Ana je Kali “Chihinga cha kuli Yehova”

Yika wakunyonga muze wakwivwa liji “chihinga”? Yena muhasa kunyonga ha mbongo, yihela, mazuwo, hanji yuma yikwo yize nwakulemesa chinji mu usoko wenu ha miaka yinji. Chipwe ngwe wanyonga ha chuma cheswacho, nihindu chihinga chili chuma chilemu chize watamba kufunga kanawa.

Mbimbiliya yakwamba ngwo, ana “kapwa chihinga cha kuli Yehova.” (Samu 127:3) Yisemi Akwa-Kristu kakumona ana jo ngwe chihinga chilemu chize atambwile kuli Tato wa mu malilu. Kashika ayo akusa tachi hanga afunge ana jo ku musunya ni ku ufulielo.

Chaluyinda, hi yisemi eswe ko musono akumona ana jo ngwe chawana cha kuli Zambi. (Iza. 49:15; 2 Timo. 3:1-3) Yisemi kakuzanga kufunga kanawa ana jo, alioze mumu lia yipikalo, amwe keshi kuhasa kuchilinga. Yipikalo yika yisemi akupalika? Yika Yehova anashimbwila hali yisemi? Chikwo nawa, kuchi yisemi mahasa kulela ana jo hanga mawahilila?

YIPIKALO

Kwashinjila kuli asoko ni atu akwo. Ku yihela yimwe, atu waze akwete ana anji kakwalemesa kuli akwo. Kashika waze alimbata, kakwashinjila kuli asoko ni enyembo jo hanga apwe ni ana anji chipwe ngwe keshi kuhasa kwalele eswe.
Kulipikala ni mwono wa kulutwe. Ku yihela yimwe, twanuke anji kakufwa mumu lia katoma ni yikola yikwo, hanji mumu lia kuhona uukiso. Kashika amwe akusema ana anji mumu ngwo hakachi ko, hanji amwe maheta ku ukulwana. Akwo nawa, kakusema ana anji hanga akaafunge muze makashinakaja. Yino yakulingiwa chinji mu yifuchi yize manguvulu keshi kukwasa tushinakaji.
Kutesa ana waze mapwa no. Ku yihela yinji, waze alimbata katwamine ni ukwaso unji wa chize mahasa kukinda ufumba. Amwe kakwete uhashi wa kulanda yitumbo yize muyihasa kukinda pwo kupwa kafumba. Alioze kakwivwa woma mumu lia kapinda yoze mahasa kupwako nawa kakunyonga ngwo, hanji kulutwe kechi kapwa nawa ni ana. Akwo kakunyonga ngwo chipwe ngwe manwa yitumbo yacho, nihindu mahasa kupwa kafumba. Eka nawa, keshi kuhasa kulanda yitumbo yacho mumu lia ndando yinji.a

YIKA YEHOVA ANASHIMBWILA HALI YISEMI?

Asoko amwe kanawahilila ha kupwa hamuwika mu parque. Chisemi wa lunga, kanapanjika kanawa mwanenyi wa pwo, muze mukwo-pwo anase konda ni mwano wa lunga. — Pwenu ni kupalikisa mashimbu ni hita mwana

Kulela ana. Yehova kahanyine kuli yisemi chiteli cha kulela ana ku musunya muze achili twanuke. Yehova kakushimbwila hanga yisemi akalakale chinji hanga ana jo apwe ni kulia, mazalo ni haze matwama. Yehova kanashimbwila hanga yisemi afumbe ano. Kashika, yisemi Akwa-Kristu keshi kutwala ana jo alilongesele kusuku, alioze kakutwama no hanga alilongese ndo muze makola. Yisemi kakusa tachi ahone kulengulula hita mwana yoze ali nenyi hanga ano alivwe ngwo kakwafunga ni kwazanga. Alioze chili chilemu kwiuluka nawa ngwetu, Yehova kapwa mutu mwashi. Iye keshi kushimbwila ngwo yisemi ndo apwe pichi. Ngwe chize tunanyingika, Yehova kasakwile lunga ni pwo waze apwile yiswale hanga alele Mwanenyi yoze azanga chinji. Alioze, ayo te kakukalakala chinji.—Mateu 13:55, 56; Luka 2:24.

Shimbi ya Mbimbiliya: “Kwamba pundu, nyi mutu keshi kuhana kuli atu jenyi yize anahono, chipi-chipi kuli asoko jenyi, iye hanalikale ufulielo, kanapiha chikolo kuhiana yoze keshi kufuliela.”—1 Timo. 5:8.

Yehova kananyingika ngwenyi, yisemi mahasa kufupa ukwaso muze anayi ni kushinakajiwa. Jila yimwe yize ana mahasa kusolwelamo ngwo kakulemesa yisemi jo, yili ha kwafunga muze mashinakajiwa. (Kutuhu. 20:12; 1 Timo. 5:4) Alioze, Yehova kakuwahilila muze yisemi manyonga ha chize ayo mafunga ana jo hi ha chize ko ana mafunga yisemi jo.—2 Kori. 12:14.

