42 MARIA
Ang Kaisog sa Pagdawat ug Bug-at nga Asaynment
UNSA ang kinabug-atang asaynment nga gihatag sukad ni Jehova sa usa ka dili hingpit nga tawo? Kana ang nadawat sa usa ka batan-ong Hudiyong ulay nga ginganlag Maria. Usa ka adlaw niana, dihang tua siya sa iyang balay sa Nasaret sa Galilea, kalit nga miabot ang usa ka talagsaon kaayo nga bisita—ang anghel nga si Gabriel!
Ang anghel miingon: “Maayong adlaw. Ikaw giuyonan pag-ayo ni Jehova ug siya nagauban kanimo.” Sa primero, si Maria “naglibog” ug natingala. Para niya, dili siya angayan sa maong pagdayeg. Gihupay siya ni Gabriel ug giingnan nga siya “giuyonan sa Diyos.” Dayon giingnan siya bahin sa espesyal nga asaynment nga gikan kang Jehova. Ang anghel miingon: “Ikaw magmabdos ug manganak ug batang lalaki.” Pero dili lang kay kana. Si Gabriel midugang: “Siya mahimong bantogan ug tawgong Anak sa Labing Hataas, ug ihatag ni Jehova nga Diyos kaniya ang trono ni David nga iyang amahan.” Ang iyang anak magmando unya ingong Hari.
Kaslonon pa lang si Maria ug wala pa siya sukad makigdulog ug lalaki. Busa nagmaisogon siya ug nangutana: “Unsaon man pagkahitabo niana?” Gipatin-aw ni Gabriel nga ang gahom ni Jehova, ang iyang balaang espiritu, “molandong” kang Maria. Tungod niana, manamkon siyag hingpit nga bata nga “tawgong balaan, Anak sa Diyos.” Giingnan sab siya sa anghel kon unsay gihimo ni Jehova para sa iyang paryente nga si Elisabet. Igo na to nga pasalig kang Maria. Siya mapainubsanong miingon: “Ania ang ulipong babaye ni Jehova! Matuman unta kanako ang imong gisulti.” Iyang giisip si Jehova ingong iyang mahigugmaong Agalon ug giisip niya ang iyang kaugalingon ingong masinugtanong ulipon. Siya masaligon nga kon buhaton niya ang kabubut-on sa Diyos, siya tabangan ug panalipdan ni Jehova. Kana nga panglantaw nakahatag niyag kaisog sa pagdawat sa maong importante kaayong asaynment.
Human makabiya ang anghel, si Maria mipanaw aron makigkita kang Elisabet. Gipalig-on ug gitabangan nila ang usag usa aron maandam sila sa ilang bag-ong mga responsibilidad. Gisulti ni Maria kon unsay iyang pagbati bahin kang Jehova. Gipakita sa iyang mga pulong kon unsay tinubdan sa iyang kaisog. Dili kaayo taas ang iyang gisulti, pero kapig 20 ka beses niyang gikutlo ang Hebreohanong Kasulatan! Dako gyod ang pagtuo ni Maria, ug gipamalandong niya pag-ayo ang Pulong sa Diyos. Busa nakaila siya pag-ayo kang Jehova, ug nahibalo siya nga makasalig siya sa mga saad sa Diyos. Si Maria nagpabilin uban kang Elisabet sulod sa mga tulo ka bulan ug dayon siya mipauli. Nagkinahanglan siyag dakong kaisog aron sultihan si Jose nga mabdos siya ug kon sa unsang paagi na nahitabo. Sa primero, dili makatuo si Jose sa gisulti ni Maria. Pero gitabangan siya sa anghel ni Jehova nga masabtan nga tinuod ang gisulti ni Maria.
Naminyo si Maria ug Jose, ug nangandam sila sa pagpanganak ni Maria. Dihang hapit na siyang manganak, ang emperador nagpakanaog ug sugo nga ang tanan kinahanglang manguli sa siyudad nga ilang natawhan aron magparehistro. Busa si Jose ug Maria nangadto sa Betlehem. Lisod kaayo para kang Maria nga mopanaw ug mga 150 kilometros (93 ka milya) sakay sa usa ka asno. Pero miadto gihapon siya. Dayon nanganak siya diha sa usa ka kuwadra ug gipahigda ang bata diha sa pasungan. Bisan pag lisod ang kahimtang, si Maria nagmaisogon ug misalig kang Jehova. Determinado siya nga himoon ang iyang maarangan aron maatiman ang iyang pinalanggang anak.
