Nunga ni Kusa Tachi Hanga Akupapachise

1. (a) Yika twakuyuka hanyima lia kutupapachisa? (b) Yika mutumona ha mutwe uno?

Shina hiunalihana kuli Yehova ni kukupapachisa? Nyi chenacho, yena wechile kuli Yehova hanga akonekene shili ye ni kukutayiza hanga umuwayile ngwe chize akulinga tuvumbi twenyi akwo. (1 Petu. 3:21) Chikwo nawa, muze wachilingile wahichikile chilweza chipema kuli waze kanda achapapachisa. Yena wakwachile chiyulo chipema chinji. Mba yika mutwamba hali waze kanda achipapachisa? Tuli ni shindakenyo ngwetu, nwakuzanga Yehova nawa nunazange kulinga upale wenyi. Nunanyingika ngwenu, upapachiso uli ulemu hanga Yehova akonekene shili yenu ni kupwa ni utayizo wenyi. (Yili. 2:38-40) Alioze hanji nunachikakajana. Yika muyihasa kunukwasa? Ha mutwe uno, mutumonaho: (1) Mumu liaka amwe akwivwa woma wa kwapapachisa? (2) Mumu liaka chili kusolola mana kwiwuluka ngwo songo linakundama? (3) Mumu liaka chili chilemu kwalumuna yimwe ku mwono we hanga akupapachise ni kawashi?

MUMU LIAKA AMWE AKWIVWA WOMA WA KWAPAPACHISA?

2. Mumu liaka atu amwe akwivwa woma wa kulihana hanga aapapachise?

² Amwe keshi kuzanga hanga aapapachise mumu lia woma. Ngwe chilweza, chipwe ngwe kakuzanga kuwayila Yehova, nihindu ayo kakwivwa woma ngwo kechi keza kapwa atu apema waze mavwisa Yehova kuwaha. Nyi che wakulivwa, hengwola jimwe versu ja mu Mbimbiliya jize mujikwaha shindakenyo ngwo, Yehova keshi kushimbwila ungunu hali yena. Chikwo nawa, kakuwahilila ni tachi jize wakusa hanga umuvwise kuwaha. (Samu 103:13, 14; Kolo. 3:23) Nyi unevu woma ngwo akwenu makuhungumiona muze makupapachisa, eta ukwaso kuli Yehova hanga ulivwe ngwe chize mukwa kusoneka Samu alivwile muze ambile ngwenyi: “Yehova kwali ku sali lia yami, chichi kwivwa woma. Atu yika mangulinga?”—Samu 118:6.

3. Yika muyihasa kukwika amwe kulihana hanga aapapachise? (Tala nawa chizulie ha chifukilo.)

³ Amwe waze akuzanga Yehova kakukakajana kwapapachisa mumu kakunyonga ngwo, keshi ni yinyingi yinji hakutwala kuli Yehova ni Mbimbiliya. Shina watamba kunyingika yuma yeswe mba akupapachise? Tutalenu chimwe chilweza cha mu Mbimbiliya. Ha ufuku umwe, muze Yehova anehene umwe munyiko hanga atusule Paulu ni Saila mu zuwo lia ususu, ha shimbu liacho, ayo yahana uchela kuli kaselo wa zuwo lia ususu ni usoko wenyi. Chinasoloka ngwe, lunga wacho kanyingikine ngwenyi Zambi mwe walingile chikomokeso chacho hanga atusule tuvumbi twenyi mu zuwo lia ususu. Chikwo nawa, ayo kalilongesele yikuma yilemu ha ufuku wacho. Mumu lia yuma yize alilongesele ha ufuku umuwika, hazehene yalihana ni ‘kwapapachisa chakuhona kushimbwila.’ (Yili. 16:25-33) Nyi unanyingika Yehova, wakumuzanga ni mbunge yeswe, unanyingika malongeso atangu a mu Mbimbiliya, hiwalikonyeka ku shili ye, nawa unazange kutwama kulita ni shimbi jenyi, yena muhasa kulihana hanga akupapachise.—Marku 12:30.

