13-19 ABRIL, 2026
MWASO 52 Kulihana kuli Zambi
Ulumbunwiso ni Ulemu wa Upapachiso
“Nukapwise atu . . . tumbaji, ni kwapapachisa”—MATEU 28:19.
YIZE MUTULILONGESA
Mutumona yize upapachiso unalumbunuka, ulemu uze ukwete ni chize akuulinga.
1. Kuchi tunanyingika ngwetu upapachiso uli ulemu chinji?
Twakuwahilila chinji muze mutu akumupapachisa. Akwa-Kristu atangu no kawahililile muze amwene atu anji maapapachisa ha Pentekoste 33 M.J. Ha kukunguluka chacho, postolo Petulu kahanjikile pande ni kulumbununa mumu liaka chili chilemu mutu kumupapachisa. (Yili. 2:38, 40, 41) Kulutwe, postolo Paulu yasoneka ngwenyi, “longeso lia upapachiso” linalingi chihanda ku ‘malongeso atangu hakutwala kuli Kristu.’ (Hepre. 6:1, 2) Kashika, longeso lia upapachiso lili hakachi ka malongeso alemu waze twakuwana mu Mbimbiliya. Ni yetu twatamba kunyingika kanawa ulumbunwiso wa upapachiso. Mumu liaka?
2. Mumu liaka chili chilemu kunyingika kanawa ulumbunwiso wa upapachiso?
2 Ngwe chizechene fundamentu yikolo yakujikijisa zuwo, ni yetu nyi mutunyingika kanawa ulumbunwiso ni ulemu wa upapachiso, chino muchitukwasa kukolesa ufulielo wetu. Kashika, chipwe ngwe hanakupapachisa ha miaka yinji hanji kanda achikupapachisa, nihindu chili chilemu kunyingika ulemu wa upapachiso. Ha mutwe uno, mutukumbululaho yihula yino: Yika upapachiso unalumbunuka? Kuchi upapachiso akuulinga? Mumu liaka akutupapachisa mu jina lia Tata, lia Mwana ni lia spiritu yisandu?
YIKA UPAPACHISO UNALUMBUNUKA NAWA MUMU LIAKA ULI ULEMU?
3. Yika upapachiso wakusolola?
3 Upapachiso wakusolola kuli eswe ngwo, yena watayiza umwenemwene hakutwala kuli Yehova Zambi ni Yesu Kristu. Wakusolola nawa ngwo, walikonyeka ku shili ni kwalumuna mwono we hanga ulingile Yehova. Upapachiso uli nawa chilayi chize chinasolola ngwo, unanyingika ngwe Zambi hanatongola Yesu hanga atulamwine ku shili ni kufwa. Chikwo nawa, yena musolola ngwo hiwalihana kuli Yehova hanji ngwetu, walemba kuli iye ni kumulakenya ngwe mumulingila hamwe ni ululikiso wenyi. Kulihana ni kukupapachisa, we uputukilo wa wenyi we ni Yehova uze muununga ku miaka yeswe.
4. Yika chinalumbunuka kunjisa mutu mweswe mu meya? (Tala nawa chizulie.)
4 Muze mutu anamupapachisa, kakumunjisa mweswe mu meya mba mamututulamo.a Chinapu ngwe kamufunda ni kumuhindwisa. (Tesa ni A-Kolosu 2:12.) Upapachiso uli chilayi chize chakusolola ngwo, walumuna mwono we. Mumu liaka tunambe chocho? Mumu muze makunjisa mu meya, musolola ngwe wecha yitanga yipi ni mwono ukulu. Muze makututula mu meya, yena musolola ngwe waputuka mwono waha, ni kulihulikila ha kulinga upale wa Zambi.
Muze mutu akumupapachisa, kakwecha mwono wenyi ukulu, maputuka mwono waha ni kulihulikila ha kulinga upale wa Zambi. (Tala paragrafu 4)
5. Kuchi tachi jize muusa hanga akupapachise jinalifu ni tachi jize Noa asele hanga atunge ulungu? (1 Petulu 3:18-21)
5 Tanga 1 Petulu 3:18-21. Mutuhasa kutesa tachi jize mutu akusa mba amupapachise, ni tachi jize Noa asele hanga atunge ulungu. Nyi waputuka kulilongesa Mbimbiliya, muhasa kunyonga ngwe muchipwa chikalu kwalumuna mwono we ni kulihana hanga akupapachise, ngwe chize chapwile chikalu kuli Noa kutunga ulungu. Shina watamba lume kusa tachi? Ewa, Noa neye che alingile. Zambi mwene mwe watesele chize ulungu atamba kuutunga. Chikwo nawa, Noa te katamba kukaula usongwelo weswe uze amuhele mba alilamwine. Mumu lia ufulielo uze apwile nawo ni ukwaso uze Yehova amuhele, iye yononoka, yatunga ulungu. Chizechene ngwe Noa, ni yena muhasa ‘kulinga yeswe yize Zambi makutuma.’—Uputu. 6:22.
