An ka nafa sɔrɔ koɲuman foro baara ka lajɛw la
1 Foro baara ka lajɛ ɲɛnamaw bɛ dusu don an kɔnɔ sɛbɛ la, u bɛ dɔnniya nafama di an ma sanni an ka taa cidenyabaara la. U b’a to an ni weleweledala tɔw bɛ seereya kɛ ɲɔgɔn fɛ jama na, ka ɲɔgɔn kɔkɔrɔdon ani ka ɲɔgɔn dege. (Nt. 27:17; Waaj. 4:9, 10) An bɛ se ka mun kɛ walisa ka nafa sɔrɔ koɲuman o lajɛw la?
2 Ɲɛminɛbaga: Foro baara ka lajɛw la, baro bɛna kɛ yɔrɔ kɛrɛnkɛrɛnnen minnu kan, olu tɛ di ɲɛminɛbaga ma. O kosɔn, ni i bɛna lajɛ ɲɛminɛ, o tɛ taa labɛn koɲuman kɔ. I kana sin k’a fɔ ko i bɛ kuma texte du jour kan, hali ni i bɛ se ka o sen don i ka baro la, ni a y’a sɔrɔ a kɔnɔkumaw bɛ cidenyabaara kan. I ka miiri fɛn nafama la min bɛna se ka mɔgɔw dɛmɛ, mɔgɔ minnu bɛna seereya kɛ o don na. Misali la, i bɛ se ka baro kɛ ɲɛjirali dɔ kan walima ka ɲɛjirali dɔ kɛ. I bɛ se ka Comment raisonner walima Tirer profit de l’École du ministère théocratique gafe yɔrɔ dɔ lajɛ, walima i bɛ se ka kuma Baara ka lajɛ laban yɔrɔ dɔ kan. Tuma dɔw la i bɛ se k’a jira gɛlɛya dɔ bɛ ɲɛnabɔ cogo min na, ni o wulila waajulikɛyɔrɔ la. Walima i bɛ se k’a fɔ, fɛn min bɛ se ka kɛ walisa kibaru duman ka diya mɔgɔw ye ka taa a fɛ, ka Bibulu-kalanw daminɛ, kɛrɛnkɛrɛnnenya la ni a y’a sɔrɔ mɔgɔ caman bɛna segin-ka-bɔnyew kɛ. I bɛna kuma fɛn o fɛn kan, i ka kɛ mɔgɔ ye min nisɔn ka di, ani min bɛ dusu don mɔgɔw kɔnɔ.
3 Lajɛ daminɛ lɛrɛ la, hali ni i b’a dɔn ko dɔw bɛna na lɛrɛ kɔfɛ. Jateminɛ kɛ koɲuman ni i bɛna mɔgɔw tila k’o kɛ kuluw ye. Waajulikɛyɔrɔ di mɔgɔw ma minnu mago b’a la. Lajɛ janya man kan ka tɛmɛ sanga 10-15 kan, a ka kan ka surunya ni o ye, ni a bɛ kɛ jɛkulu ka lajɛ dɔ kɔfɛ. Sanni i ka lajɛ kuncɛ, mɔgɔ kelen-kelen bɛɛ ka kan k’a dɔn ale ni min bɛ bɔ ɲɔgɔn fɛ, ani u ka kan ka taa baara kɛ yɔrɔ min na. Lajɛ ka kan ka kuncɛ ni delili ye.
4 Aw bɛɛ bɛ se ka dɛmɛ don: I n’a fɔ jɛkulu ka lajɛ tɔw la, an b’a jira ko an bɛ bonya da Jehowa kan ani ko an bɛ mɔgɔ tɔw bonya, ni an bɛ na lɛrɛ la. Aw ka aw sen don baro la. Aw bɛ se k’a to lajɛ ɲɛminɛbaga ka aw ni dɔ bila ɲɔgɔn fɛ, walima sanni lajɛ ka daminɛ aw bɛ se ka kɔn ka aw ka kow labɛn walisa aw ni mɔgɔ wɛrɛ ka bɔ ɲɔgɔn fɛ. Ni aw b’o de fɛ, aw k’aw jija ka aw “dusu lafɛrɛ” aw kɛtɔ ka baara kɛ ni weleweledala caman wɛrɛw ye, sanni aw ka baara kɛ tuma bɛɛ ni aw teriw dɔrɔn ye. (2 Kɔr. 6:11-13) Ni lajɛ kuncɛla kaban, kow labɛnna cogo min na, aw kana olu yɛlɛma. Aw ka aw kunsin o yɔrɔnin bɛɛ la aw ka waajulikɛyɔrɔ ma.
5 Foro baara ka lajɛw kɛkun, ani jɛkulu ka lajɛ tɔw kɛkun ye kelen ye. Lajɛw sigira sen kan walisa “an ka an janto ɲɔgɔn na walisa ka ɲɔgɔn jija kanuya ni kɛwale ɲuman kɛli la.” (Heb. 10:24, 25) Ni an b’an jija ka nafa sɔrɔ o lajɛw la, an bɛna dɛmɛ sɔrɔ ka an ka cidenyabaara kɛ a cogo la—o dun ye ‘kɛwale ɲuman’ ye tiɲɛ na!
[Study Questions]
1. Foro baara ka lajɛw bɛ se k’an dɛmɛ cogo jumɛn na?
2. Ɲɛminɛbaga bɛ se ka kuma fɛn damadɔ jumɛnw kan?
3. Waati joli ka kan ka kɛ foro baara ka lajɛ la? Mun ka kan ka kɛ o waati kɔnɔna na?
4. Mun bɛna bɛɛ dɛmɛ ka nafa sɔrɔ koɲuman foro baara ka lajɛw la?
5. Foro baara ka lajɛw kɛkun ye mun ye?