4. Yuma yika amwe akunyonga yize yakwakwika kulihana hanga aapapachise? (Tala nawa chizulie.)

⁴ Amwe kakuzanga kwalumuna mwono wo ni kulihana kuli Yehova hanga aapapachise. Alioze kakunyonga ngwo, chili chikalu chinji kuchilinga. Kwamba pundu, chili chilemu kunyonga kanawa ha chize chiyulo chacho muchikwata ku mwono we. (Luka 14:27-30) Amwe kakunyonga chinji ha yuma yize atamba kwecha mba alingile Zambi. Candace, yoze wanyingikine umwenemwene chize ku wanuke, neye che anyongene. Muze aputukile kulilongesa Mbimbiliya, iye te hakola. Yamba ngwenyi: “Yami te ngunanyingika yize natamba kulinga mba nguvwise Yehova kuwaha. Alioze napwile ni kukakajana mumu napwile ni kuzanga yuma ya hashi chipwe ngwe ngunanyingika ngwami, kuyishi kuvwisa Yehova kuwaha. Nanyingikine ngwami muchipwa chikalu kwecha yuma yacho.” Amwe kakunyonga ngwo, kukaula shimbi ja Yehova chili chikalu. Ayo kakwivwa woma ngwo hanyima lia kwapapachisa, mahasa kulinga shili yinene nawa maachiza mu chikungulwila. Nyi yuma yino ye yakukukwika hanga akupapachise, yika muhasa kulinga?

5. Nyi ngwe unayambashana kulihana hanga akupapachise, mumu liaka watamba kunyonga kanawa ha chikuma chacho? (Mateu 13:44-46)

⁵ Muze tunazange kulanda chimwe chuma, kutushi kulihulikila wika ha ndando ya chuma chacho. Alioze twakulihulikila nawa ha ulemu wa chuma chacho. Yetu kutushi kuyambashana kulanda chuma chacho nyi twamona ngwetu, chuma chacho muchituyukisa. Chizechene nawa, nyi tunazange kulihana hanga atupapachise, kutwatambile kulihulikila wika ha yuma yize mutwalumuna ku mwono wetu. Twatamba kunyonga nawa ha mwono upema uze mutuhasa kupwa nawo, mumu lia kupwa ni usepa upema ni Yehova. Yesu katele yishima yaali hanga atukwase kunyingika kanawa chikuma chino. (Tanga Mateu 13:44-46.) Ha yishima yeswe yaali, umwe lunga kalanjishile upite wenyi weswe hanga aye alande umwe kakanga mulemu yoze awanyine. Ni yena wawana chuma chilemu chinji, umwenemwene hakutwala ku Wanangana wa Zambi. Kashika, nyi unakakajana kwalumuna mwono we ni kulihana hanga akupapachise, nyonga kanawa ha yishima yize Yesu atele. Muhasa kulihula ngwe: ‘Shina nakufuliela ngwami, sango jipema ja Wanangana jili jilemu chinji? Shina nakulemesa usepa wami ni Yehova, kutalatala chami cha kutwama ku miaka yeswe ni usepa uze ngukwete ni mandumbu jami a zango?’ Kumbululo lieswalio muhana ha yihula yino, mulikukwasa kumona yize muhasa kulinga hanga ukwate chiyulo cha kulihana ni kukupapachisa.