6. Yika Petulu azangile kwamba muze ambile ngwenyi “upapachiso unanulamwina?”
6 Ha versu 21, postolo Petulu yasoneka ngwenyi: “upapachiso unanulamwina.” Alioze chino kuchalumbunukine ngwo, kukupapachisa wika che muchitwala Yehova akonekene shili ye yeswe. Ukuule wa Yesu we wika muuhasa kutwala Yehova akonekene shili ye yeswe. (1 Yoa. 1:7) Chipwe chocho, upapachiso uli ulemu chinji mumu Yehova mwe wakutulweza tulihane hanga atupapachise. Kashika, muze akutupapachisa, chili ngwe ‘tunechi Zambi hanga atwehe mbunge yitoma.’ Yehova mawahilila ha kukwaha yize mumwita. Chikwo nawa, upapachiso ‘muukulamwina’ ni kukukwasa ukapwe ni mwono wa mutolo.
KUCHI UPAPACHISO AKUULINGA?
7. Kuchi upapachiso atamba kuulinga?
7 Mbimbiliya yakusolola ngwo, mutu yoze mapapachisa, katamba kumunjisa mweswe mu meya. Alioze kuyishi kuhanjika chinji ha chize upapachiso atamba kuulinga. Chipwe chocho, yakuhana yimwe yiyulo yize twatamba kukaula ha mashimbu jacho. Ngwe chilweza, yakutukwasa kunyingika chize atu atamba kuzala ha tangwa lia upapachiso wo, ni yize atamba kulinga atu waze matala upapachiso. (1 Kori. 14:40; 1 Timo. 2:9) Kanji-kanji, mutu yoze wakupapachisa, kali umwe mukulwana wa mu chikungulwila. Alioze yetu kutushi kumufumanyisa mumu lia mulimo uze akulinga. (1 Kori. 1:14, 15) Yehova kakutayiza upapachiso, chipwe ngwe ha chihela chacho hali atu anji hanji akehe.—Yili. 8:36.
8. Yihula yika akuhula kuli waze maapapachisa, nawa mumu liaka? (Yilinga 2:38-42) (Tala nawa chizulie.)
8 Mbimbiliya yakusolola ngwo, twatamba ‘kwambujola ha mbunga mba akatulamwine’ hanji ngwetu, kusolola ufulielo wetu. (Roma 10:9, 10) Chili chilemu kuchilinga ha tangwa lia upapachiso wetu mumu upapachiso uli jila yilemu yize muyikatuhetesa ku ulamwino. Kashika, atu waze akwapapachisa kakukumbulula yihula yino yaali: Chitangu, “Nwalikonyeka ku shili yenu ni kulihana kuli Yehova ni kutayiza ngwenu, makanulamwina kupalikila muli Yesu Kristu, nyi?” Chihula chino chinatwiwulula pande jize ahanjikile postolo Petulu ha tangwa lia Pentekoste. Chakutwiwulula nawa tachi jize mutu asa mba amupapachise. Chamuchiali, “Shina nunanyingika ngwenu, upapachiso wenu muunupwisa Yela ja Yehova mu ululikiso wenyi?” Chihula chino chakutwiwulula ngwo twatamba kutwama kulita ni kulihana chetu, kukaula usongwelo uze akutwaha kupalikila mu ululikiso wa Yehova ni kumuwayila hamwe ni mandumbu jetu, ngwe chize alingile Akwa-Kristu a ku sekulu yitangu. (Tanga Yilinga 2:38-42.) Waze akukumbulula ngwo ewa ha yihula yino yaali, e akupapachisa.
