Ni mɔgɔw tɛ u ka so
1. An bɛ gɛlɛya jumɛn sɔrɔ ni an bɛ ka cidenyabaara kɛ da-ni-da?
1 Yɔrɔ caman na, a bɛ ka gɛlɛya ka taa a fɛ ka mɔgɔw sɔrɔ u ka so. Nin “waati gɛlɛnw” na, mɔgɔ caman diyagoyalen don ka lɛrɛ caman kɛ baara la walisa ka se k’u dahirimɛ dɔrɔn sɔrɔ. (2 Tim. 3:1) I b’a sɔrɔ dɔw yɔrɔ janyara u ka so la walisa ka wari ɲini walima k’u fari bɔ ɲɔgɔn na. An bɛ se ka o mɔgɔw lasɔrɔ cogo di ka kibaru duman fɔ u ye?
2. An bɛ se ka baara ɲuman kɛ ni Les notes de maison en maison sɛbɛnfura ye cogo jumɛn na?
2 Kunnafoniw sɛbɛn koɲuman: A fɛn fɔlɔ ye ka kunnafoniw ta mɔgɔw kan minnu tɛ u ka so. Les notes de maison en maison (S-8) sɛbɛnfura dilanna o de kama. Yala i ye nbɛda tɔgɔ, waajulikɛyɔrɔ karati nimɔrɔ, i tɔgɔ, ani o don sɛbɛn wa? I bɛ se ka yɔrɔ dɔ to o sɛbɛnfura kan walisa ka kunnafoni wɛrɛw sɛbɛn tuma min na e, walima weleweledala wɛrɛ bɛ segin ka na baara kɛ sow la, mɔgɔw tun tɛ minnu na. Seereya waati bannen kɔfɛ, i hakili to a la, ka o fɛn sɛbɛnnenw di balimakɛ ma waajulikɛyɔrɔ karati ko bɛ min bolo, fo ni a y’a sɔrɔ o balimakɛ sɔnna i ka baara kɛ sow la i ma mɔgɔ sɔrɔ yɔrɔ minnu na. Mɔgɔ o mɔgɔ y’a jira ko kibaru duman ka di a ye, sɛbɛnfura wɛrɛ ta ka kunnafoniw sɛbɛn olu ko la, walisa ka segin ka na bɔ u ye.
3. Hakilila dɔw fɔ mɔgɔw lasɔrɔli la minnu tɛ u ka so?
3 A ɲini ka na waati wɛrɛ la: Mɔgɔ minnu tɛ u ka so baarakɛdonw na, laala u dɔw bɛ sɔrɔ u ka so sufɛlaw la walima sibiridonw ni karidonw na. Yala i bɛ se k’i ka waati boloda walisa ka segin ka na waati la min bɛ bɛn kosɛbɛ wa? (1 Kɔr. 10:24) N’i tɛ se k’o kɛ, mɔgɔ minnu tɛ u ka so, i ka olu di weleweledala wɛrɛ ma min bɛ se ka segin ka na waati wɛrɛ la.
4. Nafa min b’a la ka segin ka na bɔ mɔgɔw ye minnu tɛ u ka so, misali jumɛn bɛ o jira?
4 Nafa min b’a la k’a ɲini ka mɔgɔw lasɔrɔ minnu tɛ u ka so, misali kelen bɛ o jira. Weleweledalaw kɛlen kɔ ka taa bɔ mɔgɔ dɔ ka so siɲɛ caman, san saba kɔnɔ, u labanna k’a tigi ye. O y’a sɔrɔ nin waati bɛɛ kɔnɔna na muso tun bɛ makɔnɔni na ko Seere dɔ ka na bɔ a ye walisa ka a ka Bibulu-kalan daminɛ kokura, a tun bɛ ka min kɛ sani a ka yɛlɛma o yɔrɔ la.
5. Waati jumɛn na a bɛ jate ko waajulikɛyɔrɔ dɔ kɛra ka ban?
5 Waajulikɛyɔrɔ kɛ ka ban: A bɛ jate tuma jumɛn na ko waajulikɛyɔrɔ dɔ kɛra ka ban? Tuma caman, o ye ni cɛsiriw kɛra tiɲɛ na walisa ka mɔgɔ dɔ ye du kelen-kelen bɛɛ kɔnɔ. Waajulikɛyɔrɔ ka kan ka kɛ ka ban kalo naani kɔnɔ. O kɔfɛ, o ka kan ka sɛgɛsɛgɛ walisa waajulikɛyɔrɔ koɲɛ bɛ balimakɛ min bolo, o ka se ka kunnafoni kuraw sɛbɛn a kan.
6. Mun na an ka kan k’a ɲini ka an ka waajulikɛyɔrɔ mɔgɔ kelen-kelen bɛɛ lasɔrɔ ka kibaru duman fɔ u ye?
6 Mɔgɔ hakɛ o hakɛ bɛ se ka sɔrɔ walisa u ka cogo sɔrɔ ka Jehowa tɔgɔ wele ka kisi, an b’a fɛ o mɔgɔ hakɛ ka sɔrɔ. (Rom. 10:13, 14) Mɔgɔ minnu yɔrɔ janyara u ka so la tuma min na an taara bɔ u ye du-ni-du baara la, olu sen bɛ o mɔgɔw la. I n’a fɔ ciden Paul, i ka kɛ i ŋaniya ye ka “Ala ka nɛɛma Kibaru Duman fɔ.”—Kɛw. 20:24.