Yali i bɛ se k’i ka so labila wa?

¹ San kɛmɛ fɔlɔ la, Kerecɛn caman tun ye u ka sow labila jɛkulu ka lajɛw kama. (1 Kɔr. 16:19; Kol. 4:15; Flm. 1, 2) Jɛkulu dɔw kɔnɔ bi, yɔrɔ bɛrɛ tɛ yen jɛkulu ka gafe kalanw ni foro baara lajɛw bɛ se ka kɛ yɔrɔ minnu na. O kɛra sababu ye gafe kalan dɔw la, mɔgɔw hakɛ ye 30 ye, walima a ka ca ni o ye. Hakɛ bɛnnen kofɔlen dun ye mɔgɔ 15 ɲɔgɔn ye.

² Bonya ɲumanba: Yali i miirila k’i ka so labila jɛkulu ka gafe kalan kama wa? Soden min kɔnɔ fɛrɛlen bɛ, n’a saniyalen don, ni yeelen b’a kɔnɔ kosɛbɛ, wa ni fiɲɛ bɛ tɛmɛn koɲuman a fɛ, o ye lajɛ kɛyɔrɔ ɲuman ye. Ikomi gafe kalan ye jɛkulu ka lajɛ dɔ ye, Jehowa ka ko sigilen fana don walisa k’a ka jama kalan, o la sa, gafe kalan ka kɛ i ka so, o ye bonya ɲumanba de ye. Mɔgɔ caman y’a fɔ ko u kɛlen k’u ka so labila o cogo la, u ye nafa caman sɔrɔ alako ta fan fɛ.

³ Ni e ɲɛ na, soden bɛnnen b’i bolo, cogo bɛɛ la i k’o fɔ maakɔrɔw ye. I b’a sɔrɔ u bɛ ka yɔrɔw ɲini. Ni gafe kalan tɛ se ka kɛ i ka so, yali foro baara lajɛw bɛ se ka kɛ i bara wa? Hali ni yɔrɔ dɔ mago tɛ yen fɔlɔ, maakɔrɔw bɛna i waleɲumandɔn k’a dɔn ko i ye i ka so labila o kama. Laala, i bɛna o bonya sɔrɔ don nataw la.

⁴ Jogo ɲumanw jira: Ni mɔgɔw lajɛlen don tuma min na dɔ ka so, bɛɛ ka kan ka bonya jira o tigi ka so koɲɛ ko la. Bangebagaw ka kan k’a sɛgɛsɛgɛ k’u denw tolen bɛ yɔrɔw la minnu yamaruyara u ye, ani k’u tɛ ka taa so yɔrɔ wɛrɛw la. Bonya fana ka kan ka kɛ ka ɲɛsin sigiɲɔgɔnw ma, ka an yɛrɛ kɔlɔsi walisa an kana u tɔɲɔn fu.​—⁠2 Kɔr. 6:​3, 4; 1 Pi. 2:⁠12.

⁵ Heburuw 13:16 bɛ dusu don an kɔnɔ ko an kana ɲinɛ ka ko ɲuman kɛ, ‘ka fɛnw tila anw ni tɔw cɛ, bawo o saraka suguw de ka di Ala ye.’ Ka i ka so labila jɛkulu ka lajɛ kelen kama, o ye cogo ɲuman ye ka fɛn ɲumanw tila anw ni tɔw cɛ, ka ‘Jehowa bonya ni an bolofɛn nafamaw ye.’​—⁠Nt. 3:⁠9.