Ɲininkaliw Jaabi

◼ Bibulukalan min bɛ kɛ denbaya kɔnɔ, yala o lɛrɛw bɛ se ka jate dantigɛli sɛbɛn kɔnɔ wa?

Ni bangebaga kerecɛn dɔ bɛ Bibulukalan kɛ a ka denbaya kun, ni denw sen bɛ o kalan na, minnu ma batise, o bangebaga bɛ se dɔgɔkun o dɔgɔkun k’a sɛbɛn, a cayalen ba, ko ale ye lɛrɛ kelen waajuli ani bɔnye kelen kɛ. Ni kalo sara, a bɛ se ka Bibulukalan kelen sɛbɛn a yɛrɛ kun. Jate bɛ bɔ o cogo kelen na hali ni Bibulukalan bɛ tɛmɛ lɛrɛ kelen kan, wala ni a bɛ kɛ siyɛn caman dɔgɔkun kɔnɔ, walima ni kalan bɛ kɛ denmisɛnw kun u kelen kelen na.​—Gafe Notre Ministère lajɛ ɲɛ 104.

Ni denbaya bɛɛ ye Jehowa Seere batiselenw ye, lɛrɛ walima Bibulukalan si tɛ se ka sɛbɛn dantigɛli sɛbɛn kɔnɔ (Fo ni a sɔrɔla den dɔ bɛ ka gafe filanan kalan a ka batɛmu talen kɔ). Jɛkulu ka dantigɛli sɛbɛn dabɔra kow de kama, minnu kɛra kibaru duman weleweledali la ani Bibulu tiɲɛ kalan kɛli la mɔgɔw kun minnu ma u yɛrɛbakun di ani minnu ma batise ka kɛ Jehowa ka baarakɛlaw ye. (Mat. 24:14; 28:19, 20) O bɛɛ n’a ta, ka denbaya ka o Bibulukalan sugu in ɲɛminɛ tuma bɛɛ, fɔlen in tɛ o nafa dɔgɔya.

Waajibi don kerecɛn bangebagaw ka kalan kɛ ni u ka denbaya ye. Bangebagaw minnu mago bɛ dɛmɛ la, walisa ka u ka denbaya ka Bibulukalan sigi sen kan, walima a ka ɲɛtaa sɔrɔ, olu ka kan ka dɛmɛ ɲini diinɛ maakɔrɔw fɛ. N’a sɔrɔ a ka fisa weleweledala dɔ ka Bibulukalan kɛ jɛkulu ka kerecɛn denbaya dɔ denkɛ walima denmuso kun min ma batise, a kuma ka kan ka fɔ jɛkulu lakɔlɔsibaga ɲɛmɔgɔ ye walima Baara lakɔlɔsibaga ye. Ni sɔn kɛra o ɲɔgɔnna Bibulukalan ma, a ɲɛminɛbaga b’a jate iko Bibulukalan tɔw bɛ jate cogo min na.

Ka denmisɛnw dege u ka taama Jehowa ka siraw kan, o bɛ waati caman ani cɛsiriba de ta, ka tɛmɛ waati kan an bɛ min sɛbɛn dantigɛli sɛbɛn kɔnɔ. (Dut. 6:​6-9; Nta. 22:6) Kerecɛn bangebagaw bɛ ka u jɔyɔrɔ fa, k’u denw lamɔ-doni-girinman ta ka kɛɲɛ “ni Jehowa ka kololi ni a ka ladili ye.” U ni foli ka kan.​—Efɛ. 6:4.