Jɛkulu ka gafe kalan b’an dɛmɛ cogo min na
1. An ka dɔgɔkun lajɛ duuru b’an dɛmɛ cogo jumɛn na?
1 Lajɛ duuru de b’an bolo dɔgɔkun o dɔgɔkun. U ɲɛminɛcogo ni u kuntilenna tɛ kelen ye. Nka, u kelen-kelen bɛɛ nafa ka bon kosɛbɛ walisa k’an dɛmɛ an ka an janto ɲɔgɔn na, ka dusu don ɲɔgɔn kɔnɔ kanuya ni kɛwale ɲumanw kɛli la. (Heb. 10:24, 25) Nafa jumɛnw de bɛ jɛkulu ka gafe kalan la, ni o nafaw ni jɛkulu ka lajɛ tɔw taw tɛ kelen ye?
2. Mɔgɔ minnu bɛ u lajɛ gafe kalan na, ni olu ye kulu fitinin ye, nafa jumɛnw bɛ o la?
2 U b’an dɛmɛ ka taa ɲɛ alako ta fan fɛ: Tuma caman na mɔgɔ minnu bɛ na gafe kalan na, olu hakɛ man ca ka mɔgɔw bɔ minnu bɛ na jɛkulu ka lajɛ tɔw la. O kosɔn, a ka nɔgɔn ka teriya don u ni ɲɔgɔn cɛ, n’o bɛ kɛ sababu ye ka dusu don ɲɔgɔn kɔnɔ alako ta fan fɛ. (Nt. 18:24) Yala i y’a ɲini ka i ka gafe kalan kɔnɔmɔgɔ kelen-kelen bɛɛ dɔn, laala, i kɛlen k’a ɲini u kelen-kelen bɛɛ fɛ aw ka cidenyabaara kɛ ɲɔgɔn fɛ wa? Gafe kalan b’a to fana gafe kalan lakɔlɔsibaga bɛ a ka kulu kɔnɔmɔgɔ kelen-kelen bɛɛ ka cogoya dɔn, ka dusu don fana u kelen-kelen bɛɛ kɔnɔ.—Nt. 27:23.
3. Cogo jumɛn na gafe kalan bɛ dusu don Bibulu kalandenw kɔnɔ ka na lajɛ la ani ka ɲɛfɔli kɛ o kɛtuma na?
3 Yala i y’a fɔ i ka Bibulu kalandenw ye u ka na i fɛ gafe kalan lajɛ la wa? Mɔgɔ minnu y’a jira ko kibaru duman ka di u ye, nka a ka gɛlɛn olu ma ka na lajɛw la minnu mɔgɔ nata ka ca, laala olu tɛna jɔrɔ kosɛbɛ ka na lajɛ fitinin dɔ la, kɛrɛnkɛrɛnnenya la balima dɔ ka so kɔnɔ. Teriya min bɛ yen, o b’a to a ka nɔgɔn denmisɛnw bolo ani mɔgɔ minnu ye kuraw ye u ka se ka ɲɛfɔli kɛ lajɛ kɛtuma na. Wa, ikomi kulu fitinin don, an bɛ se ka ɲɛfɔli kɛ siɲɛ caman na ani ka Jehowa tanu.—Zab. 111:1.
4. Gafe kalan bɛ se ka bɛn weleweledalaw ma sira jumɛnw fɛ?
4 Tuma caman na, Bibulu kalan bɛ kɛ yɔrɔw la minnu bɛnnen don waajulikɛyɔrɔ weleweledalaw ma. Hali ni weleweledala bɛɛ tɛ se ka bila gafe kalan na min yɔrɔ ka surun kosɛbɛ a la tuma bɛɛ, o bɛɛ n’a ta, weleweledala bɛna bila gafe kalan min na, o yɔrɔ bɛ se ka surunya a la ka tɛmɛ n’a tun bɛna taa jɛkulu ka lajɛ tɔw la. Gafe kalan bɛ se fana ka kɛ yɔrɔ ye lajɛ bɛ kɛ yɔrɔ min na walisa ka taa waajuli kɛ.
5. An bɛ se ka gafe kalan lakɔlɔsibaga ka dɛmɛ sɔrɔ cidenyabaara la cogo jumɛn na?
5 A b’an dɛmɛ cidenyabaara la: Gafe kalan lakɔlɔsibaga bɛ a mago don mɔgɔ kelen-kelen bɛɛ la, ka dɛmɛ lase u ma walisa u ka u sen don cidenyabaara la tuma bɛɛ, ni nisɔndiya ye, wa cogo la min bɛ nɔ bɔ. O la sa, a b’a jija ka baara kɛ ni a ka kulu kɔnɔmɔgɔ kelen-kelen bɛɛ ye, ka u dɛmɛ cidenyabaara ɲɛ caman na. Ni i y’a ye ko a man nɔgɔn i bolo ka cidenyabaara ɲɛ dɔ kɛ, i n’a fɔ ka segin ka taa bɔ mɔgɔw ye, o fɔ i ka gafe kalan lakɔlɔsibaga ye. Laala, a bɛ se ka i bila ni kulu kɔnɔmɔgɔ dɔ ye min bɛ se kosɛbɛ o la, walisa aw ka baara kɛ ɲɔgɔn fɛ. Gafe kalan lakɔlɔsibaga bɛ gafe kalan ɲɛminɛ tuma min na, n’i b’i ɲɛmajɔ a ka kalan kɛcogo ɲumanw fɛ, i bɛna se kosɛbɛ Bibulu kalan ɲɛminɛ cogo la.—1 Kɔr. 4:17.
6. Munna an ka kan k’a ɲini ka nafa sɔrɔ kosɛbɛ gafe kalan na?
6 Jɛkulu ka gafe kalan ye fɛɛrɛ ye kanuya bɛ min na tiɲɛ na. O fɛɛrɛ ɲuman min bɔra Jehowa yɔrɔ, o b’an dɛmɛ an jɔlen ka to tigitigi alako ta fan fɛ, an ka waati gɛlɛn ninnu na.—Zab. 26:12.