Longesa ana je hakutwala kuli Yehova. Yisemi Akwa-Kristu kali nawa ni chiteli cha kulongesa ana jo kuzanga Yehova ni kumuwayila. Kuli Yehova, chili chilemu yisemi kulongesa kuli ana jo hakutwala kuli iye.—Shimbi 6:6, 7.

Shimbi ya Mbimbiliya: ‘Nungenu ni kulela ana jenu mu fumbo ni mu shimbi ja Yehova.’—Efwe. 6:4.

YEHOVA KANAZANGE KUNUKWASA NULELE ANA WAZE MAWAHILILA

Lunga ni mukwo-pwo kanahanjika muze ali ku zuwo lio. Mbimbiliya yili yakwazulula ha mesa. — Liangenu kulitesa unji wa ana waze munupwa no

Tesenu ana waze munukapwa no kulutwe. Nyi yenu nunazange kupwa ni ana, nyongenu kanawa ha uhashi uze nuli nawo. Shina nyi nwapwa ni ana anji munuhasa kwalisa, kwajika, kwafumba ni kwatwala ku shikola? Litesenu ana waze munupwa no hanga nuhase kwalela ngwe chize Yehova akushimbwila. Kwamba umwenemwene, Yehova kananyingika ngwenyi, yetu kutushi kuhasa kulinga yuma yeswe ngwe chize twatesele. (Chilu. 9:11) Alioze, iye mawahisa tachi jize nwakusa hanga nupwe yisemi apema.

Shimbi ja Mbimbiliya: “Manyonga a yipalakata katwala ku kulumbama wika; alioze manyonga a mukwa kulipupula katwala ku kuhona wika.”—Yishi. 21:5.

“Iya hakachi kenu, nyi kanazange kutunga kaposhi, chitangu kechi kutwama hanga alule ndando, amone nyi kali ni mbongo jinakumbana ja kumuhwisa, nyi ka?”—Luka 14:28.

Senu Yehova ha chihela chitangu mu usoko wenu. Kuwayila Yehova chatamba kupwa chuma chitangu mu usoko wenu. Nyi nuli ni ana, senu mashimbu hanga nukwase mwana ni mwana azange Yehova. Akwasenu hanga apanjike kanawa yize akulongesa ha kukunguluka. Pwenu ni kulinga uwayilo wa mu usoko poso jeswe. Longesenu ana jenu chize mambujola. Kanda nuhana chiteli chenu cha kulela ana kuli umwe mwanenu yoze hakola hanji kuli umwe usoko wenu mukwo. Kukwasa ana hanga azange Yehova chakumbata mashimbu ni tachi, alioze munuwahilila chinji, muze munumona ana jenu kanawayila Yehova ni chiseke.

Shimbi ya Mbimbiliya: “Kukushi chuma chikwo muchingwaha uwahililo ngwe chino: kwivwa ngwo ana jami kananungu ni kwenda mu umwenemwene.”—3 Yoa. 4.b

Fulielenu muli Yehova. Nyi nuli ni ana, hanji nunanyongo kupwa ni ana, pwenu ni shindakenyo ngwenu yize Yehova anashimbwila hali yenu yili yilemu chinji kuhiana kukaula yako ni mianda ya kuze nwatwama.

Yizulie: 1. Yisemi kanatwama ni mwano wa lunga ha kukunguluka. Mwano kanazundula kwoko hanga akumbulule. 2. Asoko amwe kanakalakala hamuwika mu munda. Chisemi wa lunga kanambujola ni mwanenyi wa pwo, mukwo-pwo kanambujola ni ano aali a twanuke. — Kufunga ana ku ufulielo chakufupa tachi ni mashimbu

Nyi munukwata chiyulo cha kupwa ni ana akehe, pwenu ni shindakenyo ngwenu Yehova manunga ni kunufunga chipwe muze munupwa tushinakaji. Ehukenu kumona ana jenu ngwe ufunge muze munukapwa tushinakaji. Kanda nwivwa woma ngwo makanwehuka. Yehova kanalakenya kunufunga, mashimbu eswe mamanununa chilakenyo chenyi.—Yoshu. 23:14.

Shimbi ja Mbimbiliya: “Fuliela Yehova ni mbunge ye yeswe; kanda ukajikijila ha malinjekela ja yena mwene. Ukamutayize mu yilinga ye yeswe mba iye makalulamisa majila je.”—Yishi. 3:5, 6.

“Napwile mukweze, haliapwila nguli mukulwana, hindu chamwene mukwa ululi kanamwehuka, hanji munyachi wenyi muufupafupa ya kulia.”—Samu 37:25.

“Kashika, nungenu ni kufupa chitangu Wanangana wa Zambi ni ululi wenyi, mba yuma yikwo yeswe kumakanuwezelayo.”—Mateu 6:33.

