulieka hanga usongwele longeso lia Mbimbiliya, wana majila a kukwashilamo longi ye hanga alihulikile ha yize Mbimbiliya yakulongesa. Chipwe ngwe twakusolola yinema ni yizulie muze tunalongesa, nihindu twatamba kulihulikila chinji ha yize Mbimbiliya yakwamba. Kashika ha shimbu lize nunalilongesa, tangenu jimwe versu ja mu Mbimbiliya jize mujikwasa longi ye akwate kanawa yikuma yilemu. Hanyima, mukwase kunyonga ha yize mahasa kulilongesa ha versu jacho. Chipwe ngwe munutala yinema hanji yizulie, nihindu kwasa longi ye anyingike yize Mbimbiliya yakulongesa. Alioze chino kuchalumbunukine ngwo, nwatamba kutanga yisoneko hanji versu jeswe jize jili ha longeso liacho. Muze munutanga yimwe versu, hana mashimbu kuli longi ye anyonge hakutwala ku ulumbunwiso wa versu yacho. Mashimbu amwe muchiliata yena hanji longi ye kutanga cheka versu yacho. Nyi walinga chino, kuuchi kulongesa longi ye yize mukanda, chizulie hanji chinema chinambe, alioze yize Mbimbiliya yakwamba.—1 Kori. 2:13.

11-12. (a) Kuchi mutuhasa kulihumikiza ni alongi jetu a Mbimbiliya? (Yilinga 17:1-4) (Tala nawa chizulie.) (b) Yika amwe atamba kunyingika hakutwala ku Mbimbiliya nawa kuchi mutuhasa kwakwasa?

¹¹ Nyi muchipwa chikalu kuli longi kutayiza limwe longeso, nunga ‘kwambujola liji ni kulihumikiza.’ Longi ni longi, kakujama mu jila yalisa. Alongi amwe kakumbata mashimbu mba anyingike umwenemwene. Iwuluka ngwe, A-Yunda a mu Tesalonika, kakanyingikine yuma ha shimbu lizeliene Paulu aalongeseleyo. Kashika iye anungine ni kwameneka ni kwalumbunwina yize yisoneko yakwamba. Ha kuchilinga, amwe yanyingika yize Paulu apwile ni kulongesa.—Tanga Yilinga 17:1-4.

¹² Jila yimwe yize mutuhasa kusolwelamo ngwetu twakulihumikiza ni alongi jetu, yili ha kwahula ni kwaha mashimbu hanga awane makumbululo. Eseka kwapanjika kanawa ni kunyingika yize ayo ananyongo. Tangenu chimwe chisoneko ni kuchishimutwina hanga ukwase longi kunyingika nyonga lia Zambi. Iwuluka nawa ngwe, atu amwe kanda achimona kama Mbimbiliya chipwe kunyingika yize yakwamba. Shina muhasa kusolwela longi ye Mbimbiliya ya ha mafwo? Muhasa nawa kumusolwela chikuma “Nyingika Kanawa Liji lia Zambi,” chize chakusoloka ha lifwo litangu lia Mbimbiliya ya Yisoneko ya Chifuchi Chaha, hanga umulweze sango jize mahasa kuwana mu Mbimbiliya. Kwasa nawa longi ye anyingike ngwo, Mbimbiliya muyihasa kumuyukisa, ha kumusolwela chisoneko chimuwika hanji yaali, yize yili ha chihula 15 hanga amone chize Mbimbiliya muyihasa kumukwasa kupwa ni uwahililo. Nyi wakwasa alongi je kunyingika ulemu wa Mbimbiliya, ayo makaula malongeso jacho ku mwono wo ni kuzanga kunyingika nawa yuma yikwo.

AKWASE HANGA ANYINGIKE YEHOVA

13. Muze tunalongesa hali iya twatamba kulihulikila chinji? Hana chilweza.

¹³ Yetu twakulihulikila ha kukwasa atu waze akutupanjika anyingike Yehova ni kukundama kuli iye. (Tia. 4:8) Ngwe chilweza, achinyonga ngwe unende ha ufuku ni umwe sepa. Alioze iye maholola chimwe chuma. Mba umukwase kuwana chuma chacho, shina mutemuna ndeya hali yena mwene, nyi mutemuna haze haholokela chuma chacho? Kwamba umwenemwene, kushi kutalikisa ndeya hali yena mwene, alioze mutalikisa haze haholokela chuma chacho. Chizechene nawa, muze tunalongesa, twatamba kukwasa atu hanga alihulikile hali Yehova hi hali yetu ko.

14. Kuchi mutuhasa kukwasa longi yetu alihulikile hali Yehova?

¹⁴ Muze tunasongwela longeso lia Mbimbiliya, twatamba kukwasa alongi jetu kupwa ni zango lia kuvwisa Yehova kuwaha. (Yishi. 27:11) Kuwatambile wika kukwasa longi ye ehuke yuma yipi hanga apwe Chela cha Yehova. Alioze, watamba kumukwasa kwalumuna mwono wenyi hanga evwise Yehova kuwaha. Ngwe chilweza, nyi ngwe longi ye kanapinda ha kukumba yimwe ndako yipi, muhasa kumuhula ngwe: Mumu liaka Yehova keshi kuzanga chitanga chino? Mumu liaka Yehova anakwichi hanga weche chitanga chacho chipwe ngwe yena wakuchizanga? Mumu liaka mutuhasa kwamba ngwetu, yuma yize Yehova anakwichi yakusolola ngwo iye kakukuzanga? Muze mukwasa longi ye hanga anyonge chinji hali Yehova ni yitanga yenyi, iye manyingika ngwenyi, Yehova kakumuzanga. Kulinga chino, muchikwasa longi ye hanga azange kuvwisa Yehova kuwaha.

NUNGA NI KUSA TACHI HANGA UPWE LONGESHI MUPEMA

15. Yika mutuhasa kulinga hanga tununge ni kupwa alongeshi apema?

¹⁵ Muhasa kulemba kuli Yehova ni kwita hanga akukwase kuhengwola mutapu we wa kulongeselamo, ni kumona haze muhasa kwalumuna. (1 Yoa. 5:14) Nyi walinga yuma kulita ni yize wetanga mu yilemba, yena muhasa kuyuka ha fumbo lize akutwaha kupalikila ha kukunguluka. Muhasa kusanyika nawa mandumbu akwo ajama waze akulongesa kanawa hanga nuye ni kusongwela chimuwika longeso lia Mbimbiliya. Hanyima, ahule akulweze haze muhasa kwalumuna. Chipwe ngwe unanyingika kanawa yize mulongesa, iwuluka ngwe longi ye kayinyingikine kanawa. Kashika muze nunalilongesa, kwasa longi ye hanga amone chize mahasa kuyuka ni yize analilongesa, ni kumona nawa yuma yipema yize Yehova anatulakenya. Kulinga chino, muchikukwasa kupwa ni usepa upema ni Yehova ni kupwa nawa ni uwahililo wamwenemwene.—Samu 1:1-3.

16. Kuchi mutuhasa kuyuka nyi twasa tachi hanga tupwe alongeshi apema?

¹⁶ Chuma chimwe chize chakutunehena uwahililo unji haliapwila, chili kulongesa atu anyingike Yehova. Mu chifuchi chaha, mutukapwa ni chiseke chinji ha kulongesa atu anji. Kashika, tunungenu ni kulihulumba ni atu waze akutupanjika, kujikijila ha Liji lia Zambi ni kulihulikila hali Yehova muze tunambujola sango jipema. Nyi twachilinga, mutuhasa kupwa alongeshi apema mu mulimo wa kwambujola.