Yize Mulinga Muze Mukusoloka Kapinda Hanyima lia Kukupapachisa?

1-2. Yika twatamba kulinga hanga tulilulieke ha kapinda yoze mahasa kusoloka amu tuli mu umwenemwene? Hana chilweza.

MUTUHASA kushimbwila kupwa ni yipikalo mu chifuchi chino cha Satana. Yesu katowezele tumbaji twenyi ngwenyi, “yitalingiso kumuyipwako lume.” (Mateu 18:7) Amu tunanyingika chikuma chino, twatamba kulilulieka mumu lia kapinda yoze mahasa kusoloka. Kapinda umwe mahasa kupwa kuhona kulivwashana ni mandumbu jetu.

² Tunyongenu ha chino. Atu ja Yehova kakwakolweza hanga alilulieke shimbu luyinda wa chisemewa kanda achilingiwa. Kuchi akuchilinga? Chitangu, kakufupa kunyingika ponde yize muyihasa kusoloka ku chihela kuze atwama. Chino chili chilemu kuchilinga, chipi-chipi nyi mutu kali mwaha ku chihela chacho. Hanyima lia kunyingika ponde yize muyihasa kusolokako, chili chilemu kutesa yize malinga ha kapinda yoze amonanga ngwo mahasa kusoloka. (Yishi. 21:5) Chizechene nawa, twatamba kulianga kunyingika kapinda yoze mahasa kusoloka amu tuli mu umwenemwene mba tulilulieke hanga kapinda wacho akahone kututungumuna. Nyi twalinga chino, kapinda wacho mutukamumona ngwe mukehe, chikwo nawa keshi kapihisa usepa wetu ni Yehova. (Samu 17:5) Haliapwila, tushimutwinenu ha kapinda mutatu yoze mahasa kusoloka ni chize mutuhasa kulilulieka ha kapinda ni kapinda.a

MUZE UMWE NDUMBU MAKULEMEKA KU MBUNGE

3. Kapinda muka mahasa kusoloka mu chikungulwila?

³ Shina unewuluka chisuho chitangu chize wayile ha chimwe kukunguluka ni kumona zango lize liatwama hakachi ka atu ja Yehova? Shina wanyongene ngwe wawana umwenemwene? (Yoa. 13:35; Kolo. 3:12) Blancab neye che anyongene. Chipwe chocho, hanyima lia kumupapachisa, kwalingiwile yimwe yize iye te keshi kushimbwila. Iye yamba ngwenyi: “Umwe ndumbu wa pwo kangwambile maliji akalu chinji, yingumona nawa ngwami, iye kapwile ni chako chakwambila akwo yuma yipi. Yami te chishi kushimbwila ngwami yuma yino muyilingiwa. Mumu nalilongesele ngwami, Yela ja Yehova kali atu waze akusa tachi hanga apwe ni sambukila ni kulisolwela zango.” Mandumbu jetu hi angunu ko. Alioze kakusa tachi hanga anunge ni kupemesa yitanga yo ya Ukristu. (Efwe. 4:23, 24; 1 Yoa. 1:8) Kashika ha mashimbu amwe, ayo mahasa kwamba hanji kulinga yuma yize muyikulemeka ku mbunge. (Tia. 3:8) Chaluyinda, amwe kakwecha kuwayila Yehova mumu lia kapinda wacho.

4. Yika muhasa kulinga haliapwila hanga ununge ni kuwayila Yehova, chipwe muze umwe ndumbu makuvwisa uli? (A-Efwesu 4:32)

⁴ Yika muhasa kulinga haliapwila hanga ununge kuwayila Yehova, chipwe muze umwe ndumbu makulemeka ku mbunge hanji makuvwisa uli? Pukuna ha chiyulo chili ha mukanda wa A-Efwesu 4:32. (Tanga.) Chikwo nawa, sako tachi hanga upwe ni yitanga yize anatongolaho. Nyi wasa tachi hanga upwe chimbovu ni kusolola keke, mwehuka kulipinjiesa ni akwenu. Pwako ni chako cha kukonekena akwenu muze makwamba hanji makulinga yuma yize muyikulemeka ku mbunge. Yika muyihasa kukukwasa kuchilinga? Nyonga ha yisuho yize yena wakwita hanga Yehova akonekene uhenge we ni chize iye akuchilinga chakuhona kwiwuluka nawa uhenge wacho. (Mateu 6:12) Nyi walinga chino, mulemesa chawana cha Yehova, nawa muchikukwasa kukonekena akwenu.

