54 APOSTOL JUAN
Siya Nagmaisogon sa Lisod Kaayong Panahon
“MAO na ni ang kataposang panahon,” misulat si apostol Juan. Sa tigulang na siya, nahibalo siya nga ang panahon sa mga apostoles hapit nang matapos. Mga dekada kanhi, si Jesus ug apostol Pablo nagpasidaan na nga mokaylap ang apostasya. Napugngan ni sa mga apostoles. Pero human sa ilang kamatayon, ang bakak nga mga magtutudlo nagpahinabog kadaot sa kongregasyon. (Mat. 7:15; Buh. 20:29, 30; 2 Tes. 2:6, 7) Si Juan ang kataposang apostol nga nagpugong sa apostasya. Hunahunaa kon unsay iyang gibati niadtong lisod kaayong panahon samtang ang apostasya mikaylap sa mga kongregasyon. Pero si Juan nagmaisogon ug wala siya mawad-ig paglaom.
Giunsa pag-atubang sa edaran na kaayong apostol nga si Juan ang paglutos, pagkadestiyero, ug ang pagkaylap sa apostasya?
Si Juan kapig 90 anyos na, pero madasigon gihapon siya sa “pagsulti bahin sa Diyos ug sa pagpamatuod bahin kang Jesus.” Tungod niana, gidestiyero siya sa Patmos, usa ka awaaw ug batoon nga isla sa Dagat Aegean. Unsay nakatabang kang Juan nga magpabiling positibo? Seguradong nahinumdoman niya ang saad ni Jesus: “Ako magauban kaninyo sa tanang adlaw hangtod sa hinapos sa sistema sa mga butang.”—Mat. 28:20.
Kapig 60 ka tuig human isulti ni Jesus ang maong saad, gipakita ni Jesus kang Juan ang usa ka talagsaong panan-awon bahin sa umaabot. Usa ni ka makapahinganghang pinadayag gikan kang Jehova nga Diyos. Gipakita niini nga sa “adlaw sa Ginoo” ang Kristohanong kongregasyon mapasig-uli ug magkahiusa. Gipakita sab ni Jesus kang Juan nga Iyang tabangan ang Iyang mga sumusunod nga makapabiling matinumanon bisan pa sa grabeng mga kalisdanan.
Ang panan-awon gipakita pinaagig “mga ilhanan,” o mga simbolo. Daghan tingali sa nakita ni Juan ang wala niya masabti. Pero dunay usa ka butang nga klaro sa iyang hunahuna: Seguradohon ni Jehova ug Jesus nga dili molampos ang mga nagpakaylap ug bakak nga mga pagtulon-an. Sa adlaw sa Ginoo, ang katawhan sa Diyos mouswag ug ilang madawat ang nindot nga mga panalangin. Si Satanas mapildi diha sa gubat sa langit ug itambog siya ngadto sa yuta. Segurado na ang iyang kalaglagan hangtod sa hangtod. Ang maong panan-awon nakapalig-on ug nakahatag gyod ug kaisog kang Juan, ug iyang gisulat ang “tanang butang nga iyang nakita.”
Bisag nadestiyero si Juan sa Patmos, wala mawala ang iyang kalipay ug wala maawop ang iyang kadasig. Posible nga human sa kamatayon sa Romanong emperador nga si Domitian, usa ka pintas nga maglulutos sa mga Kristohanon, gitugotan si Juan nga mobiya sa isla. Lagmit miadto si Juan sa Efeso. Dihang mga 100 ang iyang pangedaron, nakadawat siyag lisod ug bag-ong asaynment.
Gigiyahan sa Diyos si Juan sa pagsulat sa ikaupat ug kataposang Ebanghelyo. Nahibalo si Juan nga ang mga kopya sa iyang sinulat dali rang maapod-apod sa mga kongregasyon. Ug dihang mabasa ni sa mga Kristohanon, mapalig-on ang ilang pagtuo ug matabangan sila nga magmaisogon. Nahibalo pod si Juan nga tungod niini mosamot ka suko kaniya kadtong mga nagdumot sa mga Kristohanon. Pero wala na makapugong niya.