Ana kali yawana yilemu yize Yehova ahanyine kuli yisemi. Yehova kakuwahilila chinji muze akumona yisemi Akwa-Kristu mamanununa kanawa chiteli chize ahele cha kufunga kanawa ana jo. Ayo kakutesa ana waze mapwa no, kakulemesa shimbi ja Zambi kuhiana mianda ya kuze atwama. Chikwo nawa, kakusolola kuli ana jo ngwo kakwazanga ha kwaha yize anafupu ku musunya, ku manyonga ni ku ufulielo. Ha kulinga chino, ayo kakusolola ngwo ana jo kali alemu kuli ayo nawa kakwamona ngwe “chihinga cha kuli Yehova.”

Ayo Kakuwahilila ni Chiyulo Cho

Nyi yisemi masakula kupwa ni ana akehe, shina mamona lamba? Chihula chino chakupinjisa yisemi anji waze atwama kuze kuli kapinda wa mbongo. Tala yize akwamba amwe miata a mu usoko Akwa-Kristu waze atwama ku yihela yacho.

Shina hanakushinjila kama hanga upwe ni ana anji?

“Ewa, chipwe lume kuli amwe mandumbu a mu chikungulwila. Amwe waze alimbata katwambile ngwo, ‘Mumu liaka yenu nuli ni mwana umuwika?’ Muno mu África, nyi uli ni mwana umuwika, chili ngwe kuushi ni mwana niumwe. Mba nyi uli ni ana aali, chili ngwe uli ni mwana umuwika. Chocho yitupwa ni mwanetu wamuchiali wa pwo. Chipwe chocho, yanunga ni kutushinjila hanga tununge ni kusema.”—Jeremias

Shina wapalikile mu umwe kapinda ku musunya hanji ku ufulielo mumu lia kupwa nyi ana akehe?

“Amu kutushi ni ana anji, yami ni mukwetu pwo tuli ni uhashi wa kwafunga ku musunya ni ku spiritu. Yami nakolelele mu umwe usoko unene, nawa nguneuluka ngwami chapwile chikalu kuli tata ni mama kutwaha yeswe yize te twakufupa, hanji kutusa ku shikola yetu eswe hanga tulilongese.”—Jeremias

Kuchi ana je akulivwa mumu lia yiyulo yize nwakwachile?

“Yisemi waze akwete ana anji, kanji-kanji kakupinda ha kwalela kanawa eswe. Alioze ana jetu kakuwahilila mumu twakwafunga kanawa.”—Filipe

“Muze te anayi ni kukola, ana jetu te kakuwahilila mumu twafungile kanawa. Ku zuwo lietu, te twakusanyika mandumbu a mapwo ni a malunga waze ajama ku ufulielo, waze te akutukolweza kutesa kulinga yuma ya ku ufulielo. Musono, muze twakutala kuli ana jetu twakumona ngwetu, twalingile chuma chipema.”—Carlos.

Yika wayuka ha chiyulo wakwachile cha kupwa ni ana akehe?

Mumu lia chiyulo chacho, yetu twahashile kufunga ana jetu ku musunya. Natokesele mulimo uze te akungufweta kanawa ha miaka yitatu kunyima. Alioze amu usoko wetu wapwile ukehe, twahashile kulihumikiza muze yuma yalumukine mumu yetu te kutushi kufupa mbongo jinji mba tupwe ni yuma yize te twakufupa ha tangwa ni tangwa.”—Jeremias

“Chiyulo chize twakwachile, chatukwashile kuhana kuli ana jetu yize anafupu ku musunya ni ku ufulielo. Chikwo nawa, te twakuhasa kulinga wenyi hanga tuye ku yihela kuze anafupu ukwaso wa akwa-kwambujola. Mumu lia kupwa ni usoko ukehe, te twakupwa ni mashimbu akutwama hamuwika ngwe usoko ni kufunga kanawa ana jetu. Musono, ana jetu eswe kakuwayila Yehova. Chikwo nawa, kakulihana hanga alingile Yehova mu majila eka ni eka.”—Lenadi

Yika yena unazange kulweza kuli yisemi ni akwenu?

“Namwene ngwami, maliji ali ha Samu 34:10b kali amwenemwene anambe ngwo: ‘Waze akufupa Yehova kechi kahona nichimwe chuma chipema.’ Yehova kakutwaha yeswe yize twakufupa.”—Rafael

a Waze alimbata e ali ni chiteli cha kusakula ha mashimbu aka mapwa ni ana, ni kusakula nawa nyi pwo manwa yitumbo yize yakukinda ufumba nyi ka. Niumwe katambile kwapatwila ha chiyulo chize ayo makwata. (Roma 14:4, 10-13) Chikwo nawa, Akwa-Kristu waze alimbata katamba kwiwuluka chiyulo chize chili ha 1 A-Korindu 7:3-5.

b Ha versu yino liji “ana,” linatale hali amwe tumbaji waze Yoano alongesele umwenemwene. Alioze yisemi nawa mahasa kuwahilila ha kumona ana jo mawayila Yehova.