5. Chiyulo chika cha mu Mbimbiliya chize muchihasa kutukwasa muze umwe matulemeka ku mbunge? (Yishima 19:11) (Tala nawa yizulie.)

⁵ Tanga Yishima 19:11. Mbimbiliya yakwamba ngwo, nyi matulemeka ku mbunge, malinjekelac kakupwisa mutu makoke kutenuka. Chiyulo chino chakwashile Rhima, yoze achipapachisa ha yimwe miaka. Iye yamba ngwenyi: “Muze mandumbu akwamba hanji akulinga yuma yize kuyalitele, nakwiwuluka chisoneko cha Yishima 19:11. Nakunyonga ha chize wapwile mwono wo kunyima, ni kweseka kunyonga yize yaatwala hanga alinge hanji ambe yuma yacho. Nakweseka nawa kukalakala no mu munda. Kulinga chino, chakungukwasa kwanyingika kanawa.” Chino chili chiyulo chipema. Muchikukwasa kunyingika kanawa mandumbu je haliapwila. Nyi waanyingika kanawa, muchipwa chashi kwakonekena muze makwamba hanji makulinga yuma yize muyikulemeka ku mbunge.

6. Yika muyihasa kutukwasa kupwa masepa ja mandumbu jetu mu chikungulwila?

⁶ Yika nawa muhasa kulinga? Muze unase tachi hanga unyingike mandumbu, lihulikile ha yitanga yo yipema. (Tesa ni Yishima 10:12; Roma 12:10; Fwili. 2:2, 3) Tala chize yino yakwashile Mark, umwe ndumbu mwaha yoze achipapachisa. Muze iye aputukile kupalikisa mashimbu anji ni mandumbu a mu chikungulwila chenyi, iye yaputuka kumona tupalia two. Yika yakwashile Mark kuhona kutalinga mumu lia tupalia waze amwene? Yamba ngwenyi: “Namwene ngwami, tupalia waze mandumbu jetu akulinga, kali akehe nyi twatesa ni yuma yipi yize atu anji akulinga. Chocho yingukwata chiyulo chakuhona kulihulikila ha uhenge wa mandumbu. Chize haze, yinguputuka kulihulikila ha yitanga yo yipema.” Ni yena nyi wachilinga, mupwa ni masepa apema mu chikungulwila.

MUZE MUVWILA USONA YUMA YIZE WAHICHIKILE KUNYIMA

7. Yika muyihasa kututwala hanga tuputuke kuvwila usona yuma yize twechele kunyima?

⁷ Ha chisuho chitangu muze walilongesele umwenemwene, wawahililile chinji ha kuhichika chifuchi cha Satana. Kota wanyongene ngwe, kukushi mutu niumwe mahasa kuvwila usona chifuchi cha Satana. Alioze, muze wapalikile mu yeseko, yiuputuka kwiwuluka hanji kuvwila usona yuma yize wahichikile muze waputukile kuwayila Yehova. (Tesa ni Kwalula 11:4-6.) Ngwe chilweza, mandumbu amwe kechele milimo ya lufuma, yize te yakwambata mashimbu anji. Akwo kapwile ni masepa waze te azanga chinji, alioze yalihandununa muze aputukile kulilongesa Mbimbiliya. Eka nawa, kechele jimwe ndako ja luchisa, chipwe ngwe ndako jacho te jakwanehena chiseke. Achinyonga ha chinyengo chize te Yehova mapwa nacho, nyi te usepa wetu ni iye mukeketela mumu ngwo twahilukila yuma yize twechele kunyima shimbu te kanda tuchipwa masepa jenyi. Yika muyikukwasa kuhona kufunyina yuma yize wechele kunyima chipwe ngwe mukusoloka yipikalo?