Bisag mga 70 ka tuig na ang milabay sukad mamatay si Jesus, sa tabang sa balaang espiritu, tin-aw gihapon sa panumdoman ni Juan ang mga gisulti ug gihimo ni Jesus. Gisulat ni Juan ang makapatandog nga asoy sa kinabuhi ni Jesus, ug mga 90 porsiyento sa iyang gisulat ang wala hisgoti sa nag-unang tulo ka Ebanghelyo. Pananglitan, si Juan lang ang naghisgot bahin sa pagkabanhaw ni Lazaro ug sa daotang plano sa mga lider sa relihiyon sa pagpatay kang Lazaro human sa iyang pagkabanhaw. (Juan 11:1-46; 12:10) Detalyado sab nga gisulat ni Juan ang giingon ni Jesus ngadto sa iyang mga tinun-an sa gabii una siya mamatay ug ang iyang makapatandog nga pag-ampo alang kanila. Mapasalamaton kaayo ta nga gisulat ni Juan kining tanan aron dasigon ang tanang Kristohanon.
Niana pong panahona, gigiyahan ni Jehova si Juan sa paghimog tulo ka makapadasig nga sulat ngadto sa iyang mga igsoon sa pagtuo. Maisogon niyang giyagyag ang apostasya nga nagsugod na niadtong panahona, ug iyang gipasidan-an ang mga Kristohanon nga dili gyod sila angayng makig-uban sa mga apostata, o bisan gani mangomosta kanila. Ang iyang mga sulat puno pod sa gugma ug paglaom. Nagtudlo si Juan nga “ang Diyos gugma,” ug gipakita sa apostol ang maong gugma diha sa iyang kinasingkasing nga pagdasig ug mga tambag. Gisulat sab niya kon unsa siya ka malipayon nga ang iyang espirituwal nga mga anak padayong “naglakaw sa kamatuoran.” Ang iyang mga sulat seguradong nakadasig sa daghan nga padayong maglakaw sa kamatuoran.
Dili na gyod maatubang sa mga Kristohanon karon ang apostasya nga naatubang ni Juan. Bisag naa gihapoy apostasya, dili na ni makapahinabog grabeng kadaot sa Kristohanong kongregasyon nga sama niadtong nahitabo sulod sa gatosan ka katuigan human mamatay si Juan. (Isa. 54:17; Buh. 3:21) Pero sama kang Juan, makaatubang tingali tag mga kalisdanan, paglutos, ug pagkabilanggo. Busa sundogon nato ang iyang ehemplo. Bisag unsa pay mahitabo, magmadeterminado ta nga magpadayon sa paglakaw nga maisogon uban sa Diyos!
Basaha ang asoy sa Bibliya:
Pakighisgot:
Sa unsang mga paagi nga si Juan nagpakitag kaisog?
Tun-ig Dugang
1. Unsay nagpakita nga si Juan agresibo ug kinaiya kaniadto? (bt 33, kahon ¶3-4)
2. Nganong si Juan gitawag ug ‘ordinaryong tawo ug dili edukado’? (Buh. 4:13; w08 5/15 30 ¶6)
3. Unsay ipasabot nga si Juan magpabilin hangtod sa pag-anhi ni Jesus? (Juan 21:22; w05 1/15 13 ¶14-15)
4. Nganong makaseguro ta nga si Juan ang nagsulat sa ikaupat nga Ebanghelyo? (it “Juan, Maayong Balita Sumala ni” ¶2-8) A
Fondation Martin Bodmer, Cologny (Genève)
Hulagway A: Manuskrito nga gikan pa niadtong mga 200 C.E. nga may ulohang (gi-highlight) “Maayong Balita Sumala ni Juan”
Hunahunaa ang mga Leksiyon
Sa mga basahon sa Bibliya nga gisulat ni Juan, kapig 100 ka beses niyang gihisgotan ang paghalad ni Jesus sa iyang kinabuhi o ang mga kaayohan sa maong halad. Unsaon nato pagsundog si Juan sa pagpakitag apresasyon sa halad ni Jesus?
Halos 100 ang pangedaron ni Juan dihang gigamit siya ni Jehova sa pagsulat ug lima ka basahon sa Bibliya. Unsay gitudlo niini kanato bahin sa panglantaw ni Jehova sa mga edaran? B
Hulagway B
Sa unsang mga paagi masundog nimo ang kaisog ni Juan?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Nganong mapasalamaton ka nga si Juan gipili nga magmando uban sa Kristo didto sa langit?
Pagkat-og Dugang
Posible bang masundog sa edarang mga igsoon ang kaisog ni Juan?
Si Juan daghag gisulat bahin sa gugma. Sayra kon unsay atong makat-onan gikan sa iyang mga sinulat ug sa iyang ehemplo.
“Ang Atong Makat-onan sa ‘Tinun-an nga Gihigugma ni Jesus’” (w21.01 8-13)