Dɛmɛ min bɛ sɔrɔ nɔgɔya la
1 Anna y’an balimamuso dɔ de ye min furucɛ tɛ Jehowa Seere ye. A ka baara fana b’a ka waati fanba ta. Ana y’a ye ko a ka gɛlɛn ale bolo kosɛbɛ ka na Kerecɛn lajɛw la tuma bɛɛ, k’a sen don cidenyabaara la, ani ka Ala ka Kuma kalan. Hali k’a sɔrɔ Jehowa kanuya tun b’a la, a kɛra weleweledala ye min ye waajulibaara jɔ. Nka, Ala barika la, maakɔrɔ minnu tun bɛ hami a ko la, olu y’a dɛmɛ alako ta fan fɛ.
2 Kerecɛn jɛkulu bɛ dɛmɛ min di alako ta fan fɛ, ni an sɔnna o la, an b’a jira ko an ye an ka dannaya da Jehowa yɛrɛ de kan. Yesu Krista b’a mago don mɔgɔw la ni kanuya ye cogo min na, jɛkulu diinɛ maakɔrɔw bɛ o kanuya ladege, ka cogo ɲini ka dusu don mɔgɔw kɔnɔ minnu ye gɛlɛya sɔrɔ u ka cidenyabaara kɔnɔna na, ani k’u dɛmɛ. (1 Tes. 5:14) Tuma caman na kuma duman min sinsinnen bɛ Bibulu tɛmɛsira dɔw kan, n’o bɛ dusu don mɔgɔ kɔnɔ, o dɔrɔn fɔli bɛ se ka wasa kɛ. Mɔgɔ minnu barika ka dɔgɔ waati dɔ kɔnɔ alako ta fan fɛ, maakɔrɔw dɔrɔn man kan ka bɔ u yɛrɛ la ka olu dɛmɛ. O ye kerɛcɛnw bɛɛ de ka ko ye. Siga t’a la ko an kelen-kelen bɛɛ delila k’a ye ko barika bɛ kuma ɲuman na, ni o “kuma . . . fɔra ka bɛn a waati ma.”—Nt. 25:11; Esa. 35:3, 4.
3 A bɔ i yɛrɛ la: Mɔgɔ minnu mago bɛ dɛmɛ na, n’an b’a fɛ k’an mago don olu la ni kanuya ye, fo an ka bɔ an yɛrɛ la k’an ka hinɛ walima k’an ka tin jira u la, ani k’o kɛ ni an sɛbɛ bɛɛ ye. Jonatan y’a dɔn tuma min na ko Dawuda tun bɛ gɛlɛyaba kɔnɔ, a “wulila ka taa Dawuda nɔfɛ . . . ka a ja gɛlɛya.” (1 Sam. 23:15, 16) Ni an bɛ mɔgɔw dɛmɛ, an ka o kɛ ni ɲumanya ye. Ni an bɛ kumaw fɔ mɔgɔw ye minnu b’a jira ko an bɛ u fɛ, o bɛ se ka ko caman ɲɛ. Ka fara o kan, Yesu y’a jira k’a jɛya ko walisa an k’an balimamuso walima k’an balimakɛ dɔ sɔrɔ kokura, o tɛ taa cɛsiriba kɔ, wa, fɛn fosi fana kana an bɔ o kan. (Luka 15:4) Ni an b’a fɛ tiɲɛ na ka mɔgɔ wɛrɛ dɛmɛ, o bɛna an bila an ka an timinandiya a dɛmɛni na, hali ni o tigi ka ɲɛtaa tɛ ye joona.
4 An ni minnu bɛ gafe kalan kelen na, ni an b’a bɔ an yɛrɛ la k’a fɔ u ye, u ka na an ka taa ɲɔgɔn fɛ cidenyabaara la, o bɛ dusu don u kɔnɔ dɛ! Ni an bɛ Jehowa Seere dɔ dɛmɛ a k’a sen don cidenyabaara la, an bɛ se ka cogo sɔrɔ ka dusu don a kɔnɔ walisa a ka dɔ fara a ka kɛta kan Ala ka baara la. An bɛ o waati duman sugu minnu kɛ ɲɔgɔn fɛ Jehowa ka baara la, o bɛ dusu don kɛrɛnkɛrɛnnenya la mɔgɔw kɔnɔ, minnu bɛ ka basigi sɔrɔ kokura alako ta fan fɛ.
