43 JOSE
Iyang Giabaga ang Responsibilidad
GIKINAHANGLAN ang kaisog aron mahimong maayong amahan. Pero bisag dili pa amahan si Jose, nga usa ka panday nga taga-Nasaret, nasulayan na ang iyang kaisog. Iyang nasayran nga mabdos ang iyang pangasaw-onon nga si Maria. Apan dili siya ang amahan sa bata. Gisulti ni Maria kaniya kon sa unsang paagi siya namabdos. Pero para kang Jose, lisod kaayo tong sabton ug tuohan. Unsa kahay iyang himoon?
Ang Bibliya nag-ingon nga “si Jose matarong.” Siya nagsunod sa mga balaod ni Jehova, makataronganon, buotan, ug maluluy-on. Dihang nasayran niya nga mabdos si Maria, gipamalandong niya pag-ayo kon unsay angayng himoon. Naghunahuna siya nga makigdiborsiyo sa tago aron mapanalipdan ug dili mapakaulawan si Maria. (Niadtong panahona, kon ang lalaki ug babaye kaslonon na, giisip na sila ingong magtiayon.) Pero gipugngan ni Jehova si Jose. Nagpadala siyag anghel aron makig-estorya kang Jose diha sa damgo. Ang anghel miingon kang Jose: “Ayawg kahadlok sa pagdala kang Maria nga imong asawa sa imong balay.” Gipasaligan sa anghel si Jose nga tinuod ang gisulti ni Maria. Ang bata anak mismo sa Diyos, ug siya ang mahimong Mesiyas!
Kinahanglang abagahon ni Jose ang usa ka dakong responsibilidad—ang pag-atiman sa Anak sa Diyos
“Gituman [ni Jose] ang gisugo sa anghel ni Jehova.” Nagmaisogon siya sa pag-abaga sa responsibilidad nga gihatag ni Jehova kaniya: Kinahanglan niyang atimanon ang iyang minahal nga asawa ug ang ipakatawo nga anak sa Diyos. Nagkinahanglan gyod si Jose ug dakong kaisog.
Pipila ka bulan sa ulahi, si Cesar Agusto nagmando nga ang tanan kinahanglang mouli sa ilang yutang natawhan aron magparehistro. Busa kinahanglang moadto si Jose sa Betlehem. Ang balaod wala tingali mag-ingon nga kinahanglang moadto pod sa Betlehem si Maria. Pero mikuyog siya kang Jose. Posible nga naghunahuna si Jose nga mas mapanalipdan niya si Maria kon magkuyog sila. Busa mipanaw silag layo kaayo bisag si Maria “manganakay na niadtong higayona.” Sa didto na sila sa Betlehem, si Maria nagbati ug nanganak kang Jesus diha sa kuwadra.
Naningkamot si Jose nga matagan-an ang panginahanglan sa iyang pamilya, pero dili sila dato. Dihang siya ug si Maria miadto sa templo sa Jerusalem aron ipresentar ang ilang anak, naghalad silag duha ka gagmayng langgam kay mao ra ni ang ilang maarangan. Sa ulahi, samtang naa sila sa ilang balay sa Betlehem, giduaw sila sa mga astrologo, nga lagmit gikan sa Babilonya, nga gitultolan sa usa ka misteryosong “bituon.” Gihatagan nila ang pamilya ug mahalong mga gasa para sa bata. Wa madugay human niana, gipasidan-an si Jose sa anghel ni Jehova nga gustong patyon sa daotang hari nga si Herodes ang batang si Jesus! Giingnan sa anghel si Jose nga kinahanglang mokalagiw sila sa iyang pamilya ngadto sa Ehipto.
Si Jose nagmaisogon, ug iyang giingnan ang iyang asawa nga kinahanglan silang mobiya dayon sa Betlehem kauban ang bata nga si Jesus. Nianang gabhiona, mibiya sila ug miadto sa usa ka langyaw nga lugar nga layo kaayo. Sa unsang paagi kaha maatiman ni Jose ang iyang pamilya didto sa Ehipto? Seguradong mapasalamaton siya sa mga gasa nga ilang nadawat gikan sa mga astrologo nga miduaw nila. Sa ulahi, gisugo ni Jehova si Jose nga dad-og balik ang iyang pamilya ngadto sa Israel. Pero ang Betlehem gimandoan sa usa ka daotang magmamando. Busa si Jose ug ang iyang pamilya wala mobalik didto. Hinuon, iyang gisunod ang sugo ni Jehova pinaagig damgo ug gidala ang iyang pamilya ngadto sa Nasaret.
Didto, nagkugi si Jose ingong panday aron matagan-an si Maria, Jesus, ug ang labing menos unom pa niya ka anak. Labaw sa tanan, gitagan-an ni Jose ang espirituwal nga panginahanglan sa iyang pamilya. Nabatasan nila nga regular nga moadto sa sinagoga aron mokat-on bahin kang Jehova, ug motambong pod sila sa mga pista sa Jerusalem. Ang kataposang higayon nga gihisgotan si Jose diha sa Bibliya maoy dihang miadto siya sa Jerusalem kauban sa iyang pamilya. Si Jesus 12 anyos niadtong panahona, ug nagtuo si Jose ug Maria nga nawala siya. Seguradong nabalaka pag-ayo adto si Jose! Pero luwas ra si Jesus, ug siya “padayong nagpasakop” sa iyang mga ginikanan.
Wala hisgoti sa Bibliya kon kanus-a namatay si Jose, pero sa buhi pa siya, posibleng iyang gibansay si Jesus nga mahimong maayong panday. Tungod niana, si Jesus nailhan dili lang ingong “anak sa panday” kondili nailhan sab siya ingong “ang panday.” Ang ehemplo ni Jose nagpakita nga gusto ni Jehova nga ang tanang amahan mahimong maisogong tigpanalipod, maunongong tigtagana, ug buotang magtutudlo nga matinumanong nagtuman sa ilang hinatag sa Diyos nga asaynment.
Basaha ang asoy sa Bibliya:
Pakighisgot:
Sa unsang mga paagi nga si Jose nagpakitag kaisog?
Tun-ig Dugang
1. Si Maria anak ni Heli. Pero nganong ang Lucas 3:23 nag-ingon nga si Jose ang “anak ni Heli”? (w17.08 32 ¶4)
2. Ngano tingaling si Jose wala makigdulog kang Maria sa wala pa matawo si Jesus? (w03 12/15 5 ¶5)
3. Unsay nagpakita nga kugihan si Jose? (ia 166-167 ¶15-18) A
Hulagway A
4. Nganong makaingon ta nga si Jose lagmit namatay sa batan-on pa si Jesus? (w17.07 13 ¶8, footnote)
Hunahunaa ang mga Leksiyon
Gisunod ni Jose si Jehova bisag dili kini sayon. Unsay makat-onan sa mga ulo sa pamilya kaniya? (Mat. 1:20, 24; 2:13-15, 19-21)
Unsay atong makat-onan kang Jose bahin sa pagseguro nga giuna sa atong pamilya si Jehova? (Luc. 2:41) B
Hulagway B
Sa unsa pang mga paagi masundog nimo ang kaisog ni Jose?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jose dihang banhawon na siya?
Pagkat-og Dugang
Niini nga video, tan-awa kon sa unsang paagi si Jose nagmasinugtanon kang Jehova.
Unsaon nato pagsundog si Jose ug Maria dihang ang gobyerno magpakanaog ug balaod nga para nato dili kombenyente o dili patas?