ƝIninkaliw Jaabi

◼ Yala Bangebaga fila bɛɛ bɛ se ka u ka waati jate, u bɛ waati min kɛ ka u denw kalan dɔgɔkun o dɔgɔkun wa?

Hali ni Faw de jɔyɔrɔ ka bon kosɛbɛ den lamɔ na ni “Matigi ka kololi ni a ka laadili ye,” bangebaga fila bɛɛ sen bɛ den lamɔ na. (Efe. 6:4) Bibulu bɛ dusu don denmisɛnw kɔnɔ ko: “Ne denkɛ, i ka i fa ka kalan lamɛn, i kana ban i ba ka laadili ma.” (Nt. 1:8) Bangebagaw ka den lamɔ yɔrɔ nafama dɔ ye denw kalanni ye.

Fɔlɔ la, bangebaga min tun bɛ kalan kɛ denmisɛnw kun minnu ma batise, ale dɔrɔn de tun bɛ waati jate, hali ni bangebaga fila bɛɛ tun sen bɛ kalan na. Nka, yɛlɛma donna o la. Ni kalan kɔnɔna na, bangebaga fila bɛɛ jɛra ka denmisɛnninw kalan, o la sa, u fila bɛɛ bɛ se ka waati min jate dɔgɔkun kɔnɔ, o cayalenba ye lɛrɛ kelen ye, i n’a fɔ foro cidenyabaara la. A jɛlen don ko tuma caman na bangebagaw bɛ waati min kɛ u denw kalanni na dɔgɔkun kɔnɔ, o ka ca ni lɛrɛ kelen ye. Ka denmisɛnninw lamɔ, o tɛ taa bangebaga fila bɛɛ ka timinandiya kɔ. (Dut. 6:6-9) Nka, an ka kalo forobaara dantigɛli sɛbɛn ka kan ka min jira fɔlɔ, o ye an ye baara min kɛ foro cidenyabaara la. O la sa, waati min ka kan ka jate dɔgɔkun kɔnɔ, o man kan ka tɛmɛ lɛrɛ kelen kan, hali ni kalan mɛnna ka tɛmɛ o kan ani a kɛra siɲɛ caman dɔgɔkun kɔnɔ, walima ni kalan kɛra denw kun u danna. Bangebaga kelenpe dɔrɔn de bɛ se ka denw ka Bibulu kalan jate ani ka segin-ka-bɔnye kelen jate dɔgɔkun o dɔgɔkun.