45 PEDRO
“Makasasala Ko”
SI Pedro kugihang mangingisda kinsa dunay negosyo sa pangisda kauban sa iyang mga paryente. Siya usa ka tawong maisogon. Sagad, isulti dayon niya kon unsay iyang gihunahuna ug abtik siyang mohimo kon unsay gikinahanglan. Usa ka adlaw niana, ang iyang igsoong si Andres eksayted kaayong miingon kaniya: “Nakaplagan na namo ang Mesiyas.” Giadto dayon ni Pedro si Jesus, ug sa ngadtongadto nahimo siyang sumusunod ni Jesus.
Pipila ka bulan sa ulahi, si Jesus miabot sa Capernaum, diin nagpuyo si Pedro. Dayon iyang nakita si Pedro. Adtong tungora, gikapoy si Pedro kay tibuok gabii siyang nangisda pero wala gyod tawon siyay kuha. Si Jesus misakay sa sakayan ni Pedro. Sa ulahi, iyang giingnan si Pedro nga mangadto sila sa lawom ug itaktak pag-usab ang mga pukot. Nagduhaduha niini si Pedro kay sagad walay kuha kon adlawan mangisda. Siya miingon: “Tibuok gabii ming nangisda ug wala miy nakuha.” Bisan pa niana, iyang gihimo ang giingon ni Jesus. Wala madugay, duha ka sakayan ang napunog isda nga tungod niana halos maunlod na ni! Nahadlok si Pedro. Mihapa siya sa tiilan ni Jesus ug miingon: “Pahilayo kanako Ginoo, kay makasasala ko.” Mibati si Pedro nga dili siya takos nga makig-uban kang Jesus, kinsa mao ang Anak sa Diyos ug may gahom sa paghimo niini nga mga milagro. Gipasaligan siya ni Jesus: “Ayaw nag kahadlok. Sukad karon mangisda na kag mga tawo.”
Nakita ni Jesus ang maayong mga hiyas ni Pedro, ug sa ulahi gipili niya si Pedro nga mahimong usa sa iyang mga apostoles. Si Pedro nagpakitag kaisog sa daghang paagi. Pananglitan, sa dihang naay isulti si Jesus nga wala masabti sa iyang mga tinun-an ug sila magpanuko sa pagpangutana kaniya, sagad si Pedro ang mangutana kang Jesus. Ug sa dihang si Jesus milakaw ibabaw sa tubig, si Pedro nagmaisogon sa paghangyo kang Jesus nga tugotan siya nga molakaw sab ibabaw sa tubig.
Sagad isulti dayon ni Pedro kon unsay naa sa iyang hunahuna, maong nagkinahanglan siyag kaisog nga dawaton ang pagtul-id ug magbag-o
Si Pedro nagpakitag kaisog sa lain pang paagi. Dihang ang usa ka tawo tul-iron, nagkinahanglan siyag kaisog nga mapainubsanong dawaton ang iyang mga sayop ug magbag-o. Balikbalik nga gipakita ni Pedro ang maong kaisog. Dihang miingon si Jesus nga patyon siya, giingnan siya ni Pedro: “Maluoy ka sa imong kaugalingon, Ginoo.” Gitul-id ni Jesus si Pedro kay ang panghunahuna niini sama sa panghunahuna ni Satanas ug supak ni sa kabubut-on sa Diyos. Mapainubsanong gidawat ni Pedro ang maong pagtul-id.
Sa gabii una mamatay si Jesus, gusto niyang tudloan ang iyang mga apostoles bahin sa pagkamapainubsanon, maong gihugasan niya ang ilang mga tiil sama sa ginahimo sa usa ka sulugoon. Gipugngan siya ni Pedro ug giingnan: “Dili ko mosugot nga hugasan nimo ang akong mga tiil.” Kusganon siyang gitul-id ni Jesus. Misanong si Pedro, pero nasobrahan ra sab siya kay mihangyo siya kang Jesus nga hugasan dili lang ang iyang mga tiil kondili hasta sab ang iyang ulo ug mga kamot. Gitul-id siya pag-usab ni Jesus. Sa ulahi, gitagna ni Jesus nga biyaan siya sa tanan niyang mga apostoles. Pero si Pedro miingon nga dili gyod niya biyaan si Jesus bisan pag ang tanang ubang tinun-an mobiya kaniya! Miingon si Jesus nga ilimod siya ni Pedro sa tulo ka higayon nianang gabhiona.
