Chize Mutuhasa Kulivwashana ni Asoko Jetu Waze Keshi Kuwayila Yehova

1-2. Yika muyihasa kututwala hanga tuhone kulivwashana ni asoko jetu waze hi Yela ja Yehova ko?

YESU kalwezele umwe lunga yoze wazangile kupwa kambaji kenyi ngwenyi: “Yako kumahienu kuli usoko we, ukambulwile yuma yeswe yize Yehova akulingila.” (Marku 5:19) Yesu kambile maliji wano, mumu kanyingikine ngwenyi atu anji kakuzanga kulweza asoko jo sango jipema.

² Shina unewuluka chisuho chitangu wevwile sango jipema? Kota yena wazangile kujilweza akwenu. Alioze kota asoko je kakawahililile ni sango jacho. Muchihasa nawa kupwa ngwe, mutapu uze unakaalwezelamo umwenemwene, yiuneha mbwanja hakachi ka yena ni ayo. Nyi yino yalingiwile kuli yena, mutwe uno muukukwasa kumona yize mulinga hanga ununge ni kushishika kuli Yehova ni kupwa nawa ni sambukila ni asoko je.

3. Yika mutulilongesa ha mutwe uno?

³ Ha mutwe uno: (1) Mutulilongesa ngwetu, nyi twavwila keke asoko jetu waze keshi kuwayila Yehova,a mutwasolwela zango ni kulihumikiza no chipwe ngwe ayo kazangile kulilongesa hakutwala kuli Yehova; (2) mutulilongesa yize mutuhasa kulinga muze asoko jetu matwamba hanji matulinga yuma yize muyitulemeka ku mbunge; (3) mutumona chize mutuhasa kukwasa asoko jetu kunyingika umwenemwene ha kulihumikiza no, ni kupwa ni kutalatala ngwo tangwa limwe ayo mawayila Yehova; ni (4) mutumona chize mutuhasa kwasolwela zango.

ASOLWELE KEKE

4. Yika Yesu alingile muze atu te keshi kumupanjika muze te akwambujola sango jipema?

⁴ Yesu kakalitwaminyine kukwasa atu waze te keshi kumupanjika muze te akwambujola sango jipema. Iye mwene kalitesele ni mukwa-kulima munda wa uva yoze wasele tachi jinji hanga mutondo uze te kushi kwima mihuko, uputuke kwima mihuko yinji. (Luka 13:6-9) Muze Yesu ambile maliji wano, iye te kaneseka kukwasa A-Yunda hanga amufuliele ni kupwa tumbaji twenyi. Iye te heseka kulinga chino ha miaka yitatu. Mumu liaka Yesu anungine ni kwakwasa? Mumu iye te kakuvwila atu keke. Chino chamukwashile kulihumikiza no.

5. Yika yatwalile Yesu kuvwila atu keke?

⁵ Yesu kevwilile atu keke, mumu mangana-a-mayingeleja te keshi kwakwasa hanga apwe ni ufulielo wamwenemwene muli Zambi. Iye kambile ngwenyi, atu kapwile ngwe “mapanga waze keshi kafunga.” (Marku 6:34) Muze kufwa chenyi te chinakundama, Yesu kalilile ha kumona tembele ya Yerusaleme, mumu kanyingikine ngwenyi, atu anji a mu mbonge yacho te mafwa mumu lia kuhona ufulielo. (Luka 19:41-44) Chizechene ngwe Yesu, nyi twanyonga ha ulemu wa kwambujola sango jipema kuli asoko jetu, chino muchitukwasa kwalweza umwenemwene.

6. Mumu liaka twatamba kulihumikiza ni asoko jetu waze keshi kuwayila Yehova? (A-Ngalashia 6:9)

⁶ Tanga A-Ngalashia 6:9. Chipwe ngwe asoko jetu keshi kuzanga yize twafuliela, nihindu twatamba kulihumikiza no ni ‘kununga kwalingila yuma yipema.’ Tunanyingika ngwetu, kwakupalika mashimbu anji mba mutu ahichike yize afuliela ni kuputuka kuwayila Yehova. Shina ni yena wapwile hakachi ka atu waze te ‘keshi kutalatala hanji ngwetu keshi ni Zambi hano hashi?’ (Efwe. 2:12) Nyi chenacho, tuli ni shindakenyo ngwetu, umwe wakukwashile. Mba yena, shina kuwatambile kusa tachi hanga ukwase asoko je afuliele muli Zambi?

