Laadilikan dɔw walasa forobaara lajɛw ka nɔ bɔ

I n’a fɔ jɛkulu ka lajɛ tɔw, forobaara lajɛw fana ye Jehova ka ko sigilen dɔ ye, min b’a to an bɛ ɲɔgɔn jija kanuya ni kɛwale ɲumanw kɛli la. (Heburuw 10:24, 25) O lajɛw janya ka kan ka kɛ miniti duuru ka taa miniti wolonwula la, wa grupuw tilatilali, waajulikɛyɔrɔ dili mɔgɔw ma, ani delili kɛli sen bɛ o minitiw la. (Ni o lajɛ bɛ kɛ lajɛ wɛrɛ kɛlen kɔ dɔrɔn, o la a janya ka kan ka surunya tuguni.) Mɔgɔ min bɛna o lajɛ ɲɛminɛ, o tigi ka kan ka fɛn dɔ labɛn min bɛna mɔgɔw nafa minnu bɛna u sen don waajulibaara la o don na. Misali la, Sibiridon na, ni mɔgɔ minnu nana waajuli la, olu caman ma u sen don waajuli la kabini wikɛni tɛmɛnnen, a bɛ ɲɛ kosɛbɛ aw ka baro kɛ dɔrɔn fɛn dɔ kan aw bɛ se ka min fɔ waajuli kɔnɔna na. Nafa bɛ se ka kɛ baro kɛli la barokun minnu kan, olu dɔw ye jumɛnw ye?

• Baro kɛcogo misali dɔ, ka bɔ An ka krecɛnya ni an ka waajulibaara—Lajɛ sɛbɛn kɔnɔ

• Baro bɛ se ka daminɛ ni ko kɛlen kura dɔ walima kunnafɔni kura dɔ ye cogo min na

• Baro-jɔ-kuma minnu bɛ to ka lawuli mɔgɔw fɛ ka caya, olu dɔ bɛ jaabi cogo min na

• Nin mɔgɔ ninnu jaabi cogo: Mɔgɔ min dalen tɛ Ala ko la, yɛlɛma-yɛlɛmali lafasabaga, kan wɛrɛ fɔbaga walima diinɛ min mɔgɔw man ca kosɛbɛ aw ka waajulikɛyɔrɔ la, o diinɛ mɔgɔ dɔ

• Baara kɛcogo ni jw.org siti fɛn dɔ, JW Library^® Application fɛn dɔ, walima Bibulu fɛn dɔ

• Baara bɛ kɛ cogo min na ni Mɔgɔw kalanni baarakɛminɛnw dɔ la kelen ye

• Waajuli fan kɛrɛnkɛrɛnnen dɔ kɛcogo, i n’a fɔ seereya dili telefɔni fɛ, lɛtɛrɛw sɛbɛnni, seereya dili forobayɔrɔw la, segin-ka-bɔnyew, walima Bibulukalanw

• Hakilijiginw kɛ nin kow kan: Lakana ko, yɛlɛma dɔw kɛli, kow kɛcogo ɲumanw, hakilina ɲuman sɔrɔli, walima o ko ɲɔgɔnna wɛrɛw

• I jija kalanjɛ ani mɔgɔw kalanni na gafenin kalansen dɔ walima a wideyo dɔ

• I ni mɔgɔ min bɛ ka waajuli kɛ ɲɔgɔn fɛ, cogo min na i bɛ dusu don o kɔnɔ ani ka a dɛmɛ

• Tɛmɛsira dɔ min bɛ kuma waajuli kan, walima ko dɔ min kɛra waajulibaara kɔnɔna na min bɛ dusu don mɔgɔ kɔnɔ