8. Yika mutuhasa kulilongesa ha chilweza cha Apalahama ni Sara?

⁸ Mu Mbimbiliya, muli yilweza ya tuvumbi ashishika waze kachi atalile kunyima mumu lia kuvwila usona yuma yize ahichikile. Tutalenu chilweza cha Apalahama ni Sara. Tuvumbi wano ashishika, katayijile kuhichika mbonge yipema ya Ure hanga aye ni kutwama mu mambalaka, mumu kazangile kwononokena Yehova. (Hepre. 11:8, 9) Kwamba pundu, ayo kachi kanyongene ha mwono upema uze apwile nawo mu mbonge yacho. Alioze “nyi ayo kanungine ni kunyonga” hanji kuvwila usona yuma yize ahichikile kunyima, kachi kapwile mu cheseko cha kufunyina yuma yacho. Alioze, ayo yalihulikila ku yuma ya kulutwe lia matangwa.—Hepre. 11:15, 16.

9. Yika postolo Paulu alingile muze evwile sango jipema? (A-Fwilipu 3:7, 8, 13)

⁹ Postolo Paulu kalumwine yimwe ku mwono wenyi hanga awayile Yehova mu jila yalita. Ngwe chilweza, shimbu te kanda achipwa Mukwa-Kristu, iye kalilongesele shimbi ja A-Yunda ni umwe longeshi yoze te avumbika chinji avuluka ngwo Ngamaliele. (Yili. 22:3) Kwasalile hakehe wika hanga Paulu apwe tetekeli mulemu mu uwayilo wa A-Yunda. (Ngala. 1:13, 14) Alioze muze evwile sango jipema, iye yahichika yuma yeswe kunyima. Shina mwono wenyi wapwile washi? Ka, kuwakapwile washi. Kamulambile ha yisuho yinji, kamusele mu zuwo lia ususu ha yisuho yinji, chikwo nawa akwa-munyachi wenyi te keshi kumuzanga. (2 Kori. 11:23-26) Nyi kalihulikilile ha yipikalo yacho, ni kutesa chize te mwono wenyi wapwile muze te kanda achipwa Mukwa-Kristu, kachi kanyongene ngwenyi kapwile ni mwono upema. Alioze Paulu kakachilingile. Shimbu achilinge, iye yanunga ni kunyonga ha chiwape chinene chize apwile nacho chakupwa kambaji ka Yesu Kristu. Chikwo nawa, kapwile ni kushimbwila yuma yipema yize te mapwa nayo kulutwe lia matangwa. Paulu kapwile ni shindakenyo ngwenyi, kupwa Mukwa-Kristu chapwile chilemu chinji kuhiana chuma cheswacho chize ahichikile kunyima.—Tanga A-Fwilipu 3:7, 8, 13.

10. Ha yuma yika twatamba kupukuna mashimbu eswe? (Marku 10:29, 30) (Tala nawa yizulie.)

¹⁰ Yika twalilongesa? Twalilongesa ngwetu, nyi mutuputuka kunyonga ha yuma yize twahichikile kunyima shimbu te kanda tuchipwa Akwa-Kristu, twiulukenu nawa mumu liaka twechele yuma yacho. (Chilu. 7:10) Tutesenu yuma yize twahichikile ni yiwape yize tulinayo haliapwila mumu lia kupwa mu umwenemwene. Yetu tuli ni usepa ukolo ni Chitunda wa malilu ni hashi. (Yishi. 3:32) Tuli nawa ni usepa ni mandumbu a hashi heswe ni a mu chikungulwila chetu waze akutuzanga chinji. (Tanga Marku 10:29, 30.) Chikwo nawa, tunyongenu ha yuma yipema yize Yehova analakenya kutwaha kulutwe lia matangwa. (Iza. 65:21-23) Nyi mutunyonga ha yiwape yize twakupwa nayo mumu lia kulingila Yehova, muchipwa chashi kuvulama yuma yize twahichikile kunyima.