YIZE MULINGA MUZE ASOKO JE MAMBA HANJI MALINGA YUMA YIZE MUYIKULEMEKA KU MBUNGE

7. Yika kota yakwikile anakwo ja Yesu kufuliela muli iye?

⁷ Kota anakwo ja Yesu, kevwile hakutwala ku yikomokeso yize iye alingile mu Ngalileya. (Luka 4:14, 22-24) Alioze ku uputukilo, ayo te keshi kumufuliela. (Yoa. 7:5) Mumu liaka? Mbimbiliya kuyishi kulumbununa chikuma chino. Alioze yakusolola yikuma yaali yize yakwikile amwe A-Yunda kupwa tumbaji twa Yesu. Amwe te kakwivwa woma wa kwahungumiona kuli enyembo jo mumu lia kufuliela muli Yesu. (Yoa. 9:18-22) Eka te kananyingika Yesu chize ku wanuke wenyi, kashika chapwile chikalu kutayiza ngwo, Yesu kali Mwana wa Zambi. (Marku 6:1-4) Kota anakwo ja Yesu, no che apwile ni kunyonga. Muchihasa kupwa ngwe, asoko je kazangile kwivwa sango jipema mumu kanevwu woma wa kwahungumiona, hanji nawa ngwo mutu yoze unaambulwila sango jipema kali mutu yoze ayo ananyingika kanawa.

8. Yika muyihasa kutwala asoko jetu waze keshi kuwayila Yehova kwamba hanji kulinga yuma yize muyitulemeka ku mbunge?

⁸ Nyonga ha yize yakutwala asoko je hanga ambe hanji alinge yuma yize yakukulemeka ku mbunge. Anakwo ja Yesu, kapwile mukachi ka asoko waze ambile ngwo, iye “kanazaluka.” Mumu liaka ayo te akunyonga chocho? (Marku 3:21) Lusango wa Mbimbiliya kakusolola ngwo, Yesu te kanalihana chinji hanga ambujole ni kuuka atu. Kashika, ha yisuho yimwe kakapwile chipwe lume ni mashimbu a kulia. (Marku 3:20) Shina asoko jenyi kapwile ni kunyonga ngwo iye te kanahianyisa? Muchihasa kupwa. Asoko jetu no mahasa kunyonga ngwo, twalihana naye mu mulimo wa Yehova. Nyi chenacho, twasolwelenu kupalikila mu yize twakwamba ni yize twakulinga ngwetu, nyonga lio kulialitele.

9. Yika muyihasa kukwasa asoko jetu hanga alumune nyonga lio hakutwala kuli yetu? (1 Petulu 3:1, 2) (Tala nawa yizulie.)

⁹ Nunga ni kusolola umbovu ni kupwa mutu mwashi. Yitanga yetu ya umbovu, muyihasa kutwala asoko jetu hanga alumune manyonga jo hali yetu. (Tanga 1 Petulu 3:1, 2.) Ngwe chilweza, nyi umwe ndumbu wa pwo yoze walimbata ni lunga yoze hi Chela cha Yehova ko, mahichika mukwo-lunga ku zuwo ni kuya ku kukunguluka hanji kwambujola, lunga lienyi mahasa kwivwa uli. Amu ndumbwetu kazangile hanga lunga lienyi evwe uli, iye mahasa kwalumuna katalilo wenyi wa kulinga yuma ya ku ufulielo hanga apalikise mashimbu anji ni mukwo-lunga. Ngwe chilweza, iye mahasa kwambujola muze mukwo-lunga analingi umwe mulimo, hanji muze iye keshi ku zuwo. Nyi ngwe ndumbwetu masa tachi hanga evwise mukwo-lunga kuwaha, iye mahasa kumukwasa hanga alumune nyonga lienyi hakutwala kuli Yela ja Yehova.

10. Kuchi mutuhasa kwimbulula Yesu muze matwamba yuma yipi?

¹⁰ Nyi asoko je makwamba yuma yipi, ha mashimbu amwe muchilita kuhola. Muze Yesu amulamikijine ngwo kakulia ni kunwa chinji, iye kakesekele kulikalila. Shimbu achilinge, iye kechele hanga atu alimwene ene ni kupwa ni shindakenyo nyi yize atu apwile ni kwamba hakutwala kuli iye yapwile yamwenemwene nyi ka. (Mateu 11:19) Iye kasolwele mu yitanga ngwo kakwete nyonga lialita hakutwala ku mwono. (Tesa ni Yoano 2:2, 6-10.) Yena kuwatambile kukumbulula ha yuma yipi yeswe yize makwamba. Echa hanga yitanga ye yisolole kuli asoko je ngwo, ukwete nyonga lialita hakutwala ku mwono nawa unawahilila. Nyi wachilinga, ayo mahasa kulituna mahuza waze evwile hakutwala kuli yetu.