6. Yika muyihasa kutukwasa kukaula yize tunalilongesa?

⁶ Ha chishima cha mukwa-kukuwa mbuto, Yesu kasolwele ngwenyi, mbunge ya mutu mwene muyihasa kumukinda kujama ku ufulielo. Chipwe chocho kasolwele nawa ngwenyi, atu waze ali ni “mbunge yitoma nawa yipema,” mahasa kutayiza sango ja Wanangana. (Luka 8:5-15) Nyi ngwe unalipikala mumu lia kuhona kupwa ni shindakenyo ngwe, muhasa kukaula yuma yize unalilongesa kanda uhonga. Yehova mahasa kukukwasa hanga uzange kumwononokena. Kashika, mwite mu yilemba hanga akukwase kuzanga yize unalilongesa ni kuyikaula ku mwono we.—Eze. 18:31; 36:26.

7-8. Yika yakukwika akweze amwe kulihana hanga aapapachise? (Tala nawa chizulie.)

⁷ Akweze amwe waze akuzanga Yehova, keshi kulihana hanga aapapachise mumu lia kulikata ni atu waze akwete yitanga yipi. Ngwe chilweza, alongeshi amwe kakulweza alongi jo ngwo, ‘kanda wecha hanga akwonge,’ sakula mwono weswawo yena mwene muzanga. Ayo kakwakolweza achilinge chipwe ngwe yuma yize akusakula kulinga yakulimika ni shimbi ja Yehova. Chikwo nawa, kakulinga yuma yacho chipwe ngwe kananyingika ngwo, muyihasa kwanehena lamba. (Samu 1:1, 2; Yishi. 7:1-5) Yena muhasa kwehuka kulinjisa mu ponde yacho ha kwimbulula chilweza cha mukwa-kwimba masamu yoze walwezele Yehova ngwenyi: “Malinjekela nguli no kuhiana alongeshi jami eswe, mumu shindakenyo je kupukuna chami.”—Samu 119:99.

⁸ Twakutambula sango jize jakusolola ngwo, yisemi amwe chakuhona kunyingika, kakukwika ana jo kulihana hanga aapapachise. Ayo kakulihulikila chinji ha kwatwala ku shikola ni ha mulimo uze anazange hanga ana jo akapwe nawo. Yisemi akwo nawa, keshi kukwasa ana jo kutesa yuma ya ku ufulielo. Shina yisemi je mahasa kukukwasa hanga ununge ni kukola ku ufulielo? Nyi chenacho, hanjika no hakutwala ku chikuma chacho. Pwako ni shindakenyo ngwe, chipwe ngwe uli ni miaka yeswayo, nihindu muhasa kupwa ni usepa upema ni Yehova.—Yishi. 20:11.

9. Yika muyihasa kutwala amwe kushimbula kulihana hanga aapapachise?

⁹ Amwe waze hanalilulieka hanga aapapachise, kakushimbwila hanga aapapachise ha tangwa limuwika ni masepa hanji asoko jo. Kwamba pundu, kushimbwila hanga atupapachise, hamwe ni atu waze twazanga hi chipi ko. Alioze, shina yino yatamba kukukwika lume kulihana hanga akupapachise haliapwila? Iwuluka ngwe, kulihana che kuli Zambi chatamba kupwa chiyulo cha yena mwene. Katambile kukupapachisa mumu lia yitanga ya akwenu.—Roma 14:12.

IWULUKA NGWE SONGO LINAKUNDAMA

10. Mumu liaka amwe mahasa kushimbula kukola ku ufulielo?

¹⁰ Kuchizako yikuma yize hitwatongola, amwe kakushimbula kwapapachisa ni kujama ku ufulielo, mumu kakunyonga ngwo songo lichili kusuku. Shina kunyonga chocho chili kusolola mana? Ka. Yesu katowezele tumbaji twenyi ngwenyi: “Liluliekenu, mumu Mwana-mutu makeza ha ola yize kunwanyongene.”—Luka 12:40.

