I ka dɛmɛ ɲini
1 Ala ka kuma fiyɛlen b’a fɔ cogo bɛnnen na ko “waati gɛlɛnw na kɛ.” (2 Tim. 3:1) O la sa, n’i bɛ gɛlɛyabaw dɔn hakili ta fan fɛ, n’a y’a sɔrɔ cogo t’i bolo walasa k’o kɛlɛ, i bɛ se ka mun kɛ?
2 Jɛkulu kɔnɔmɔgɔ minnu mɔlenw don hakili ta fan fɛ, yali i bɛ sɔn ka kuma olu fɛ wa? Mɔgɔ dɔw bɛ se ka siga k’o kɛ bawo u bɛ maloya. U t’a fɛ ka doni da mɔgɔ wɛrɛ kun, walima u bɛ siga–siga ko mɔgɔ si tɛna se k’u dɛmɛ a cogo yɛrɛ la. An b’a dɔn k’an ka kan k’an seko bɛɛ kɛ walasa k’an cɛsiri k’an jɔyɔrɔ fa ka ɲɛ. Nka, an man kan ka miiri abada k’an tɛ se ka dɛmɛ ɲini an ka hakili ta fan fɛ kɛnɛya kow la.—Gal. 6:2, 5.
3 A bɛ daminɛ cogo min na: Mun na i tɛna gɛrɛ i ka gafe kalan ɲɛminɛbaga la k’a ɲininka n’i bɛ se ka baara kɛ n’a ye foro baara la? O bɛna cogo di i ma ka kuma i ŋaniya kan, n’o ye ka taa ɲɛ hakili ta fan fɛ. Ni cidenyabaara maganna don, i mago bɛ dɛmɛ min na hakili ta fan fɛ, o fɔ a ye. Ale yɛrɛ bɛna ɲini maakɔrɔw fɛ k’i dɛmɛ. Walima i bɛ se k’i kunkow fɔ maakɔrɔw dɔ la kelen ye.
4 I mago bɛ dɛmɛ sugu jumɛn na? Yali fɛn dɔ kɛra sababu ye ka dɔ bɔ i ka timinandiya la wa? Yali e kelenpe dɔrɔn de bɛ k’i jija walasa i den gɛrɛlenw ka to jɛkulu la wa? Yali i ye mɔgɔkɔrɔba ye min mago bɛ dɛmɛ na wa? Walima kunko dɔ kɛlen bɛ k’i dusu tiɲɛ wa? A bɛ se ka gɛlɛya an bolo k’an ka waati gɛlɛnw kun, nka an bɛ se. Dɛmɛ bɛ sɔrɔ.
5 Jɛkulu maakɔrɔ bɛ dɛmɛ don cogo di? Maakɔrɔw b’u mago don sɛbɛ yɛrɛ la. U bɛna i kunkow lamɛn. Ikomi u bɛ jɛkulu dɛndɛn, k’a kalan, ni weleweledala caman bɛ ka gɛlɛyaw sugu kelen kɛlɛ, maakɔrɔw bɛna o kow jate. Ikomi u ye “ɲɛjirabagaw ye saga kulu la,” u labɛnnen de bɛ to walasa ka baara kɛ i fɛ ni nisɔndiya ye. (1 Piɛ. 5:3) O balimakɛ ninnu bɛ ko caman dɔn. U b’u hakili jakabɔ Bibulu sariyakolow kan. N’i b’u lamɛn, o bɛ se k’i ka cidenyabaara ɲɛ ka t’a fɛ, k’i yɛrɛ dɛmɛ i ka ɲɛnamaya kɔnɔ.—2 Tim. 3:16, 17.
6 Yesu ye ‘cɛw di an ma nilifɛnw ye.’ (Efe. 4:8, NW ) O kɔrɔ ye ko maakɔrɔw bɛ yen e ka nafa kama. U bɛ yen walasa k’i dɛmɛ. Tiɲɛ na, a bɛ i n’a fɔ ‘u ye i ta ye.’ Sanni i k’i yɛrɛminɛ, kuma u fɛ. I mago bɛ dɛmɛ min na, o ɲini.—1 Kɔr. 3:21-23