Segin-ka-bɔnye minnu bɛ laban ka kɛ Bibulu kalanw ye
1 Yesu ye a nɔfɛmɔgɔw ci u ka taa wajuli kɛ, nka a ye u ci fana u ka taa mɔgɔw kɛ “kalandenw ye. . . ka u kalan.” (Mat. 28:19, 20) Weleweledala bɛ weleweledali kɛ, nka karamɔgɔ bɛ fɛn kɛ ka tɛmɛ o kan. A bɛ mɔgɔw kalan, ka ɲɛfɔliw kɛ, ka tila k’a jira mun na a bɛ min fɔ o ye tiɲɛ ye. An bɛ mɔgɔw kalan sira minnu fɛ, olu dɔ la kelen ye ka taa bɔ mɔgɔw ye minnu y’a jira ko tiɲɛ ka di u ye, ka kuntilenna sigi ka Bibulu kalanw daminɛ.
2 I bɛ se ka segin ka taa bɔ mɔgɔ jumɛnw ye? O ye mɔgɔ bɛɛ ye minnu sɔnna sɛbɛn dɔ la, wala minnu y’a jira ko kibaru duman ka di u ye hali dɔɔnin dɔrɔn. Jama bɛ yɔrɔ min na, n’i ye wajuli kɛ yen, ka mɔgɔ sɔrɔ, kibaru duman ka di min ye, a ɲini ka o tigi ka ladɛrɛsi, wala o ka telefɔni limoro sɔrɔ. O cogo la, i bɛ se ka o tigi dɛmɛ, ka dɔ fara a ka kanuya kan ka ɲɛsin kibaru duman ma. I ka da a la ko i bɛna se ka Bibulu kalanw daminɛ. Taa a fɛ ka mɔgɔw ɲini minnu bɛna sɔn ka Bibulu kalan kɛ. A ka ca a la, i bɛna o mɔgɔw sɔrɔ.—Mat. 10:11.
3 A jira ko i b’i mago don u la: Segin-ka-bɔnye min nafa ka bon, o labɛnni bɛ daminɛ kabini i nako fɔlɔ la. Wajulikɛla min ka baara bɛ ɲɛ a bolo, o bɛ fɛnw sɛbɛn minnu nafa ka bon a barokɛɲɔgɔn bolo. Wa, a b’i sinsin olu de kan walisa ka baro nataw labɛn. Dɔw y’a ye ko a ka fisa ka ɲininkali dɔ lawuli, baro bantuma na, min jaabi sɔrɔli bɛna diya u barokɛɲɔgɔn ye bɔnyeli nata la. Ni an bɛ an mago don sɛbɛ la mɔgɔw la, o b’a to an bɛ miiri u la, hali an bɔlen kɔ u ka so. O b’a to fana an bɛ teliya a fɛ, ka segin ka na bɔ u ye kokura. Ni i bɛ se, i ka segin ka na bɔ o tigi ye tile kelen walima tile fila kɔnɔna na, tuma min na kibaru duman ye a dusu minɛ.
4 N’i bɛ segin ka taa bɔ mɔgɔ ye tuma min na, i ka kuma sinsin baro tɛmɛnen kan. Ni i nana bɔ o tigi ye tuma o tuma, a kɛ i kuntilenna ye ka kuma yɔrɔ kelen ɲɔgɔn kan, min sinsinnen bɛ Bibulu kan. I barokɛɲɔgɔn bɛ min fɔ, i k’o fana lamɛn. A ɲini k’i barokɛɲɔgɔn dɔn kosɛbɛ. O kɔfɛ, segin-ka-bɔnye minnu bɛ tugu o la, i ka baro kɛ Ala ka Kuma yɔrɔw kan, minnu fanba ɲɛsinnen bɛ ale yɛrɛ ma.
5 An ka a faamu ko Bibulu kalan ka kan ka daminɛ: I ka segin-ka-bɔnye kɛ ni Bibulu kalan daminɛni kuntilenna ye. O bɛ se ka kɛ cogo di? A fɔ i barokɛɲɔgɔn ye k’i b’a fɛ ka miirinata ɲuman dɔ jira a la. Dɔnniya gafe, wala Wajibiya gafenin dayɛlɛ dakun dɔ la e hakili la min bɛna diya i barokɛɲɔgɔn ye. Dakun kalan, ka tila ka ɲininkali kɛ. Bibulu tɛmɛsira minnu kofɔra, kuma o kelen, wala o fila kan. O bɛ se ka kɛ sanga 5, wala sanga 10 kɔnɔ, soda yɛrɛ la. I ka baro kuncɛ ni ɲininkali dɔ wɛrɛ ye. Waati wɛrɛ boloda walisa k’o ɲininkali jaabi.
6 K’an mago don mɔgɔw la minnu b’a jira ko tiɲɛ ka di u ye, o ye an ka baara kolomayɔrɔ dɔ de ye. O la, waati dɔ boloda dɔgɔkun kɔnɔ walisa ka segin-ka-bɔnyew kɛ. N’i bɛ a kɛ ten, i ka baara bɛ ɲɛ i bolo ka taa a fɛ, o bɛ nisɔndiya fana lase i ma.
[Study Questions]
1. Mun na segin-ka-bɔnye baara nafa ka bon nin cogo la?
2. An ka kan ka segin ka taa bɔ jɔn ye?
3, 4. Segin-ka-bɔnye ɲuman bɛ kɛ cogo di?
5. Bibulu kalan bɛ se ka daminɛ ni nɔgɔya ye cogo di?
6. An bɛ se k’a jira cogo di ko an b’a faamu ko segin-ka-bɔnye nafa ka bon?