11. Kulita ni Samu 119:60, muze twakulilongesa yuma yinji hakutwala kuli Yehova yika twakuzanga kulinga nawa mumu liaka?

¹¹ Yetu twakulihana kuli Yehova mumu lia zango lietu hali iye. Nyi twanyingika kanawa Yehova, mutumona ngwetu iye kakutuzanga chinji. Chino muchitutwala kulinga yuma yipema. (Tanga Samu 119:60.) Kambaji Tiangu, kasolwele ngwenyi, twatamba kwononokena shimbi ja Yehova kawashi-washi, mumu niumwe wa kuli yetu mahasa kunyingika yize muyilingiwa hamene wakuhi. Kutwanyingikine nyi mutupwa ni tangwa likwo lia ‘kulinga yuma yalita.’ Kashika, wano e mashimbu a kulinga yize tunanyingika ngwo yalita.—Tia. 4:13-17.

12. Yika mutuhasa kulilongesa ha chishima cha Yesu cha munda wa uva?

¹² Yika Yesu ambile hakutwala ku chishima cha munda wa uva? Shina iye kambile ngwenyi waze makalakala ha ola yimuwika matambula fweto yimuwika ni waze makalakala tangwa lia muundu? Ewa, Yesu che ambile. Alioze malunga jacho kakalakalile wika ha ola yimuwika. Ene yamba ngwo, “mumu niumwe mutu katusanyikine hanga tukalakale.” Malunga jacho te hi yileya ko, ayo kakakalakalile tangwa lieswe lia muundu, mumu ‘kukwakapwile mutu yoze te maha milimo.’ Hachino, muze aasanyikine ayo yaputuka kukalakala. (Mateu 20:1-16) Musono, Yesu kanatusanyika hanga tupwe tumbaji twenyi ni kulichinga nenyi mu mulimo wa kwambujola. Twatamba kulinga yize Yesu akutwita hanga tulinge ha shimbu lizeliene mutulilongesayo.

13. Yika twalilongesa ha chilweza cha pwo lia Lote?

¹³ Amwe kakushimbula kwalumuna mwono wo hanga awayile Yehova, mumu kakunyonga ngwo, mahasa kuchilinga muze hikwasala hakehe hanga songo lize. Alioze umwenemwene uli ngwo nyi washimbula chinji, muchikaliwa kwalumuna mwono we hanga uvwise Yehova kuwaha. Yesu kanyingikine chikuma chino kashika atowezele tumbaji twenyi ngwenyi: “Iwulukenu pwo lia Lote.” (Luka 17:31-35) Iye kanyingikine kanawa ngwenyi, upatwilo wa Zambi hakutwala ku mbonge ya Sondome ni Ngomora te hiwakundama. Alioze chakusoloka ngwe, chapwile chikalu chinji kuli iye kuvulama yuma yize ahichikile kunyima. (Uputu. 19:23-26) Chilweza chenyi chinatwiulula ngwo, chikolo cha ulamwino kuchichi kanunga chawashi ku miaka yeswe. Ha mashimbu alita Yehova makachiyika liakulu, kechi keza kachazulula nawa.—Luka 13:24, 25.

14. Mumu liaka watamba kulihulikila ha umanunuko wa uprofeto wa mu Mbimbiliya?

¹⁴ Yuma yize yinalingiwa tangwa ha tangwa, yinasolola pundu ngwo, uprofeto unatale ha songo lia chifuchi chino unamanunuka. Chipwe ngwe yuma yacho kanda yichikwata ha mwono we, nihindu kutala yize yinalingiwa ku yihela yinji, yatamba kukukwasa usenye kulutwe ni kuhana mwono we hanga akupapachise. Tala chize postolo Petulu atowezele Akwa-Kristu a ku sekulu yitangu ngwenyi, “laulenu” hanji ngwo kanyamenu. (1 Petu. 4:7) Chakusoloka ngwe, “songo” lize Petulu atongwele ha versu yino, linatale ha mashimbu a unongeso wa Yerusaleme ni tembele. Petulu kasonekenene Akwa-Kristu waze te atwama kusuku ni Yerusaleme. Kashika, unongeso wa mbonge te kuuchi kukwata ha mwono wo. (1 Petu. 1:1) Alioze kumona umanunuko wa uprofeto wacho, te muchokesa ujikijilo wo ha yilakenyo yikwo ya Yehova. Chizechene nawa, nyi walihulikila ha kumona chize uprofeto unamanunuka, mumona ngwe kuma songo linakundama. Chino muchikukwasa kwalumuna haze hanafupiwa ni kulihana hanga akupapachise.

