Lɛtɛrɛ min bɔra Ɲɛmɔgɔ kulu Yɔrɔ

‘NƐƐMA ni dususuma ka di aw ma ka bɔ an Fa Ala ani Matigi Yesu Krista la.’ Paul tun bɛ lɛtɛrɛ minnu ci jɛkuluw ma, a tun bɛ u daminɛ tuma caman na ni nin folikan ye. Fɛn min b’an kɔnɔ ka ɲɛsin aw bɛɛ ma, Paul ye o de fɔ a ka o folikan kɔnɔ.—Efɛ. 1:2.

Nɛɛma walima ɲumanya min bɛ bɔ Jehowa yɔrɔ an ni o min man kan, ni a ye o kɛ Yesu Krista ka kumabɔ saraka sababu fɛ, tiɲɛ na an bɛ Jehowa waleɲumandɔn kosɛbɛ o la! Kunmabɔ saraka de y’a to Ala sɔnna an na. An mana an timinandiya cogo o cogo ka Bibulu kalan, ka kibaru duman waajuli kɛ, walima ka kɛwale ɲuman wɛrɛw kɛ, an yɛrɛ ka cɛsiriw dɔrɔn tun tɛ se k’a to an ka Ala ka mandiya sɔrɔ. Ni Ala yafara an ka jurumuw ma, ani ni a ye an sen don ɲɛnamaya banbali sɔrɔli la, o tɛ an ka cɛsiriw sara ye, nka nilifɛnw don minnu bɛ Jehowa ka ɲumanya jira, an ni min man kan, Yesu Krista sababu fɛ.—Rom. 11:6.

Paul tun ye sɛbɛn ci a balima dannabagaw ma ko: “An bɛ aw deli ko aw kana Ala ka nɛɛma sɔrɔ fu. A ko: Ne ye aw ka delili lamɛn ne diyanye waati la. Ne ye aw dɛmɛ kisili don de la. A filɛ, ne diyanye waati ye sisan de ye. A filɛ, kisili don ye sisan de ye.” Ala “diyanye waati” dɔ kɛra sanni Jerusalɛm ka halaki san kɛmɛ fɔlɔ la. Mɔgɔ kɔnɔnajɛlen minnu tun bɛ Jehowa kanu, olu kisira hakili ta fan fɛ. O nana laban ni kisili ye fana farisogo ta fan fɛ bawo o mɔgɔ kantigiw bolila ka bɔ Jerusalɛm sanni dugu ka ci san 70 krista tile la.—2 Kɔr. 6:1, 2.

Bi fana, an bɛ Ala “diyanye waati” ni a ka “kisili don” dɔ de la. Jehowa bɛ sɔn mɔgɔ minnu na i ko a ka baarakɛlaw, olu bɛ ka kisili sɔrɔ hakili ta fan fɛ. Jigiya bɛ olu ye u niw ka kisi ‘Jehova ka donba’ la o min ka surun sisan kosɛbɛ.—Sof. 1:14.

Jehowa ka don nali bɛ baara don an bolo, an ka kan ka an jɔyɔrɔ fa min na ni an sɛbɛ bɛɛ ye. An ka kan ka mɔgɔw lasɔmi o don ko la, ani ka mɔgɔ kɔnɔnajɛlenw dɛmɛ u ka nafa sɔrɔ Jehowa ka ɲumanya la, an ni ɲumanya min man kan, walisa olu fana ka se ka kisi. Paul tun y’a faamu ko o tun ye baara ye min ka kan ka ta ni sɛbɛ ye. A y’a sɛbɛn ko: “Bɔnɛ bɛ ne ye, ni ne ma kibaru duman fɔ.” Paul y’a kɔnɔta fana jira nin kumaw fɛ: “Hakilimaw ni hakilintanw fana ka juru bɛ ne la. O de kosɔn ne b’a fɛ kosɛbɛ ka kibaru duman fɔ.”—1 Kɔr. 9:16; Rom. 1:14, 15.

Jehowa bɛna jalaki bin an kan ni an ye mɔgɔ-lasɔmi-baara kɛ bolokɔfɛko ye. Jehowa tun ye min fɔ kira Ezekiɛl ye, an bɛ o kala ma. A ko: “Mɔgɔ denkɛ, ne ye i kɛ Israɛl ka so kɔlɔsibaga ye. I ka ne dalakuma mɛn ka u lasɔmi ne ye. Ni ne y’a fɔ mɔgɔjugu ye, ko a na sa dɛ, ni i ma o mɔgɔjugu lasɔmi, ni i ma kuma a fɛ ko a ka a ka sira jugu bila ka a ni kisi, o mɔgɔjugu na sa a ka tilenbaliya la, nka ne na i ɲininka a joli hakɛ ko la.”—Eze. 3:17, 18.

Nin laban donw ka gɛlɛn. A ma nɔgɔn k’i mago don denbaya ka kow la, i ka baara la, jɛkulu koɲɛw la ani waajuli baara la, k’olu bɛɛ kɛ ka ɲɛ k’a sɔrɔ i ma dɔ kɛ bolokɔfɛko ye. Ka fara o kan, aw caman tɛ kɛnɛbagatɔw ye, walima min bɛ aw dɔw la, o ye tubabuw bɛ min wele ko depression (o ye dusutiɲɛ ye mɔgɔw la fo kana kɛ bana ye u la, fo u tɛ nisɔndiya sɔrɔ fosi kɛli la tun), dɔw kɔrɔla, mɔgɔw bɛ ka dɔw yɛrɛ kɛlɛ u ka dannaya kosɔn. Aw camanba “doninen bɛ.” O la sa, an b’a fɛ k’a fɔ aw ye ko aw hinɛ bɛ an dusukun na, i ko Yesu y’a fɔ cogo min na ko: “Aw ye na ne ma, aw minnu bɛɛ sɛgɛnnen bɛ, ni aw doninen bɛ, ne na lafiya di aw ma.” (Mat. 11:28) Aw minnu bɛɛ ye aw cɛsiri ka t’a fɛ Jehowa ka baara la ni kantigiya ye, k’a sɔrɔ gɛlɛyaw b’aw kan, o gɛlɛyaw kɛra fitinin ye walima u kɛra belebele ye, an bɛ aw bɛɛ tanu kosɛbɛ.

Aw ye timinandiya min kɛ waajuli ni aw ka mɔgɔ-kalan baara la, ani Jehowa ka dugawu sababu la, mɔgɔ 4762 batisera dɔgɔkun o dɔgɔkun, diɲɛ kɔnɔ. Ala-ka-marako san min tɛmɛna, jɛkulu kuraw 1375 de sigira. An jigi b’a la, ani an bɛ Ala deli fana walisa gafe kura min tɔgɔ ye ko Qu’enseigne réellement la Bible ? n’o bɛ sɔrɔ kan 120 ni kɔ la, o ka mɔgɔ miliyɔnw dɛmɛ u ka nafa sɔrɔ Jehowa ka ɲumanya la, an ni min man kan, a ka “kisili don” na.

Aw k’a dɔn ko Ɲɛmɔgɔ Kulu bɛ aw kanu kosɛbɛ ani ko an bɛ Ala deli aw ye. Aw bɛ delili minnu kɛ anw ye, an bɛ aw fo olu fana na.

Aw balimakɛw,

Jehowa Seerew ka Ɲɛmɔgɔ Kulu