Si Maria gihatagan sa usa ka anghel ug asaynment nga gikan sa Diyos nga wala sukad ihatag ngadto sa usa ka tawo
Si Maria nagkinahanglag kaisog sa umaabot nga mga adlaw ug katuigan. Siya nagkinahanglan niini dihang siya, si Jose, ug ang batang si Jesus mikalagiw ngadto sa Ehipto kay gustong patyon ni Haring Herodes ang bata. Nagkinahanglan siya niini samtang siya ug si Jose nag-atiman sa labing menos unom pa nila ka anak bisan pa sa ilang kapobrehon. Nagkinahanglan siya niini dihang ang iyang minahal nga bana nga si Jose namatay, lagmit sa wala pa mahimong Mesiyas si Jesus. Nagkinahanglan siya niini dihang si Jesus mibiya aron tumanon ang iyang asaynment. Labaw sa tanan, nagkinahanglan siya niini dihang si Jesus giakusahan, gihusay, ug gipatay. Sa ulahi, nagkinahanglan siyag kaisog nga mahimong usa sa mga sumusunod ni Jesus kay ang mga Hudiyo nagdumot kanila.
Bug-at gyod ang asaynment ni Maria! Unsay nakatabang niya nga magmaisogon sa pagtuman niana? Gipakita sa Bibliya nga sa matag higayon nga naay makat-onan si Maria nga makapalig-on sa iyang pagtuo, iya nang tipigan sa iyang kasingkasing. Tungod niana, daghan kaayo siyag espirituwal nga bahandi nga mapamalandong. Ang pipila niana gikan sa Pulong sa Diyos ug ang uban gikan sa mga alagad ni Jehova, anghel man o mga tawo. Ang uban sab gikan mismo sa iyang anak. Ang pagpamalandong sa espirituwal nga mga kamatuoran nakatabang kang Maria sa pag-atubang sa matag pagsulay nga iyang nasinatian.
Basaha ang asoy sa Bibliya:
Pakighisgot:
Sa unsang mga paagi nga si Maria nagpakitag kaisog?
Tun-ig Dugang
1. Unsay nagpamatuod nga tinuod ang gihisgotan sa Lucas 2:1-3? (g 4/11 11 ¶4-5) A
British Library, London, UK, from the British Library archive/Bridgeman Images
Hulagway A: Senso nga gimando sa Romanong gobernador sa Ehipto, 104 C.E.
2. Nganong lisod para kang Maria ang panaw paingon sa Betlehem? (ia 153-155 ¶4-7)
3. Niadtong masuso pa si Jesus, usa ka matinumanong tawo ang miingon kang Maria: “Usa ka taas nga espada ang molapos kanimo.” Sa unsang paagi kini natuman? (Luc. 2:35, footnote; w08 3/15 30 ¶8)
4. Nganong makaingon tingali ta nga si Maria tua na karon sa langit? (w18.07 10 ¶14) B
Hulagway B: Si Maria ug ang iyang mga anak didto sa Jerusalem sa mga adlaw una pa ang Pentekostes 33 C.E.
Hunahunaa ang mga Leksiyon
Dihang si Maria nanginahanglag kusog ug pagdasig, giduaw niya si Elisabet. (Luc. 1:39, 40) Nganong maayo nga mangayo tag tabang dihang mag-atubang tag pagsulay o maglisod ta sa usa ka asaynment? C
Hulagway C
Si Maria kaslonon na kang Jose, pero kang Maria unang gipadala ni Jehova ang iyang anghel. Unsay makat-onan nato niini bahin sa panglantaw ni Jehova sa matinumanong mga babaye?
Unsaon nimo pagsundog ang kaisog ni Maria?
Pamalandonga Kini
Unsay akong nakat-onan bahin kang Jehova niini nga asoy?
Sa unsang paagi kini nga asoy konektado sa mga katuyoan ni Jehova?
Nganong mapasalamaton ka nga si Maria lagmit gipili nga magmando uban sa Kristo didto sa langit?
Pagkat-og Dugang
Sayra kon sa unsang paagi makugihong giatiman ni Maria ang iyang mga anak.
“Unsay Gitudlo Kanato sa Ehemplo ni Maria?” (w09 1/1 5 ¶5–6 ¶2)
Unsa kahay gibati ni Maria dihang giingnan siya ni Gabriel bahin sa talagsaon ug bug-at nga asaynment nga gihatag ni Jehova kaniya?