Upapachiso unachingi ‘kwambujola ha mbunga mba akatulamwine’ (Tala paragrafu 8)d
9. Yuma yika yetu eswe twatamba kulinga mba tupwe ni utayizo wa Zambi?
9 Shimbu te kanda uchililongesa umwenemwene, kota wapwile ni yitanga yipema, hanji nawa kuwakalingile shili yinene. Chikwo nawa, hanji kakulelele kuli yisemi Akwa-Kristu waze akukwashile kuzanga Yehova. Shina ni yena watamba lume kulikonyeka, kukupapachisa mba upwe ni utayizo wa Zambi? Ewa. Yetu eswe twahingile shili. Chino chakutukwika kupwa masepa ja Zambi. (Samu 51:5) Alioze, amu tunayi ni kunyingika kanawa Yehova, twatamba kusa upale wenyi ha chihela chitangu ku mwono wetu, kuhiana wa yetu ene. Twatamba kwivwa chinyengo chinji ha shili yeswe yize twalingile. Twatamba nawa kwecha yuma yeswe yize Zambi akwamba ngwo yili yipi, ni kuputuka mwono waha uze Zambi akutayiza. Muze hitwalinga yuma yino yeswe, mba matupapachisa.—Yili. 3:19.
10. Yika watamba kulinga chipwe ngwe te hanakupapachisa kulu muze wapwile mu yingeleja?
10 Kunyima, hanji te hanakupapachisa kulu mu yingeleja yize wapwile. Chipwe chocho, katamba kukupapachisa ngwe Chela cha Yehova. Mumu liaka? Mumu muze akupapachishile, te kuwanyingikine umwenemwene hakutwala kuli Yehova Zambi ni Mwanenyi Yesu. Chikwo nawa, chipwe ngwe walihanyine kuli Zambi mu yilemba, nihindu muze wachilingile, te kuwanyingikine upale wa Zambi. Postolo Paulu kanyingikine amwe malunga a mu Efwesu, waze te hanaapapachisa kulu, alioze te kanyingikine kanawa malongeso ja Akwa-Kristu. Kashika, malunga jacho te katamba kwapapachisa cheka.b (Yili. 19:1-5) Chizechene nawa, Yehova kakutayiza wika upapachiso wa mutu yoze wanyingika kanawa upale wenyi.
“MU JINA LIA TATA, NI LIA MWANA, NI LIA SPIRITU YISANDU”
11. Yika chinalumbunuka kutupapachisa “mu jina lia Tata, ni lia Mwana, ni lia spiritu yisandu”? (Mateu 28:18-20)
11 Yesu kambile ngwenyi, tumbaji aha te katamba kwapapachisa mu jina lia Tata, ni lia Mwana, ni lia Spiritu Yisandu.” (Tanga Mateu 28:18-20.) Yika iye te anazange kwamba? Mu Mbimbiliya, kanji-kanji liji “jina” liakutala ha lufuma wa mutu. Liakutala nawa ha chiteli ni chiyulo chize mutu alinacho. Kashika, muze akutupapachisa mu jina lia Yehova ni lia Yesu, yetu twakutayiza ngwetu ayo kali ni ulite ni chiyulo cha kutulweza yize twatamba kulinga. (Tesa ni Mateu 10:41) Chikwo nawa, muze matupapachisa mu jina lia spiritu yisandu, chinalumbunuka ngwo mutukaula usongwelo wa spiritu yisandu. Haliapwila tutalenu chize mutuhasa kuchilinga.
12. Kutupapachisa mu jina lia Tata, yika chinalumbunuka? (Usolwelo 4:11) (Tala nawa yizulie.)
12 Mu jina lia Tata. Tunanyingika pundu ngwetu, Yehova kali Tata yetu wa mu malilu yoze watuhele mwono. Iye kali Mukwa-Ndundo-Jeswe yoze watangile yuma yeswe. (Tanga Usolwelo 4:11.) Tunanyingika nawa ngwetu, iye kakwivwa yilemba yetu, twakuvuluka jina lienyi ni vumbi muze tunalembe ni muze tunalweze akwetu hakutwala kuli iye. (Samu 65:2) Alioze twatamba kupwa ni shindakenyo ha yuma yikwo nawa; atu waze Petulu te analongesa ha Pentekoste, te hananyingika kulu Yehova. Chipwe chocho, ayo te katamba kunyingika nawa ngwo, Yehova makahana wika mwono wa mutolo, kupalikila muli Yesu Kristu.—Roma 5:8.