15. Kuchi mutuhasa kwiwuluka tangwa lia Yehova mashimbu eswe? (2 Petulu 3:10-13)

¹⁵ Ha mukanda wenyi wamuchiali, Petulu kalumbunwine chize mutuhasa kulilulieka hakutwala ku tangwa lia Yehova, hanji ngwetu, songo lia chifuchi chino. Kuli Akwa-Kristu a ku sekulu yitangu, chasolokele ngwe tangwa liacho mulishimbula chinji mba lihete. Chipwe chocho Petulu yamba ngwenyi, ayo katamba “kwiwuluka mashimbu eswe” tangwa lia Yehova. (Tanga 2 Petulu 3:10-13.) Kuchi mutuhasa kwiwuluka tangwa liacho mashimbu eswe? Mutuhasa kuchilinga, ha kuhona kuvulama ngwo songo linakundama, ha kulilulieka hakutwala ku tangwa liacho, ha kupwa atu a “yitanga yisandu” ni ha kulinga milimo yize yakusolola ngwo twakuwayila Zambi. Yehova kakuwahilila chinji muze twakulinga yuma yize yakumuvwisa kuwaha. Alioze mawahilila chinji nawa ni mamona ngwo, yena walihana hanga akupapachise.

YIKA MUYUKA NYI WALIHANA HANGA AKUPAPACHISE HALIAPWILA?

16. Shimbu lika lialita lia kulihana hanga akupapachise? (2 A-Korindu 6:1, 2) (Tala nawa yizulie.)

¹⁶ Mashimbu apema a kwalumuna yimwe ku mwono we ni kulihana hanga akupapachise, enawa. (Tanga 2 A-Korindu 6:1, 2.) Unuku Ka-Etiopia, yoze Fwilipe ambulwilile kanyingikine ngwenyi, chili chilemu kulihana hanga amupapachise kawashi-washi. Muze anyingikine umwenemwene ni kupwa ni uhashi wa kulihana hanga amupapachise, iye kakanyongene kaali hanji kwamba ngwenyi: ‘Natamba kulilongesa yuma yinji mba angupapachise. Hanji kwamba nawa ngwenyi, mu jila amu tunayi mutuwana yihela yinji yize yili ni meya.’ Shimbu anyonge chocho, iye yahula Fwilipe ngwenyi: “Yika yinangukwika kungupapachisa?” (Yili. 8:26, 27, 35-39) Iye kali chilweza chipema kuli yetu. Hanyima lia kumupapachisa, “iye wanungine ni uwahililo mu jila yenyi.”

17. Kuchi Yehova mahasa kukukwasa?

¹⁷ Nyi ngwe unakakajana kukupapachisa, pwako ni shindakenyo ngwe, Yehova kanazange kukukwasa hanga upwe sepa lienyi. (Roma 2:4) Iye mahasa kukukwasa kukumba woma weswe uze wapwile ni kwivwa ni yitanga yipi ya akwenu yize te yakukukwika kusenya kulutwe. Muze makupapachisa, muhasa kupwa ni mbunge yitoma, muhasa kumona ngwe “yuma ya kunyima,” kuyishi nawa ni ulemu kuli yena. (Fwili. 3:8, 13) Muhasa kulihulikila nawa, ha yuma ya kulutwe hanji ngwetu ha yiwape yize Yehova analakenya kuli waze akuhana mwono wo kuli iye ni kwapapachisa.—Yili. 3:19.