8 JOSE
Gisuklan Niya ang Tentasyon
SUKAD pa sa pagkabata ni Jose, gihigugma siya pag-ayo ug gihatagag espesyal nga atensiyon sa iyang amahan nga si Jacob ug sa iyang Diyos nga si Jehova. Pero wala na magpasabot nga hayahay ang kinabuhi ni Jose. Ang tinuod, gidumtan siya sa iyang mga igsoon. Kay gihatagan siyag espesyal nga pagtagad ni Jacob, ang mga igsoon ni Jose nasina ug dili maayog pagtratar kaniya. Dugang pa, gipadamgo siya ni Jehova. Ang maong mga damgo nagtagna nga moabot ang panahon nga ang iyang pamilya moyukbo kaniya, ug tungod niana misamot ang pagdumot sa iyang mga igsoon.
Usa ka adlaw niana, dihang mga 17 anyos si Jose, gisugo siya ni Jacob nga susihon ang kahimtang sa iyang mga igsoon. Aron mahimo ni, kinahanglan siyang molakaw ug pipila ka adlaw. Pag-abot ni Jose didto, ila siyang gihukasan, gigunitan, ug gihulog sa gahong nga walay tubig. Nagpakitabang siya pero wala nila siya tagda. Nagplano sila nga patyon siya, pero midesisyon sila nga ibaligya na lang siya sa nangagi nga mga negosyante. Sa ulahi, gipatuo nila si Jacob nga ang iyang pinanggang si Jose gipatay ug bangis nga mananap. Pero ang tinuod, si Jose gidala sa layong lugar didto sa Ehipto, diin gibaligya siya ingong ulipon ngadto kang Potipar, nga opisyal sa gobyerno sa Paraon.
Tungod sa mga panghitabo, posibleng mawad-ag paglaom si Jose. Pero nagpakita siyag kaisog ug kakugi. Busa atong mabasa: “Si Jehova nag-uban kaniya.” Gipaneguro ni Jehova nga magmalamposon ang tanang himoon ni Jose. Gisaligan siya ni Potipar sa pag-atiman sa iyang tibuok nga panimalay.
Pero mitungha na pod ang laing problema. “Si Jose nagdako nga maayog pamarog ug guwapo,” ug naibog niya ang asawa ni Potipar. Wala niya itago ang iyang pagbati. Gani iyang giingnan si Jose: “Dulog nako.” Unsa kahay himoon ni Jose? Layo kaayo ang iyang pamilya. Ulipon ra siya, ug ang iyang mga agalon makabuot kon unsay ilang himoon kaniya. Kaya gyod niining bayhana nga lisodlisoron ang iyang kinabuhi. Nagpatental ba si Jose kaniya? O may kaisog siya sa pagbalibad?
Nahibalo si Jose nga kaya sa asawa sa iyang agalon nga lisodlisoron ang iyang kinabuhi, busa sa unsang paagi niya nasuklan ang tentasyon?
Ang Bibliya nag-ingon: “Siya mibalibad.” Si Jose miingon nga dili niya budhian si Potipar kay dako kinig pagsalig kaniya. Labaw sa tanan, giingnan ni Jose ang babaye: “Dili ko makaako sa pagbuhat niining dakong pagkadaotan ug magpakasala sa Diyos!” Tungod sa gugma ni Jose sa iyang Amahan nga si Jehova, dihadiha maisogon siyang mibalibad. Pero wala gyod siya lung-i sa asawa ni Potipar. “Adlaw-adlaw” niyang gitental si Jose. Usa ka adlaw niana, dihang walay mga sulugoon sa sulod sa balay, gibira niya ang besti ni Jose ug miingon: “Dulog nako!” Milugnot si Jose ug midagan. Pero nabiyaan niya ang iyang besti. Sa ulahi, gipakita kini sa babaye ngadto kang Potipar ug miingon nga lugoson unta siya ni Jose. Nasuko pag-ayo si Potipar ug iyang gipapriso si Jose.