Hanyima lia kukupapachisa, nunga ni kwiwuluka chiyulo chize Yehova ni Yesu alinacho ni chize spiritu yisandu yakukalakala (Tala paragrafu 12)
13. Kutupapachisa mu jina lia Mwana, yika chinalumbunuka? (Tala nawa yizulie.)
13 Mu jina lia Mwana. Tuli ni shindakenyo ngwetu, Yesu kali mwana wa wika wa Zambi. Iye “ye jila,” chikwo nawa, mutuhasa kupwa masepa ja Yehova kupalikila wika muli iye. (Yoa. 14:6) Twakufuliela nawa ngwetu, Yesu kali mukwa-kutukuula yoze wafwile hali yetu, hanga tupwe ni kutalatala cha mwono wa mutolo. Kunyingika chino, chakutukwasa kwimbulula chilweza chenyi ku mwono wetu weswe, hi wika ko ha tangwa lize akutupapachisa. (1 Yoa. 2:6) Chizechene ngwe Yesu, ni yetu twakwambujola ni zango, chakuhona kwecha chuma nichimwe chitukinde kuchilinga. (Luka 4:43) Kutushi kwivwa woma wa kupalika mu yihungumiona hanga tuwayile Zambi ni ushishiko. (2 Timo. 3:12) Twakuvumbika Kristu ngwe mutwe wa chikungulwila. Kashika, twakuzeyela waze Yesu atongwele hanga atusongwele ni kutufunga.—Efwe. 4:8, 11, 12; 5:23.
Hanyima lia kukupapachisa, nunga ni kwiwuluka chiyulo chize Yesu alinacho (Tala paragrafu 13)
14. (a) Kutupapachisa mu jina lia spiritu yisandu yika chinalumbunuka? (Tala nawa yizulie.) (b) Upapachiso ukwo uka akutambula Akwa-Kristu akuwayisa? (Tala nawa mushete “Upapachiso Ukwo wa Akwa-Kristu Akuwayisa.”)
14 Mu jina lia spiritu yisandu. Twakutayiza umwenemwene hakutwala ku spiritu yisandu. Tunanyingika ngwetu hi mutu ko, chikwo nawa kuyalingile chihanda cha tuzambi atatu, alioze yili tachi ja Zambi. Twakutayiza nawa ngwetu, spiritu yisandu yasongwelele aprofeta ni waze asonekene Mbimbiliya. Kashika twakutanga Mbimbiliya matangwa eswe ni kukaula malongeso jamo. (2 Petu. 1:20, 21) Twakusa tachi hanga tuhone kulinga shili yinene, mumu tunanyingika ngwetu nyi twachilinga, yetu hanji chikungulwila cheswe kuchichi kupwa ni spiritu yisandu.—Efwe. 4:30.
Hanyima lia kukupapachisa, nunga ni kwiwuluka chize spiritu yisandu yakukalakala (Tala paragrafu 14)
15. Yika watamba kununga ni kulinga?
15 Nyi hanakupapachisa, nunga ni kusa tachi hanga unyingike kanawa “malongeso hakutwala ku upapachiso”c ni kusa tachi hanga mwono we ulite ni yize walakenyene kuli Yehova. Nyi kanda achikupapachisa, yika yinakukwika? Mutwe uze muuhataho, muuhanjika ha chize muhasa kununga ni kusenya kulutwe hanga akupapachise.
MWASO 161 Nakuwahilila ha Kulinga Upale We
a Liji lia Ngregu lize analumbununa ngwo “upapachiso,” linalumbunuka “kunjisa” mutu mwese mu meya hanji “kajiwa.” Kashika, kupapachisa chili kunjisa mutu mweswe mu meya hi kumuhinjila ko wika yimwe ndambu ya meya, ngwe chize amwe mayingeleja akulongesa.
b Malunga a mu Efwesu, kaapapachishile ni “upapachiso wa Yoano.” (Yili. 19:3) Yoano Chipapachisa katowezele A-Yunda ngwo katamba kulikonyeka ku shili yo mumu lia shimbi ya Mose. Yoano kanakapapachisa waze anakalikonyeka. (Marku 1:4, 5) Alioze Zambi kechele kutayiza upapachiso wa Yoano muze shimbi ya Mose yahwile. Kukatuka haze, Zambi yaputuka kutayiza “upapachiso umuwika” uze wakuneha ulamwino.—Efwe. 4:5.
c Tala chikuma, O que é o batismo? ha chihanda, “Kumbululo lia Yihula ya Mbimbiliya” mu site jw.org ni mu aplicativo JW Library®
d ULUMBUNWISO WA CHIZULIE: Ha kukunguluka cha mbonge, waze maapapachisa kanamana hanga asolole ufulielo wo ha mbunga