NUNGA NI KULIHUMIKIZA NI KUTALATALA

11. Kuchi Yesu te akutwama ni anakwo?

¹¹ Mikanda ya Evanjelu yakusolola ngwo, Yesu te kakulihumikiza ni anakwo. Ngwe chilweza, muze Yesu alingile chikomokeso chenyi chitangu ku Kena, anakwo no kapwileho. (Yoa. 2:11, 12) Ku uputukilo, anakwo te keshi kumufuliela. Nihindu, iye te kakulihulumba no. Mbimbiliya yakusolola ngwo, chipwe muze kwapalikile miaka yitatu, hanyima lia kulinga chikomokeso chenyi chitangu ku Kena, iye yanunga kuhanjika ni umbovu ni anakwo.—Yoa. 7:5-8.

12. Yika muyihasa kutukwasa kununga ni kutalatala ngwo, amwe asoko jetu tangwa limwe makatayiza umwenemwene?

¹² Kunyingika kanawa keke ya Yehova muchitukwasa kununga ni kutalatala. Muze uwayilo wa mahuza makaunongesa, asoko jetu kota makewuluka yize twapwile ni kwalongesa.b (Uso. 17:16) Ayo kota makalichinga ni yetu mu uwayilo wamwenemwene muze luyinda munene makaputuka. Alioze shimbu yino kanda yichilingiwa, nyi asoko jetu mapalika mu umwe kapinda ku mwono haliapwila, yetu mutulinga yeswe yize mutuhasa hanga twakwase. Ayo kota matayiza umwenemwene wa mu Mbimbiliya muze mamona ngwo, zango lietu hali ayo lili liamwenemwene.

ASOLWELE NGWO WAKWAZANGA

13. Ha yika twatamba kukeya?

¹³ Chipwe ngwe tuli ni yuma yinji ya kulinga mu mulimo wa Yehova, nihindu twatamba kukeya hanga asoko jetu ahone kunyonga ngwo kutushi ni mashimbu a kushikama no hanji ngwo, kutushi kwazanga. (Mateu 7:12) Kuchi mutuhasa kusolola ngwo twakulihulumba no?

14-15. Mu majila aka mutuhasa kusolwelamo ngwetu twakuzanga asoko jetu waze keshi kuwayila Yehova? Hana chilweza.

¹⁴ Pwako ni kuhanjika no mashimbu eswe ni kwasolwela zango. Twakusolwela asoko jetu ngwo twakwazanga, ha kwalweza chize tuli. Ngwe chilweza, mutuhasa kwasonekena yimwe mesaje, kwatumina jimwe foto jize twakwatanga ha mashimbu a kuhwima, muze tuli mu wenyi, hanji muze te tuli ni masepa jetu. Mutuhasa kwaha yawana, chipwe ngwe hi ya ndando yinji ko hanji kwasonekena umwe mukanda wa maliji apema. Ha kulinga chino, mutusolola ngwetu twakwazanga ni kulihulumba no.

¹⁵ Tutalenu chilweza cha Ana, umwe ndumbu wa pwo wa ku Armênia. Usoko wenyi kakuzanga kupalikisa mashimbu anji hamuwika, chipi-chipi ha mashimbu a kwiwuluka tangwa lia kusemuka ni ha mashimbu a yinangamo. Muze Ana atayijile umwenemwene, asoko jenyi yaputuka kwivwa woma ngwo yuma yize iye te analilongesa, muyipihisa usepa wo. Ayo nawa te kanevwu woma ngwo nyi iye te mapwa Chela cha Yehova, mwono wenyi te muukakala chinji kulutwe lia matangwa. Yika Ana alingile hanga usoko wenyi eche kulipikala chinji? Iye yamba ngwenyi: “Muze nakuya ni kwameneka, nakwalweza sango hakutwala ku mwono wami, chikwo nawa nakwasanyika ku zuwo liami ni kwasolola kuli masepa jami. Mumu lia chino, asoko jami kananyingika masepa jami, chikwo nawa kakwazanga.” Iye yamba nawa ngwenyi: “Asoko jami anji kakuhanjika ha chize ngunawahilila, chikwo nawa keshi kulipikala chinji ni yami.”

16. Kuchi Yesu asolwele ngwenyi te kakulihulumba ni mwanakwo Tiangu? (Tala maliji mushi lia lifwo.)

¹⁶ Asolwele ngwo kali alemu kuli yena. Hanyima lia kumuhindwisa, Yesu kasolwele ngwenyi kakulihulumba ni mwanakwo Tiangu, ha kulisolola kuli iye. (1 Kori. 15:7) Kota Tiangu kanakawahilila ha kunyingika ngwenyi, Yesu te machimuzanga. Muchihasa kupwa ngwe, ha mashimbu jacho, he Tiangu anyingikine ngwenyi, Yesu kali lume Mesaya. Muze Yesu ahanjikile nenyi, Tiangu kota kayile ni kukwasa asoko jenyi hanga apwe ni shindakenyo ngwo Yesu mwe Mesaya.c—Yili. 1:14.