Karon naa siya sa ngitngit nga prisohan. Dihay higayon nga ang iyang mga tiil gikadenahan ug ang iyang liog gibutangan ug puthaw nga kadena. (Sal. 105:17, 18) Puwede untang mawad-ag paglaom si Jose. Gibiyaan ba siya ni Jehova? Wala! Ug wala gyod mawad-ig pagsalig si Jose sa iyang Diyos. Gipanalanginan siya ni Jehova. Sa wala madugay, gihatagan siyag dakong responsibilidad didto sa prisohan. Nagkugi siya ug maisogong milahutay sulod sa katuigan.
Tungod sa pagtuo ug kaisog ni Jose, padayon siyang gigamit ni Jehova. Dihay panahon nga gipadamgo sa Diyos ang Paraon ug duha ka damgo ug Iyang gipahinabo nga si Jose ang magpatin-aw niana. Giingnan ni Jose ang hari nga ang mga damgo nagtagna ug pito ka tuig nga abunda ang pagkaon ug sundan kinig pito ka tuig nga gutom. Nakadayeg pag-ayo ang Paraon kang Jose maong iyang gitudlo si Jose ingong tigdumala aron maandam ang nasod sa umaabot nga gutom. Taas ang iyang posisyon; ikaduha siya sa Paraon. Tungod niana, naluwas ni Jose dili lang ang mga Ehiptohanon kondili apil sab ang iyang kaugalingong pamilya. Dihang ang mga igsoon ni Jose nangadto sa Ehipto aron mopalit ug pagkaon, miyukbo sila kaniya. Wala silay kalibotan nga manghod nila ang ilang giyukboan. Ang gipadamgo ni Jehova kang Jose niadtong batan-on pa siya natuman. Pero gipakita sab sa iyang mga igsoon nga paglabay sa panahon, nagbag-o na sila. Ang igsoon nga ilang gidumtan kaniadto nagluwas kanila, sa ilang amahan, ug sa umaabot nga nasod sa Israel. Naposible ni kay siya nagpakitag kaisog ug wala mawad-ig pagtuo kang Jehova.
Basaha ang asoy sa Bibliya:
Pakighisgot:
Sa unsang mga paagi nga si Jose nagpakitag kaisog?
Tun-ig Dugang
1. Unsay nagpamatuod nga tukma kini nga asoy bahin sa kinabuhi ni Jose sa Ehipto? (g 11/10 15 ¶2)
2. Giunsa pagkahibalo ni Jose nga giisip ni Jehova nga “dakong pagkadaotan” ang pagpanapaw? (Gen. 39:9; w22.08 26 ¶2)
3. Nganong gitugotan ni Jehova si Jose nga mahimong primer ministro sa Ehipto? (w96 5/1 11 ¶4) A
Hulagway A
4. Unsay nagpakita nga lig-on gihapon ug pagtuo si Jose bisan niadtong 110 anyos na siya? (Gen. 50:25, 26; w07 6/1 28 ¶10-11) B
Hulagway B
Hunahunaa ang mga Leksiyon
Unsaon nimo pagsundog si Jose dihang dili maayo ang pagtratar sa igsoon kanimo? (Gen. 45:4, 5; 50:19-21)
Bisag layo si Jose sa iyang pamilya, maunongon siya kang Jehova. Sa unsang paagi ang iyang ehemplo makatabang nato dihang kita . . .
naa sa eskuwelahan? C
Hulagway C
nagbiyahe? D
Hulagway D
naggamit ug smartphone o ubang gadyet? E
Hulagway E
Unsaon nimo pagsundog ang kaisog ni Jose?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Unsay akong ipangutana kang Jose dihang banhawon na siya?
Pagkat-og Dugang
Gitugotan ni Jehova nga makaatubang si Jose ug pagsulay, pero Iyang gitabangan si Jose nga makalahutay. Sayra kon unsaon sab ka pagtabang ni Jehova.
Unsaon pagsundog sa mga bata si Jose dihang trataron sila sa uban sa dili maayong paagi?