11. Yika mutuhasa kulilongesa ha chilweza cha Rosemary?

¹¹ Umwe ndumbu avuluka ngwo Rosemary, kamupapachishile muze apwile ni miaka 50. Tala yize alingile hanga ehuke kuvwila usona yuma yize ahichikile kunyima. Iye yamba ngwenyi: “Hatangu napwile ni kwivwa usona wa chiwanyino cha Natale, mumu kapwile mashimbu apema waze te twakupalikisa hamuwika ni asoko. Napwile ni kuwahilila ha kuhana yawana kuli atu waze nazanga. Te nakwivwa kuwaha ha kumona twanuke majingilika mutondo wa chiwanyino cha Natale ni kwamona mawahilila muze akwazulula yawana yo.” Yika yamukwashile? Rosemary yamba ngwenyi: “Nawana mutapu uze muungukwasa kuhona kuvwila usona chiwanyino cha Natale. Ha mwaka ni mwaka, nakukunga asoko jami, nakwaha yawana ni kwalweza ngwo nakwazanga.” Rosemary kapwile ni kapinda mukwo nawa. Iye yamba nawa ngwenyi: “Muze nalilongesele umwenemwene, masepa jami yanguchina. Mashimbu amwe te nakwavwila usona ni kulivwa ngwe, nguli ukawami.”d Yika yamukwashile? Iye kalingile umwe katalilo wa kwambujola ni mandumbu alisa. Yamba ngwenyi: “Kulinga chino, changukwasa kupwa ni masepa waze nakuzanga ni kulemesa chinji.” Yika mutuhasa kulilongesa ha chilweza chenyi? Mutuhasa kutokesa yuma yize te yakutuvwisa chiseke shimbu te kanda tuchinyingika umwenemwene. Alioze, mutuhasa kusalakanyisa yuma yacho ni yuma yikwo yipema. (Fwili. 4:8, 9) Twiulukenu nawa ngwetu, nyi twapwa ku sali lia Yehova mashimbu eswe, mutuyuka yuma yinji kuhiana yize twatokesele.

MUZE AKWENU MAHICHIKA YEHOVA

12. Kapinda muka mahasa kusoloka mu chikungulwila yoze mahasa kupwa mukalu chinji?

¹² Muze wapwile Chela cha Yehova, kota wawahililile chinji ha kwecha kulinga chihanda mu chifuchi chino chipi. Kota wazangile nawa kupwa mu chizavu cha waze akulongesa umwenemwene ni kusa tachi hanga alinge yuma yalita. (Iza. 65:14) Alioze ha mashimbu amwe muhasa kwivwa ngwo, mu chikungulwila amwe kalinga yuma yize kuyalitele. Chikwo nawa, akwo kakwachiza mu chikungulwila. (1 Kori. 5:13) Tala chize ndumbu Samar alivwile hamukunda wa yuma yino. Iye yamba ngwenyi: “Ha shimbu likehe wika muze te achingupapachisa, umwe mukulwana wa mu chikungulwila yalinga shili yinene, chocho yamuchiza mu chikungulwila. Yami te chishi kushimbwila ngwami, umwe mukulwana wa mu chikungulwila, mahasa kulinga shili, kuhichika Yehova ni chikungulwila. Mumu lia chino, nambile kutalinga.” Kwamba umwenemwene, twatamba kufuliela ngwetu, mandumbu jetu kakuzanga Yehova, chikwo nawa kanazange kushishika kuli iye. (1 Kori. 13:4, 7) Chipwe chocho, twatamba kutayiza umwenemwene uno: Hita mwaka, mandumbu anji kakwachiza mu chikungulwila. Kapinda wacho mahasa kupwa mukalu chinji kuli yena nyi ngwe sepa lie, usoko we hanji umwe yoze wakuvumbika, mecha kuwayila Yehova.

13. Nyi umwe mutu yoze wazanga mecha kuwayila Yehova, kuchi muhasa kulilulieka haliapwila hanga uhone kutalinga?

¹³ Nyi umwe yoze wazanga mecha kuwayila Yehova, kuchi muhasa kulilulieka haliapwila hanga uhone kutalinga? Nunga ni kukolesa usepa we ni Yehova. (Tia. 4:8) Iwuluka ngwe, mutu ni mutu kakwete usepa wenyi ni Yehova. Ngwe chilweza, chipwe ngwe twakuwayila Yehova hamwe ni usoko wetu ni chikungulwila, nihindu twatamba kupwa ni chako cha kulemba ni kutanga Mbimbiliya ukawetu.—Samu 1:2; 62:8.

