Yihula ya Waze Akutanga Mikanda Yetu

Tangwa lika mavungu matwa mutambi wa “Sambukila ni kutwama kawape!”?

Ngwe chize tunakamona ha “Yihula ya Waze Akutanga Mikanda Yetu” ha Kaposhi wa Kutalilaa wapalika, kwasala hakehe Yehova masa mu mbunge lia “kumi lia mbinga,” (mawanangana eswe) “nyonga” limuwika lia kuhana ndundo jo kuli “ngongo muchila” hanji ngwetu Kulinunga cha Mavungu (Nações Unidas). Ngongo kakumuvuluka nawa ngwo, “kaponya wa ngongo.” (Uso. 13:14, 15; 17:3, 16, 17) Hachino, “kumi lia mbinga” ni ngongo makalichinga hanga akanongese uwayilo wa mahuza hashi heswe. Ayo makatwa mutambi kuli mavungu ngwo, “Sambukila ni kutwama kawape!”b Shina ayo makatwa mutambi uno shimbu kanda nyi muze makanongesa uwayilo wa mahuza?—1 Tesa. 5:3.

Kumbululo lili ngwo kutwanyingikine tangwa lize makatwa mutambi wa “sambukila ni kutwama kawape.” Nyi te tunanyingika kumbululo liacho, kachi te kutwafupiwile kununga ni kulawola. Yesu kalweleze tumbaji twenyi ha yisuho yinji ngwenyi, “Nungenu ni kulawola.” (Mateu 24:42; 25:13; 26:41) Tutalenu yize Yehova aliangile kwamba, kupalikila muli postolo Paulu.

Paulu kasonekene ngwenyi: “Muze makamba ngwo: ‘Sambukila ni kutwama kawape!’ susumuku kwonwona muchiza hali ayo.” (1 Tesa. 5:2, 3) Kanji-kanji, mikanda yetu yapwile ni kulumbununa maliji wano a Paulu ngwo: Mutambi wa “sambukila ni kutwama kawape,” makautwa muze hikwasala hakehe hanga luyinda munene aputuke. Chikwo nawa ngwo, luyinda munene makaputuka ni unongeso wa Babilonia Yinene hanji ngwetu, uwayilo weswe wa mahuza. Twapwile nawa ni kwamba ngwetu, mutambi uno muupwa ngwe chilayi chize muchisolola ngwo luyinda munene himaputuka.

Hanyima lia kuhengwola kanawa chikuma chino hitumona ngwetu, lino lili limwe nyonga wika. Nyonga likwo lili ngwo, mutambi wa sambukila ni kutwama kawape mahasa kuutwa hanyima lia kunongesa uwayilo weswe wa mahuza. Mumu liaka? Tutalenu yimwe yikuma.

Kulinjisa cha uwayilo wa mahuza mu jita. Mbimbiliya yakwamba ngwo: “Muli yena chikoi munene” hanji ngwo Babilonia Yinene, “awanyinemo manyinga ja . . . eswe waze ashihile hano hashi.” (Uso. 17:1, 5; 18:24) Sango ja ku mwono wa atu jakusolola ngwo, uwayilo wa mahuza wakulinjisa mu jita. Kanji-kanji nawa, we wakuneha yuma ya vunda. Wakwokesa jita ni upupilo, kashika kuushi kuhasa kuneha sambukila ni kutwama kawape. Hachino, mutuhasa kulihula ngwetu: Shina mutambi wa “sambukila ni kutwama kawape” makautwa hanyima lia kunongesa Babilonia Yinene? Muchihasa kupwa. Alioze, kutushi ni shindakenyo.

Yika muyikalingiwa hanyima lia kutwa mutambi wa “sambukila ni kutwama kawape”? Paulu kambile ngwenyi: “Susumuku kwonwona muchiza hali ayo.” (1 Tesa. 5:3) Nota mu Mbimbiliya ya estudo ha versu yino, yinambe ngwo: Paulu kambile ngwenyi, “kukuchi kapalika mashimbu anji hakachi ka mutambi wa sambukila ni kutwama kawape, ni unongeso wa waze makatwa mutambi wacho. Unongeso wo muukapwa wa susumuku, kechi kamona chize machina.” Kashika muchihasa kupwa ngwe, miata a mafwefwe a hashi heswe, makatwa mutambi wa “sambukila ni kutwama kawape” hanyima lia kunongesa uwayilo wa mahuza, mba susumuku mukwiza unongeso wo.

Yika atu ja Yehova makalinga muze yino muyikalingiwa? Paulu kambile ngwenyi: “Mandumbu, yenu kunushi mu milima mba tangwa liacho likeze hali yenu, ngwe chize pangu liakwiza susumuku hali mwiji.” (1 Tesa. 5:4) Kashika, nyi mutambi wa sambukila ni kutwama kawape makautwa hanyima lia kunongesa uwayilo wa mahuza, atu ja Yehova makanyingika ngwo, unongeso wa manguvulu a mafwefwe hiwakundama. Hakutwala kuli manguvulu a mafwefwe waze makatwa mutambi wa “sambukila ni kutwama kawape,” ayo makalivwa ngwo yuma yeswe mba hiyawaha. Hohene unongeso wo muukeza ngwe mwiji hanji ngwetu, susumuku chakuhona kunyingika.

Kashika, yika tunanyingika? Tunanyingika ngwetu, kwasala hakehe “kumi lia mbinga” ni ngongo makanongesa uwayilo wa mahuza. Chino muchikasolola ngwo, luyinda munene haputuka. Tunanyingika nawa ngwetu, ha shimbu limwe makatwa mutambi wa “sambukila ni kutwama kawape.” Mashimbu aka yino muyikalingiwa? Twahanjika hakutwala ku manyonga aali. Nyonga litangu ngwo: Mutambi uno kota makautwa shimbu kanda achinongesa uwayilo wa mahuza. Nyonga liamuchiali lili ngwo, mutambi uno kota makautwa hanyima lia kunongesa uwayilo wa mahuza. Amu kutushi ni shindakenyo, twatamba kushimbwila hanga tumone chize yuma muyikalingiwa. Uprofeto wa mu Mbimbiliya kanji-kanji, wakutulumbunuka kanawa muze unamanunuka hanji muze hiwamanunuka lume.—Tesa nawa ni Yoa. 12:16.

Chuma chilemu haliapwila hi kulihulikilako ha shimbu lize makatwa mutambi wa sambukila ni kutwama kawape, alioze chili kununga ni kushishika kuli Yehova. Twatamba ‘kununga ni kulawola ni kunyonga kanawa,’ chakuhona kulihulikila chinji ha mutapu wa chize uprofeto muukamanunuka kulutwe lia matangwa.—1 Tesa. 5:6.