Paglabay lag pipila ka oras, si Jesus gidakop, gigapos, ug gidala sa mga sundalo. Si Pedro nagmaisogon ug gisundan sila, nga nagpalayo rag diyutay. Nakaabot siya sa hawanan sa balay sa hataas nga saserdote samtang si Jesus tua sa sulod nga gimaltratar ug ilegal nga gihusay. Pero dihay mga tawo didto nga nakamatikod kang Pedro ug miingon nga siya sumusunod ni Jesus. Tulo ka higayon nga milimod si Pedro nga nakaila siya kang Jesus, sama gyod sa gitagna ni Jesus.
Si Jesus, nga posibleng tua sa balkon sa balay, mitan-aw kang Pedro. Nahugno pag-ayo si Pedro sa iyang nahimo. Mibiya siya sa hawanan, dayon “migawas ug mihilak pag-ayo.” Pipila ka oras sa ulahi, dihang walay kaluoy nga gipatay ang iyang minahal nga Ginoo, seguradong mibati si Pedro ug dili mahubit nga kasakit. Pero wala siya magpadaog sa iyang gibati. Determinado siya nga molahutay. Dayon unsay iyang gihimo? Nakig-uban siya sa iyang mga isigkaapostoles. Sa ulahi dihang nabanhaw na si Jesus, nagpakita siya kang Pedro! Wala hisgoti sa Bibliya kon unsay giingon ni Jesus kaniya, pero seguradong nadasig ug nahupay niini si Pedro.
Paglabay sa pipila ka semana, sa dihang si Jesus nakigkita sa iyang mga apostoles sa Dagat sa Galilea, diha siyay mahigugmaong gihimo para kang Pedro. Sama nga tulo ka higayon nga gilimod ni Pedro si Jesus, katulo pod siya gihatagan ni Jesus ug kahigayonan sa pagpahayag sa iyang gugma para sa iyang Agalon. Dayon gipiyalan ni Jesus si Pedro ug importante kaayo nga asaynment: “Pakan-a ang akong gagmayng mga karnero.” Sa Kapitulo 49, masayran nato kon sa unsang paagi nagmatinumanon si Pedro kang Jesus ug kon giunsa pa niya pagpakitag talagsaong kaisog.
Basaha ang asoy sa Bibliya:
Pakighisgot:
Sa unsang mga paagi nga si Pedro nagpakitag kaisog niining bahina sa iyang kinabuhi?
Tun-ig Dugang
1. Unsay nalangkit sa trabaho ni Pedro ingong mangingisda? (it “Pagpangayam ug Pagpangisda” ¶6-7) A
Hulagway A
2. Nganong si Simon gihatagan ni Jesus ug ngalan nga Cefas (Pedro)? (“Ikaw si Simon” nga study note sa Juan 1:42, nwtsty-wcgr)
3. Unsay gipasabot ni Jesus sa dihang gidapit niya si Pedro ug Andres nga mahimong “mangingisdag tawo”? (Mat. 4:18-20; w16.05 9 ¶3-4) B
Hulagway B
4. Sa wala pa si Jesus mosaka sa langit, iyang gipangutana si Pedro: “Gihigugma ba ko nimo labaw pa niini?” Unsa tingali ang gipasabot ni Jesus sa iyang pangutana? (“gihigugma ba ko nimo labaw pa niini?” nga study note sa Juan 21:15, nwtsty-wcgr)
Hunahunaa ang mga Leksiyon
Kon nakigbisog ka sa usa ka kahuyangan, sa unsang paagi ang ehemplo ni Pedro makatabang nimo nga padayong moalagad kang Jehova? C
Hulagway C
Si Jehova ug Jesus andam kaayo sa pagpasaylo kang Pedro. Sa unsang paagi ang pagpamalandong niini makatabang kanimo?
Unsaon nimo pagsundog ang kaisog ni Pedro niini nga asoy?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay nakat-onan nimo bahin kang Pedro niini nga asoy nga nakapalipay nimo nga gipili siya nga magmando uban sa Kristo didto sa langit?
Pagkat-og Dugang
Sa unsang paagi magamit sa mga ginikanan ang ehemplo ni Pedro sa pagtudlo sa ilang mga anak bahin sa kaluoy ni Jehova?
Pamalandonga kon nganong nagmaunongon si Pedro bisag daghan ang mibiya kang Jesus.