14. Yika mutuhasa kulilongesa ha chilweza cha postolo Petulu? (Yoano 6:66-68)

¹⁴ Mutuhasa nawa kulilongesa yimwe ha yize postolo Petulu alingile muze tumbaji anji echele kukaula Yesu. Ha shimbu liacho, Petulu kota kayambashanyine. Alioze tala yize ambile kulita ni maliji ali ha mukanda wa Yoano 6:66-68. (Tanga.) Shimbu alihulikile ha yize akwo te analingi, iye yalihulikila ha umwenemwene uze Yesu amulongesele. Chino, chakwashile Petulu kuhona kutalinga. Ni musono nawa, yitanga ya akwetu kuyatambile kwalumuna umwenemwene uze twakuwana ni ukwaso wa ululikiso wa Zambi. Tunungenu ni kulikwachilila ha umwenemwene wacho. Samar, yoze twatongola helu yamba ngwenyi: “Mashimbu eswe nakwiwuluka ngwami, nyi mutu umuwika masolola yitanga yipi, kuchalumbunukine ngwo chikungulwila cheswe hanji ululikiso weswe uli ni yitanga yacho. Chikwo nawa, kuchalumbunukine ngwo, ni Yehova kakwete yitanga yacho.”

15. Yika walilongesa ha chilweza cha Emily?

¹⁵ Tutalenu chilweza cha Emily. Ha kupalika cha poso yimuwika muze amupapachishile, naye yahichika usoko nawa yamuchiza mu chikungulwila. Emily yamba ngwenyi: “Te kanda nguchinyonga kama ngwo yino muyiza kalingiwa. Yono mwe kapinda munene nguli nenyi, nawa nakuvwila mama usona wunji.” Yika yakwashile Emily? Iye yamba ngwenyi: “Kuchishi ukawami. Kuchishi wika ni ukwaso wa tata, alioze nguli nawa ni ukwaso wa mandumbu a mu chikungulwila waze ali ngwe asoko jami. Mutu ni mutu kali ni kapinda wenyi. Kashika chili chilemu kuzanga mandumbu jetu ni kulitakamisa umwe ni mukwo.” (1 Petu. 5:9) Kanda tushimbwila ndo haze mukusolokela kapinda, mba tukolese usepa wetu ni mandumbu. Kukatuka haliapwila, tunungenu ni kukolesa usepa ni mandumbu jetu. Nyi twachilinga, chipwe ngwe mukulingiwa chuma cheswacho, nihindu kutuchi kulivwa ukawetu.

16. Yika twatamba kwiwuluka? (Tala nawa chizulie.)

¹⁶ Iwuluka nawa ngwe, Yehova kakufumba waze iye akuzanga. (Hepre. 12:6) Iye kanazange hanga eswe waze achijile mu chikungulwila afune kuli iye. (2 Petu. 3:9) Kashika, muhasa kupwa ni shindakenyo ngwe, nyi mutu yoze wazanga mamuchiza mu chikungulwila, makulwana a mu chikungulwila malinga yeswe yize mahasa hanga amukwase kufuna kuli Yehova.—2 Timo. 2:24, 25.

17. Shindakenyo yika twatamba kupwa nayo?

¹⁷ Twamona kapinda mutatu yoze mahasa kusoloka hanyima lia kukupapachisa. Chipwe chocho, yena muhasa kununga ni kuwayila Yehova ni ushishiko. Kuli yuma yinji yize muhasa kulinga hanga ulilulieke. Mashimbu eswe iwuluka ngwe, Yehova kakukukwasa nawa manunga ni kukukwasa hanga ushishike kuli iye. (1 Petu. 5:10) Makwaha tachi jize mufupa hanga ununge ni kunyongonona mu yipikalo. Nyi wanunga ni kutayiza ukwaso wa Yehova, mununga ni kukundama kuli iye chipwe ngwe mukusoloka kapinda mweswawo.—Samu 119:165; Roma 8:38, 39.