Mɔgɔ wɛrɛw dɛmɛ u ka Jehowa kanu
1. Mun ye dɔw sama ka na Jehowa ma?
1 I hakili b’a la siɲɛ fɔlɔ min na i ye Jehowa komɛn wa? Mun ye i sama ka na a ma? Mɔgɔ dusukun jɛlen tigi caman bɛna a fɔ ko u ye an Dabaga jogoɲumanbaw dɔn tuma min na kɛrɛnkɛrɛnnenya la a ka hinɛ ni a ka kanuya, o de ye u sama ka na a ma.—1 Yuh. 4:8.
2, 3. An bɛ se ka baara kɛ ni Qu’enseigne la Bible gafe ye walisa ka mɔgɔw kalan u k’u ka kanuya bonya ka ɲɛsin Ala ma cogo jumɛn na?
2 “An ka Ala filɛ”: Gafe min tɔgɔ ye ko Qu’enseigne la Bible, o bɛ Jehowa ka kanuya jira ka jɛya ani nafa min b’a la an kelen-kelen bɛɛ ni Ala cɛ ka ɲɛ, a bɛ o fana jira ka jɛya. Cogo jumɛn na an bɛ se ka baara kɛ ni nin sɛbɛn ye walisa ka mɔgɔw kalan u ka u ka kanuya bonya ka ɲɛsin Ala ma? N’an bɛ ka kuma fɛn kura dɔ kan min bɛ o sɛbɛn kɔnɔ, an bɛ se ka ɲininkaliw kɛ minnu bɛ kalanden bila k’a hakili jakabɔ, i n’a fɔ ninnu: “Nin tiɲɛ kuma bɛ mun jira Jehowa ko la?” walima “Nin yɔrɔ b’a jira an na cogo jumɛn na ko Jehowa ye Fa ɲuman ye min ɲɔgɔn tɛ, an tun bɛ se ka min sɔrɔ?” Ka mɔgɔ kalan o cogo la, o bɛ se ka kalanden dɛmɛ a ni Jehowa ka teriya daminɛ min bɛna mɛn a ka diɲɛlatigɛ bɛɛ kɔnɔ.
3 N’an bɛ Bibulu kalandenw dɛmɛ u k’a ye nafa min bɛ u kan ka Ala sɛbɛ ni Ala ɲɛnama kelenpe dɔnniya sɔrɔ, i ko Esayi y’a fɔ cogo min na, u fana bɛna a fɔ ko: “An ka Ala filɛ.” (Esa. 25:9) N’an bɛ Ala ka Kuma ɲɛfɔ mɔgɔw ye, hadamadenw bɛna dugawu sɔrɔ cogo min na ni Jehowa sagonataw tiimɛna Krisita Yesu ka masaya sababu fɛ, an ka kan k’an sinsin o kan.—Esa. 9:6, 7.
4, 5. Ka Jehowa kanu, o kɔrɔ ye mun ye?
4 An b’a jira cogo min na ko an bɛ Jehowa kanu: An b’a dɔn ko ka Jehowa kanu ni an dusukun bɛɛ ye, ni an ni bɛɛ ye ani ni an hakili bɛɛ ye, o kɔrɔ tɛ dɔrɔn ko Ala ko ka bonya kosɛbɛ an dusukun na. Ala bɛ kow ye cogo min na, an ka kan ka sɔn o ma ani ka tugu o la. (Zab. 97:10) Ala kanuya bɛ jira a ka cikanw bɛɛ sirataamani fɛ. A bɛ jira fana n’an bɛ taa a fɛ “taama senuma ni Ala ɲɛsiran” na, hali ni an bɛ ka kɔrɔbɔ ani ni mɔgɔw b’an kɛlɛ.—2 Pi. 3:11; 2 Yuh. 6.
5 Ka Ala sago kɛ bawo an b’a kanu, o ye nisɔndiyako ye. (Zab. 40:9) Bibulu kalanden ka kan k’a faamu ko Ala ka sariyaw bɛɛ sigira a batobagaw ka hɛrɛ banbali kama. (Dut. 10:12, 13) Ni mɔgɔ b’a ka ɲɛnamaya kɛ ka bɛn Jehowa ka ci fɔlenw ma, a b’a ka waleɲumandɔnba jira Jehowa ka dakabanabaaraw ko la. Kalanden dɛmɛ a k’a faamu ko ni mɔgɔ taamana Jehowa ka sira tilennenw kan, o b’a kisi kunko caman ma minnu bɛ mɔgɔ sɔrɔ n’a ma taama Jehowa ka sira tilennenw kan.
6. Ni mɔgɔ dɔ bɛ Jehowa kanu, o tigi bɛ se ka dugawu jumɛnw sɔrɔ?
6 Minnu bɛ Ala kanu, olu bɛ dugawuw sɔrɔ: Mɔgɔ majiginnen minnu bɛ Jehowa kanu, a b’a janto olu la kosɛbɛ ani ka a “ka ko dunbaw” jira u la. (1 Kɔr. 2:9, 10) Ni o dɔnniya sugu bɛ u la Jehowa sagonataw ko la, jigiya min bɛ u la don nataw ko la, o bɛ kɛ ko jɛlen ye. (Jer. 29:11) Mɔgɔ minnu bɛ Jehowa kanu, olu bɛ Jehowa ka makariba sɔrɔ. (Ek. 20:6) Jehowa bɛ jigiya min di hadamadenw ma ka ɲɛnamaya banbali sɔrɔ k’a da a ka kanuya kan ka ɲɛsin olu yɛrɛ ma, o jigiya bɛ diya u ye.—Yuh. 3:16.
7. Ka mɔgɔw kalan u ka Jehowa kanu, e bɛ mun miiri o ko la?
7 N’an bɛ caman dɔn an Fa ko la min bɛ sankolo la, an bɛna caman fana sɔrɔ k’a fɔ mɔgɔw ye. (Mat. 13:52) Ka mɔgɔw kalan kɛrɛnkɛrɛnnenya la an denw, u ka Jehowa kanu, o ye bonyaba ye sa! (Dut. 6:5-7) K’a sɔrɔ an bɛ ka ‘Jehowa ka ko ɲuman kɛlenw’ dɔn, an ni an ka Bibulu kalandenw ka Jehowa tanu kosɛbɛ ka taa a fɛ.—Zab. 145:7.