17. Kuchi mutuhasa kukaula chiyulo chize chili ha A-Roma 12:15? (Tala nawa chizulie.)

¹⁷ Tanga A-Roma 12:15. Asoko jetu kakupalika ha mashimbu api ni apema ku mwono wo. Nyi mutusolola ngwetu twakulihulumba no, chipi-chipi muze anafupu ukwaso wetu, ayo mahasa kwalumuna manyonga jo hakutwala kuli yetu.d Ngwe chilweza, nyi mu usoko mwasemuka umwe mwana, mutuhasa kuwahilila hamuwika ni usoko wetu ni kwaha yawana hanga tusolole chiseke chize yetu eswe tuli nacho. Nyi twafwisa umwe mu usoko, twatamba kulembejeka asoko jetu, kwaha ukwaso uze anafupu hanji kwasonekena mukanda wa utakamiso. Chikwo nawa, kutwatambile kuvulama kwasanyika ku telefone, kwasonekena yimwe mesaje ni kwameneka, chipi-chipi muze anapalika mu umwe kapinda.

18. Kuchi mutuhasa kwimbulula Andeleu?

¹⁸ Akwase anyingike mandumbu je a ku ufulielo. Muze Andeleu anyingikine ngwenyi Yesu kali Mesaya, yaya ni kusanyika ndumbwenyi Petulu hanga eze aliwane ni Yesu. (Yoa. 1:40-42) Shina mutuhasa kwimbulula Andeleu? Ngwe chilweza, shina mutuhasa kusanyika umwe usoko wetu hanga tulie nenyi hamuwika muze tuli ni masepa jetu? Nyi asoko jetu manyingika mandumbu jetu, ayo mamona ngwo tuli atu apema.

19. Chipwe ngwe asoko jetu kanyingikine kanawa yuma yize twafuliela, kuchi twatamba kutwama no? (1 Petulu 3:15)

¹⁹ Tanga 1 Petulu 3:15. Asoko jetu keshi kuhasa kunyingika kanawa mumu liaka twakulituna kulinga yuma yimwe, alioze mahasa kwiwuluka mashimbu eswe yuma yipema yize twakwalingila ni vumbi lize twakwasolwela. Ayo mahasa kumona tachi jize twakusa hanga tupwe no, chipwe ngwe kutushi kupwa hamuwika mashimbu eswe. Ngwe chilweza, yetu kutushi kupwa no muze ayo analingi yiwanyino yize Mbimbiliya yakukanjisa. Alioze, mutuhasa kwameneka ni kulia no hamuwika ni kwaha yawana ha mashimbu eka.

NUNGA NI KUSHIMBWILA NGWE ASOKO JE MAKAWAYILA YEHOVA

20. Mumu liaka chilweza cha Tiangu chakututakamisa?

²⁰ Tiangu katokesele uhashi wa kukaula Yesu mu mulimo wenyi wa kwambujola. Alioze, kulutwe yapwa kambaji. (Ngala. 1:18, 19; 2:9) Chipwe ngwe ku uputukilo iye kakapwile kambaji ka Yesu, nihindu iye te kakulemesa malongeso a Yesu. Ngwe chilweza, ni ukwaso wa spiritu yisandu, iye kasonekene umwe mukanda kuli Akwa-Kristu, haze atongwele malongeso alifwa ni waze Yesu alongesele ha Longeso lia ha Mulundu.e

21. Mumu liaka twatamba kushimbwila ngwetu, tangwa limwe asoko jetu makawayila Yehova?

²¹ Chipwe ngwe mutusa tachi hanga tusolole umbovu kuli asoko jetu ni kwasolwela ngwo twakulihulumba no, nihindu ayo mahasa kutulinga yuma yimwe yize muyitulemeka ku mbunge hanji kulituna kulilongesa hakutwala kuli Yehova. Mumu liaka twatamba kununga ni kwasolwela umbovu? Mumu nyi twachilinga, acho tunembulula Yehova Zambi ya keke ni Mwanenyi Yesu. (Luka 6:33, 36) Ha kupalika cha mashimbu, yitanga yetu ya zango muyihasa kwatwala hanga alumune nyonga lio hakutwala kuli yetu. Chikwo nawa, ayo mahasa kwiwuluka yuma yize twalongesele ni yilakenyo ya Yehova. Nyi twanunga ni kukwasa asoko jetu ni kusa tachi hanga twasolwele umbovu, hanji ayo mahasa kukwata chiyulo cha kuwayila Yehova hamwe ni yetu. Chino muchikatunehena uwahililo unji.