44 JUAN NGA TIGBAWTISMO
Iyang Giandam ang Dalan Para sa Mesiyas
GATOSAN ka katuigan na nga wala magpadala si Jehova ug mga propeta sa pagtul-id sa iyang katawhan. Dayon, ang Diyos nagpadalag tawo aron sultihan ang katawhan sa Iyang mensahe. Ang maong tawo mao si Juan. Nag-inusara siyang nagpuyo sa kamingawan sa Judea, usa ka batoon nga lugar nga naay mga halas, tanga, dagkong bangis nga mananap, ug mga tulisan. Si Juan nagmaisogon sa pagpuyo didto ug nagmaisogon sab siya sa pagsangyaw ug bug-at nga mensahe.
Seguradong gisultihan si Juan sa iyang mga ginikanan nga si Zacarias ug Elisabet bahin sa giingon sa anghel sa Diyos maylabot kaniya. Busa nasabtan gyod ni Juan nga siya mahimong usa ka madasigong propeta sama kang Elias ug usa ka Nazareo sama kang Samuel, ug siya ang mag-andam sa dalan para sa usa nga mas labaw pa kaniya. Sa 30 anyos na si Juan, puwede na unta siya nga mahimong saserdote sama sa iyang amahan. Pero imbes magpokus niana, nagsugod siya sa pag-awhag sa mga tawo nga maghinulsol. Siya ang “nagasinggit sa kamingawan” nga dugay nang gitagna ni propetang Isaias. Siya madasigon kaayong nagsangyaw sa “Gingharian sa langit” ug tungod niana, panonpanon sa mga tawo ang nangabot gikan sa ilang mga lungsod ug siyudad aron maminaw niya. Iyang gibawtismohan sa tubig kadtong mga naghinulsol sa ilang mga sala. Walay kahadlok sab niyang giyagyag ang pagkasalingkapaw sa impluwensiyadong mga lider sa relihiyon—ang mga Saduseo ug mga Pariseo.
Si Juan wala maghunahuna nga mas importante siya kay sa uban tungod sa iyang espesyal nga asaynment. Hinuon, mapainubsanon niyang gipahayag nga igo ra siyang nag-andam sa dalan para sa usa nga moabot nga mas labaw pa kaniya. Si Juan miingon nga dili siya takos bisan sa pagbadbad sa liston sa sandalyas sa maong tawo. Dihang iyang gibawtismohan si Jesus, nadunggan niya ang mismong tingog ni Jehova nga nag-ingon: “Kini mao ang akong Anak, ang akong gihigugma, nga akong giuyonan.” Sa ulahi, human sa pagtental ni Satanas kang Jesus, si Juan misulti sa kusog nga tingog nga madunggan sa tanan: “Tan-awa, ang Kordero sa Diyos nga magpapas sa sala sa kalibotan!”
Mapainubsanong giawhag ni Juan ang iyang mga sumusunod nga mahimong tinun-an ni Jesus. Daghan kanila ang misunod, apil si Andres nga igsoon ni Pedro ug lagmit si Juan nga anak ni Zebedeo. Sa ulahi, silang duha nahimong apostoles sa Kristo. Dihay panahon nga ang ministeryo ni Jesus sama nianang kang Juan. Parehas sila nga nagdasig sa mga tawo nga magpabawtismo ingong simbolo sa ilang paghinulsol. Dihang gisultihan si Juan nga ang mga tinun-an ni Jesus mas daghag gibawtismohan kay kaniya, wala siya masina. Hinuon, mapainubsanon siyang miingon: “Siya magpadayon sa pagtubo, apan ako magpadayon sa pagkunhod.”
Ang mensahe ni Juan nakapasuko sa relihiyosong mga lider ug gamhanang mga magmamando pero nakapalipay niadtong mga naghulat sa Mesiyas
Si Juan nagpakita pag-usab sa iyang dakong kaisog dihang iyang gitul-id ang gamhanang magmamando nga si Herodes Antipas ug iyang gisaway ang imoral nga kinabuhi niini. Si Herodes usa ka kinabig nga Hudiyo, pero iyang giminyoan si Herodias nga asawa sa iyang igsoon. Dihang giingnan siya ni Juan nga supak ni sa balaod ni Jehova, iyang gipapriso si Juan. Pero wala makontento niini si Herodias. Gusto niyang ipapatay si Juan.