5 Fɛɛrɛ min tigɛra kanuya kɔnɔ: Mɔgɔ minnu ma u sen don waajuli baara la waati dɔ kɔnɔ, walima u ma u fara Jɛkulu kan, olu mago bɛ se ka kɛ dɛmɛ wɛrɛ la walisa k’u ka dannaya barika bonya. I b’a sɔrɔ u mago bɛ min na tigitigi, o ye Bibulu-kalan kɛli ye u kun Adorez le seul vrai Dieu gafe walima Approchez-vous de Jehovah gafe walima Qu’enseigne réellement la Bible ? gafe kan. Ikomi o tigi batisera kaban, tuma caman na kalan man kan ka kɛ waatijan kɔnɔ. Jɛkulu ka baara komite ka kan ka se teliya la k’a dɔn mɔgɔ minnu bɛ se k’o dɛmɛ sɔrɔ.—San 1998 ani san 2000 Nowanburukalow An ka Masaya Cidenyabaara Ɲininkaliw Jaabi lajɛ.
6 An ye Anna min kofɔ daminɛ na, o sɔnna maakɔrɔw ka dɛmɛ na, k’a ka waleɲumandɔn jira. An balimamuso dɔ min kɔrɔbayalen don alako ta fan fɛ, maakɔrɔw ye ale de bila ka Bibulu-kalan kɛ Anna kun. Kalan danna siɲɛ naani dɔrɔn ma, nka o y’a to Anna sera ka gɛrɛ Jehowa la kokura. A ye nali daminɛ kokura jɛkulu ka lajɛw la. A diyara a ye fana ka Jehowa Ala tanu bɛɛ ɲɛna. An balimamuso min ye Bibulu-kalan kɛ a kun, o y’a dɛmɛ fana cidenyabaara la, ka taa ni a ye Bibulu-kalanw wɛrɛw la fo Anna yɛrɛ ye fanga sɔrɔ ka se ka waajuli kɛ da-ni-da. Anna mago tun bɛ min na dɔrɔn, o ye ka mɔgɔ sɔrɔ min b’a dɛmɛ a ka se k’a ka alako baaraw daminɛ kokura.
7 Mɔgɔ minnu mago bɛ dɛmɛ na, ni an ye olu barika bonya, o bɛ dugawu caman lase an bɛɛ ma. Mɔgɔ min dɛmɛna, o bɛ nisɔndiya sɔrɔ a gɛrɛlen Jehowa la ani a sen donnen Jehowa ka jɛkuluba ka baaraw la. Maakɔrɔw bɛ nisɔndiya sɔrɔ ka o ɲɛtaa sugu ye alako ta fan fɛ. (Luka 15:5,6) Jɛkulu kɔnɔmɔgɔw bɛ surunya ɲɔgɔn na, o bɛ na ni kelenya ye jɛkulu kɔnɔ, k’a masɔrɔ bɛɛ lajɛlen bɛ ka hami ɲɔgɔn ko la ni kanuya ye. (Kol. 3:12-14) Siga si t’a la ko kun ɲɛnamaw b’an bolo ka Jehowa ladege, ale min ye dɛmɛ ye min bɛ sɔrɔ nɔgɔya la!—Efɛ. 5:1.
[Study Questions]
1. Mɔgɔ barika bɛ se ka dɔgɔya alako ta fan fɛ cogo jumɛn de la?
2. Sira jumɛn fɛ kerecɛnw bɛɛ bɛ se ka kɛ dɛmɛ ye min bɛ sɔrɔ nɔgɔya la?
3, 4. Ka mɔgɔ wɛrɛw dɛmɛ, o tɛ taa mun kɔ, ani an bɛ se k’o kɛ cogo jumɛn na?
5. Tuma dɔw la, maakɔrɔw bɛ se ka dɛmɛ jumɛn kɛ mɔgɔw ye?
6. An balimamuso dɔ ye fanga sɔrɔ kokura alako ta fan fɛ cogo jumɛn de la?
7. Ka ɲɔgɔn barika bonya alako ta fan fɛ, nafa jumɛnw bɛ sɔrɔ o la?