An ka mɔgɔw dɛmɛ walisa a nege ka don u la ka dɔ fara u ka Bibulu dɔnniya kan sɔn-ni-sɔn gafeninw dili senfɛ
1 Ni an bɛ taa bɔ mɔgɔw ye an ka waajuli kɔnɔna na, o ka di u caman ye. U nisɔndiyalen fana de bɛ sɔn an ka sɛbɛnw na. Nka, min ye ka Bibulu-kalan kɛ, u ma sɔn o ma fɔlɔ. U bɛ siga-siga. An dun bɛ se ka mun kɛ walisa k’u dɛmɛ a nege ka don u la ka dɔ fara u ka Bibulu dɔnniya kan? Ni an bɛ to ka taa sɔn-ni-sɔn gafeninw di u ma. O la sa, n’i ye sɔn-ni-sɔn gafenin di mɔgɔ dɔ ma, i ka o tigi tɔgɔ, a ka ladɛrɛsi, don min na i taara bɔ o tigi ye, i ye sɔn-ni-sɔn gafenin nimɔrɔ minnu di a ma, ani i kumana Bibulu tɛmɛsira min kan, i ka o fɛnw bɛɛ sɛbɛn. N’i ye fɛn o fɛn kɔlɔsi min bɛ se k’a jira i la ko o fɛn ka di a ye, i k’o fana sɛbɛn. O la sa, ni sɔn-ni-sɔn gafenin nimɔrɔ kuraw nana, i ka fɛn dɔ ɲini u kɔnɔ min bɛ se ka diya mɔgɔw ye, i bɛ to ka taa sɔn-ni-sɔn gafeninw di minnu ma. N’i taara bɔ u ye tuma min na, i ka kuma o fɛn kan. (1 Kɔr. 9:19-23) Laala, waati senfɛ, u bɛna fɛn dɔ kalan an ka sɛbɛnw kɔnɔ, min bɛna a nege don u la, ka dɔ fara u ka dɔnniya kan.
2 Tiɲɛ don ko sɔn-ni-sɔn gafeninw kalanni dɔrɔn tɛna a to mɔgɔ camanba ka kɛ Jehowa ka baarakɛlaw ye. Bi, kɔrɔtɔko don mɔgɔw ka Jehowa ɲini. O la sa, an bɛ se ka mun wɛrɛ kɛ walisa k’u dɛmɛ? (Sof. 2 : 2, 3; Jir. 14 : 6, 7) N’an taara bɔ u ye tuma o tuma walisa ka sɔn-ni-sɔn gafeninw di u ma, an ka Bibulu tɛmɛsira kelen ta ka baro kɛ o kan. An ka o tɛmɛsira sugandi koɲuman sanni ka taa bɔ u ye. N’an y’a kɛ ten, an bɛna se k’u dɛmɛ walisa a nege ka don u la ka dɔ fara u ka Bibulu dɔnniya kan.
3 Barow kɛ Bibulu tɛmɛsira kelen kan: An bɛ to ka taa sɔn-ni-sɔn gafeninw di mɔgɔ minnu ma, an ka miiri olu la, ka Bibulu tɛmɛsira caman labɛn minnu ɲɛsinnen bɛ u kelen-kelen mago kɛrɛnkɛrɛnnenw ma. An k’a boloda ka baro kɛ Bibulu tɛmɛsira kelen dɔrɔn kan, an taali kelen-kelen bɛɛ la u fɛ. (Fil. 2 :4) Misali la, ni dɔ diyanyemɔgɔ banna a ma mɛn, i bɛ se ka taa bɔ o tigi ye walisa k’a jira a la, Bibulu bɛ min fɔ mɔgɔ salenw cogoya kan ani lakununni kan. I bɛ se ka baro kɛ o kan siɲɛ damadɔw kɔnɔ. Kunnafoniw bɛ sɔrɔ “ Saya ” ni “ Lakunnuni ” kan, Comment raisonner gafe kɔnɔ. I bɛ se ka baara kɛ ni o kunnafoniw ye walisa k’i ka barow labɛn, minnu bɛ kɛ Bibulu tɛmɛsira kelen kan. I bɛ se ka baro wɛrɛw labɛn bana, kɔrɔya ni saya kan, k’a jira k’o fɛnw bɛɛ bɛna ban. An bɛ min nɔfɛ, o ye ka barokun sɔrɔ min ka di an barokɛɲɔgɔn ye. O cogo la sa, an bɛna se k’a jira a la dɔɔnin-dɔɔnin, Bibulu bɛ min fɔ o kan.
4 U dɛmɛ u ka faamuyali sɔrɔ: Tiɲɛ don ko tuma caman na, a ka fisa an k’an ka barow nɔgɔya, k’u surunya. Nka, an ye Bibulu tɛmɛsira min sugandi, an man kan ka dan o kalanni dɔrɔn ma. Sitanɛ ye mɔgɔw hakili fiyen walisa u kana kibaru duman faamu. (2 Kɔr. 4: 3, 4) Hali mɔgɔ minnu bɛ Bibulu dɔn, olu mago bɛ dɛmɛ na walisa u ka se ka Bibulu faamu. (Kɛw. 8 : 30, 31) O la sa, an ye Bibulu tɛmɛsira min sugandi, an ka waati ta k’o ɲɛfɔ koɲuman, ani ka misali di o kan, i n’a fɔ an b’a kɛ cogo min na Ala-ka-Marako Cidenyabaara kalanso la. (Kɛw. 17 :3) Ala ka Kuma bɛ se ka mago min ɲɛ a ye a ka ɲɛnamaya kɔnɔ, a sɛgɛsɛgɛ n’a y’a sɔrɔ a y’o faamu.
5 An barokɛɲɔgɔn bɛ ka min kalan ni o ka di a ye, an bɛ se ka baro bonya dɔɔnin-dɔɔnin, ka Bibulu tɛmɛsira fila walima saba sen don an ka barow la, n’an taara bɔ a ye tuma o tuma. O barow senfɛ, an k’a lajɛ an bɛ se cogo min na ka Waajibiya gafenin walima Dɔnniya gafe sen don baro la. An bɛ to ka taa sɔn-ni-sɔn gafeninw di mɔgɔ min ma, o bɛ se ka laban ka kɛ Bibulu-kalan ye nin cogo de la.
[Study Questions]
1. Sɔn-ni-sɔn gafeninw dili senfɛ, an bɛ se ka mɔgɔw dɛmɛ cogo di walisa a nege ka don u la ka dɔ fara u ka Bibulu dɔnniya kan ?
2. Mun na kɔrɔtɔko don mɔgɔw ka Jehowa ɲini sisan, ani an bɛ se ka mun wɛrɛ kɛ walisa k’u dɛmɛ ?
3. (a) Bibulu tɛmɛsira kelenpe bɛ ɲɛfɔ baro minnu kɔnɔ, an bɛ se k’o baro damadɔw labɛn cogo di ? (b) Aw ka waajulikɛyɔrɔ la, mɔgɔw bɛ hami ni ko jumɛnw ye kosɛbɛ ?
4. Ni an bɛ Bibulu tɛmɛsiraw ta ka jira mɔgɔw la, mun na a nafa ka bon an k’u dɛmɛ u ka faamuyali sɔrɔ? An bɛ se ka o kɛ cogo jumɛn na ?
5. An bɛ to ka taa sɔn-ni-sɔn gafeninw di mɔgɔ min ma, o bɛ se ka laban ka kɛ Bibulu-kalan ye cogo di ?