Aw ka aw hakili sigi ikomi laban surunyara
1 Ala ka Kuma seginna a kan siɲɛ caman k’a jira ko Jehowa ka don bɛna na iko “nson.” O kɔrɔ ye ko o don bɛna cun mɔgɔw kan, yɔrɔnin kelen, k’a sɔrɔ u hakili tɛ o la. (1 Tes. 5:2; Mat. 24:43; 2 Pi. 3:10; Jir. 3:3; 16:15) Yesu y’a fɔ “o maana” kɔnɔ, ko “an labɛnnen ka to k’a masɔrɔ an tɛ miiri ko Mɔgɔ Denkɛ bɛna na waati min na, a bɛna na o waati yɛrɛ de la.” (Mat. 24:44) Ikomi laban surunyara, an bɛ se ka to an ɲɛ na alako ta fan fɛ cogo di? A cogo ɲuman dɔ jiralen bɛ laadilikan kɔnɔ min fiyɛra ka bɔ Ala yɔrɔ, ko: Aw ka aw hakili sigi.—1 Pi. 4:7.
2 Ka an hakili sigi, o kɔrɔ ye ka fɛnw ye Jehowa ka fɛnw yecogo la. (Efɛ. 5:17) O b’an dɛmɛ an k’an yɛrɛ lajɛ iko ‘dunanw ani mɔgɔ minnu tɛna mɛn sigili la’ nin diɲɛ in kɔnɔ. (1 Pi. 2:11) O b’a to an k’a ye fana fɛn min nafa ka bon tiɲɛ na, ka kow sigi minnu ka kan ka bila jɔyɔrɔ fɔlɔ la, ani ka kow latigɛ ka ɲɛ. —Fil. 1:10.
3 Kuntilennaw sigi alako ta fan fɛ: Ka kuntilennaw sigi alako ta fan fɛ ani ka se k’u waleya, o b’an dɛmɛ ka an hakili sigi. Yali kuntilennaw bɛ i la alako ta fan fɛ, i tugulen bɛ minnu kɔ sisan wa? Yali i bɛ ka i jija ka Bibulu kalan don o don, ka na Kerecɛn lajɛw bɛɛ la, ka La Tour de Garde ni Réveillez-vous! bɔko kelen-kelen bɛɛ kalan wa? Yali i bɛ ka dɔ fara i niyɔrɔ kan cidenyabaara la wa? Ni i bɛ kuntilennaw sigi minnu bɛnnen bɛ i ma, i timinandiya u fɛ, i k’a ɲini Jehowa fɛ a ka ɲɛtaa di i ka cɛsiriw ma. Min bɛna bɔ o la, o bɛna i kabakoya.
4 Maakɔrɔ dɔ ye furuɲɔgɔn fila ɲininka u ka kuntilennaw ko la alako ta fan fɛ. O ɲininkali ye u dɛmɛ k’a ye ko ni u ye u ka ɲɛnamaya kɛcogo nɔgɔya, ka u ka jurubaw sara ka o doni bɔ u kunna, u bɛna se ka kɛ tugigɛbagaw ye. U y’a latigɛ k’o kɛ u kuntilenna ye. U ye u timinandiya k’u ka juruw sara. U ye fɛɛrɛ tigɛ ka dɔ bɔ u ka baaraw la minnu tun tɛ wajibi ye, nka ni o baaraw tun bɛ caman ta u ka waati ni u fanga la. San kelen dafara tigitigi tuma min na, u ye u kuntilennaw waleya. O kɔ kɛra mun ye? Cɛ ko: “Ni an tun ma kuntilennaw sigi, an bɛ yɔrɔ min na bi, an tun tɛna kɛ o yɔrɔ la.” An ka hɛrɛ ka bon ka tɛmɛn fɔlɔ kan. An lafiyalen don kosɛbɛ, an ka ɲɛnamaya kɛcogo fisayara kosɛbɛ fana. Kun jɔnjɔn ani kuntilenna sɛbɛ b’a la.
5 Ikomi an bɛ ka Jehowa ka don makɔnɔ, an ka to an ɲɛ na alako ta fan fɛ, ka an hakili sigi, ka Ala sago kɛli bila jɔyɔrɔ fɔlɔ la. —Ti. 2:11-13.