Samtang napriso si Juan, nagkinahanglan siyag pagdasig. Busa iyang gipaadto kang Jesus ang iyang duha ka tinun-an aron mangutana: “Ikaw ba ang Usa nga Moanhi, o magpaabot pa mig lain?” Giingnan sila ni Jesus nga isulti kang Juan kining makapalipay nga balita: “Ang mga buta makakita na, . . . ang mga bungol makadungog na, ang mga patay gibanhaw.” Bisag si Juan usa ka propeta sama kang Elias, wala siya hatagi sukad ni Jehova ug gahom sa paghimog mga milagro. Busa dihang nadunggan ni Juan ang tanang milagro nga gihimo ni Jesus, seguradong nadasig siya pag-ayo. Nahibalo siya nga nakatabang siya sa pag-andam sa dalan para kang Jesus.
Pero wala madugay human niana, nakakita rag paagi si Herodias sa pagpatay kang Juan. Ang iyang anak nga babaye misayaw sa atubangan ni Herodes. Nakapalipay kini pag-ayo kang Herodes maong iyang giingnan ang dalaga nga iyang ihatag ang bisan unsa nga pangayoon niini. Gisulsolan ni Herodias ang iyang anak nga pangayoon ang ulo ni Juan nga Tigbawtismo. Bisag dili gusto ni Herodes nga patyon si Juan, wala siyay kaisog sa pagbalibad. Pero si Juan nagmaisogon hangtod sa iyang kamatayon.
Si Jesus miingon bahin kang Juan: “Sultihan mo nako, wala pay natawo nga molabaw kang Juan.” Siya ang gitagnang “nagasinggit sa kamingawan” nga nag-andam sa dalan para sa Mesiyas. Walay laing dili hingpit nga tawo—bisan gani mga propeta sama ni Moises ug Elias—ang nakapribilehiyo niini. Ang iyang kaisog nagdasig nato nga magmaisogon sab.
Basaha ang asoy sa Bibliya:
Pakighisgot:
Sa unsang mga paagi nga si Juan nga Tigbawtismo nagpakitag kaisog?
Tun-ig Dugang
1. Ig-unsa ni Jesus si Juan nga Tigbawtismo? (w10 9/1 15 ¶4-6)
2. Unsay gisulat sa historyano sa unang siglo nga si Flavius Josephus nga nagpakita nga tinuod nga tawo si Juan nga Tigbawtismo? (mrt artikulo 14) A
Hulagway A: Sensilyo nga gipagawas ni Herodes Antipas niadtong 30 C.E. Kini naay nakasulat: “Herodes nga Tetrarka [Magmamando sa Distrito]”
3. Nganong ikaingon nga nabatonan ni Juan “ang espiritu ug gahom ni Elias”? (Luc. 1:17; it “Espiritu” ¶60) B
Hulagway B
4. Nganong makaingon ta nga si Juan wala banhawa ngadto sa langit? (Mat. 11:11; ijwbq artikulo 178 ¶4)
Hunahunaa ang mga Leksiyon
Bisag si Juan nagtuman sa tagna sa Bibliya ug nag-andam sa dalan para sa Mesiyas, nagpabilin siyang mapainubsanon. (Juan 1:26, 27) Unsay atong makat-onan kaniya?
Si Juan simple ug kinabuhi ug nagpokus sa pagbuhat sa kabubut-on sa Diyos. (Mat. 3:4) Unsay makatabang nato nga magkinabuhing simple? C
Hulagway C
Unsaon nimo pagsundog ang kaisog ni Juan nga Tigbawtismo?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Juan nga Tigbawtismo dihang banhawon na siya?
Pagkat-og Dugang
Sayra kon sa unsang paagi si Juan nagmalipayon ug nagmapailobon bisan pa sa mga kalisdanan.
“Juan nga Tigbawtismo—Ehemplo sa Pagpabiling Malipayon” (w19.08 29-31)
Sa unsang paagi ang ehemplo ni Juan makatabang nato dihang kita lutoson, maglisod sa pinansiyal, o madismayar kay wala nato madawat ang asaynment nga gusto nato?