Yala i yɛrɛ ka waajulikɛyɔrɔ bɛ yen wa?

¹ Ni a fɔra i yɛrɛ ka waajulikɛyɔrɔ, o ye waajulikɛyɔrɔ ye min dira i ma ka baara. A bɛ se ka kɛ yɔrɔ ye min bɛnnen bɛ i ma kosɛbɛ, walisa i ka se k’a lasɔrɔ teliya la, ka waajuli kɛ yen i kelen, walima e ni weleweledala dɔ wɛrɛ. Hali ni nafa b’a la an ni jɛkulu ka jɛ ka bɔ ɲɔgɔn fɛ waajuli la ni an bɛ se, o bɛɛ n’a ta, ni i yɛrɛ ka waajulikɛyɔrɔ bɛ yen k’a baara waati wɛrɛw la, o bɛ se k’a to i ka seereya kɛ ni timinandiyaba ye, i tɛ ɲinɛ i ka waajulikɛyɔrɔ so si kɔ, kɛrɛnkɛrɛnnenya la n’a y’a sɔrɔ waajulikɛyɔrɔba de bɛ aw ka jɛkulu bolo.—Kɛw. 10:42.

² A nafaw: Dɔw ye nafa wɛrɛw sɔrɔ waajuli kɛli la u yɛrɛ ka waajulikɛyɔrɔ la u ka baarakɛyɔrɔ kɛrɛfɛ tilelafana dun tuma na, walima ni baara jiginna yɔrɔnin min na. Dɔ wɛrɛw ni u ka denbaya ye waajuli kɛ u ka sigida la lɛrɛ kelen, walima min ka ca ni o ye sanni Jɛkulu ka gafe kalan ka daminɛ. Segin-ka-bɔnyew ni Bibulu-kalan minnu sɔrɔla o la, olu kɛra u kɛrɛfɛ. O b’a to u fanga, u ka waati ni u ka wari tɛ tiɲɛ. Ka i yɛrɛ ka waajulikɛyɔrɔ sɔrɔ, o bɛ se ka dɔw dɛmɛ u ka kɛ tutigɛbaga farankanw ye waati ni waati, walima yɛrɛ u ka kɛ tutigɛbaga basigilenw ye, ikomi baara caman bɛ se ka kɛ waati surun kɔnɔ. Ka fara o kan, n’an bɛ baara kɛ an yɛrɛ ka waajulikɛyɔrɔ la ani n’an bɛ an barokɛɲɔgɔnw dɔn ka ɲɛ, o bɛ se k’an dɛmɛ k’u ka dannaya sɔrɔ, ka an ka kibaru duman ɲɛfɔcogo kɛ ka bɛn u haminankow ma. O cogo la an ka cidenyabaara bɛ nɔ bɔ kosɛbɛ.

³ Kafo lakɔlɔsibaga ye dusu don an balimamuso tutigɛbaga dɔ kɔnɔ a k’a ɲini u ka waajulikɛyɔrɔ di a ma. O tutigɛbaga ko: “Ne sɔnna o laadilikan ma, wa, a ma mɛn ne ni n ka waajulikɛyɔrɔ mɔgɔw donna ɲɔgɔn na, ka kɛ teriw ye. Ne bɛ n ka segin-ka-bɔnyew kɛ waati minnu na, ne ye o waatiw yɛlɛma ka bɛn u ma. Ne ye min sɔrɔ o la, o ye ko ne ka segin-ka-bɔnyew hakɛ cayara, a hakɛ bɔra 35 la ka kɛ 80 ye kalo kɔnɔ, wa, ne ye Bibulu-kalan wolonwula sɔrɔ.”

⁴ A bɛ kɛ cogo min na: N’i b’a fɛ ka waajulikɛyɔrɔ ɲini min ye i yɛrɛ ta ye, i ka kuma balimakɛ fɛ min bɛ waajulikɛyɔrɔ ko kunna. I bɛ se k’a ɲini weleweledala dɔ wɛrɛ fɛ ale ni e ka baara kɛ ɲɔgɔn fɛ. I ma mɔgɔ minnu sɔrɔ u ka so, i ka olu bɛɛ tɔgɔ sɛbɛn. I ka kan k’i jija k’i ka waajulikɛyɔrɔ ban kalo naani kɔnɔna na. Ni a ka gɛlɛn i bolo ka se ka o kɛ, i bɛ se k’a ɲini jɛkulu gafe kalan lakɔlɔsibaga fɛ walima mɔgɔ wɛrɛw fɛ u ka i dɛmɛ. Ni kalo naani banna tuma min na, i bɛ se ka waajulikɛyɔrɔ bannen segin, walima i bɛ se k’a ɲini ka o baara kokura. O bɛɛ n’a ta, i man kan ka waajulikɛyɔrɔ kelen to i yɛrɛ bolo kudayi, nka i ka kan ka o di walisa mɔgɔ wɛrɛw ka se ka o ɲini. N’i bɛ jɛkulu la min ka waajulikɛyɔrɔ man bon, n’i tɛ se ka i yɛrɛ ka waajulikɛyɔrɔ sɔrɔ, i bɛ se k’a ɲini i ka gafe kalan lakɔlɔsibaga fɛ a ka gafe kalan waajulikɛyɔrɔ yɔrɔnin dɔ di i ma.

⁵ Ci min dira an ma ka waajuli kɛ “diɲɛ yɔrɔw bɛɛ la,” o tɛ kɔlɔkɔlɔ baara ye. (Mat. 24:14) Wajibi don an kelen-kelen bɛɛ ka cɛsiriw ka fara ɲɔgɔn kan labɛn koɲuman na. Ni an ye waajuli kɛ an yɛrɛ ka waajulikɛyɔrɔ la ka fara an ni jɛkulu ka waajuli kan, an bɛ se ka mɔgɔ hakɛ o hakɛ sɔrɔ ka kibaru duman fɔ u ye, an bɛna se ka olu lasɔrɔ.

[Study Questions]

1. Ni a fɔra i yɛrɛ ka waajulikɛyɔrɔ, o ye mun ye?

2. Ka i yɛrɛ ka waajulikɛyɔrɔ sɔrɔ, nafa damadɔ jumɛnw bɛ o la?

3. Tutigɛbaga dɔ ye mun sɔrɔ a yɛrɛ ka waajulikɛyɔrɔ dilen a ma?

4. Cogo jumɛn na i bɛ se k’i yɛrɛ ka waajulikɛyɔrɔ sɔrɔ, ani ka o baara?

5. Ci min dira an ma ka waajuli kɛ, mun de wajibiyalen don walisa ka o kɛ ka dafa?