Ɲininkaliw Jaabi

◼ Kunnafoni jumɛnw ka kan ka di jɛ-ka-bɔ lajɛw la?

Jɛ-ka-bɔ lajɛ kun ye k’an dɛmɛ an k’an sinsin nin ci kan: cidenyabaara. O la sa, lajɛ ɲɛminɛbaga ka kan k’i yɛrɛ labɛn koɲuman walasa ka se ka fɛn nafama ni fɛn jɔnjɔn fɔ min bɛ dusu don mɔgɔ kɔnɔ. Ni don tɛmɛsira sɛgɛsɛgɛta bɛ wajuli baara kan, o bɛ se ka kalan, baro surun fana bɛ se ka kɛ o kan. Nka, lajɛ ka kan ka sinsin cidenyabaara de kan fɔlɔ, ani mɔgɔ minnu bɛ taa wajuli la, k’olu bɛɛ dɛmɛ u labɛnnen ka kɛ kosɛbɛ walasa ka cidenyabaara kɛ o don na.—2 Tim. 4:5.

Baara bɛ se ka kɛ ni An ka Masaya Cidenyabaara yɔrɔ minnu ye, baro bɛ se ka kɛ olu kan walasa bɛɛ ka sɛbɛn jirataw n’u jiracogo dɔn. Sɔn-ni-sɔn gafeninw don na, ɲɛjirali dɔ bɛ se ka kɛ barokun kan, n’o ye ko: “Mun bɛ se ka fɔ sɔn-ni-sɔn gafeninw ko la”. Fɛn min ye sɛbɛn jirata wɛrɛw ye, sinsin bɛ se ka kɛ Comment raisonner gafe kumadaminɛcogo kelen walima fila kan, kumadaminɛcogo minnu bɛnnen don sigida wajulikɛyɔrɔ mɔgɔw ma. Baro, walima ɲɛjirali bɛ se ka kɛ cidenyabaara ɲɛ dɔ kan, i n’a fɔ baara bɛ kɛ ni Bibulu ye da dɔ la cogo min na, walima kuma kɔkarikuma dɔ bɛ se ka kunbɛn cogo min na, walima Bibulu kalan bɛ kofɔ cogo min na, walima yɛrɛ, dɔ bɛ fara mɔgɔ dɔ ka mago jiralen kan cogo min na.

Jɛ-ka-bɔ lajɛw man kan ka sanga 10, walima sanga 15 tɛmɛ. Ka mɔgɔw tila, ka wajulikɛyɔrɔ jira, ani ka delili kɛ, o fɛnw bɛɛ ka kan ka kɛ o waati kɔnɔna na. Ni mɔgɔw bɛ fara ɲɔgɔn na tuma min na, mɔgɔ bɛɛ ka kan k’a dɔn a ni jɔn don, ani u bɛna yɔrɔ min baara. U ka kan ka taa wajulikɛyɔrɔ la o yɔrɔnin bɛɛ la. Ikomi lajɛ de don min tɛ mɛn, nafa b’a la bɛɛ ka na ka bɛn waati ma. N’a y’a sɔrɔ jɛ-ka-bɔ lajɛ bɛ kɛ jɛkulu ka lajɛ dɔ kɔfɛ, i n’a fɔ La Tour de Garde kalan, a kuntaala man kan ka janya ka lajɛ tɔw bɔ. A kun tɛ ka baro kɛ don tɛmɛsira sɛgɛsɛgɛta kan, k’a masɔrɔ baro ɲɛnama kɛra Bibulu kan kaban.

Balimakɛ batiselen mankutulenw ka kan ka kɔn ka sugandi jɛ-ka-bɔ lajɛ kelen-kelen bɛɛ ɲɛminɛni kama. Ni don kɛrɛnkɛrɛnnen dɔ la, olu si tɛ yen walasa k’o ɲɛminɛ, maakɔrɔw ka kan k’a lajɛ balimamuso minnu bɛ se ka sugandi k’o kɛ, n’o ko sugu nana kɛ. K’a sigilen to, balimamuso bɛ se ka baro kɛ kulu mɔgɔw fɛ don tɛmɛsira sɛgɛsɛgɛta kan, walima fɛn wɛrɛ kan min ɲɛsinnen bɛ foro baara ma. Nka, a ka kan k’a ka kumaw surunya. A ka kan fana k’a kun datugu.

Jɛ-ka-bɔ lajɛw ye cogo nafamabaw ye an bolo walasa ka dusulamin sɔrɔ, ka se k’an labɛn cidenyabaara kama. Ni ɲɛminɛbaga labɛnnen don kosɛbɛ, nafa min bɛ sɔrɔ o la, o fana bɛ bonya ka t’a fɛ bɛɛ bolo.