Aw bɛ se ka aw bolo mɔɔnɔbɔ ka mɔgɔ dɛmɛ wa?

¹ Jehowa bɛ a ɲini tuma bɛɛ, k’a bolo mɔɔnɔbɔ walisa ka a ka baarakɛla kantigiw dɛmɛ. (2 Til. 16:9; Esa. 41:10, 13) A kɛlen ka Ala ni sagagɛnna sanga ɲɔgɔn ma, Esayi ye nin sɛbɛn ko: ‘A na a bolo kɛ ka sagadenw lajɛ ɲɔgɔn kan, a na u ta ka bila a kɔnkɔn na. Sagamuso minnu bɛ ka sin di sagadenw ma, a na taama dɔɔnin-dɔɔnin ni olu ye.’ (Esa. 40:11) Jehowa bɛ a mago don mɔgɔw la, ni kanuya ye. An bɛ se ka a ladege. O bɛ kɛ cogo min na, an ka o sira dama dɔw mafilɛ.

² An ka Dɛmɛ lase Mɔgɔ Kuraw ma: An bɛ se ka an bolo mɔɔnɔbɔ ka dɛmɛ lase mɔgɔ kuraw ma, ni an bɛ u wele ka na jɛɲɔgɔnya diyabɔ ni an ye min bɛ mɔgɔ nafa. (Nt. 13:20) An balimakɛ dɔ hakili tora dɛmɛ la, balima tɔw ye min lase a ma, tuma min na a ye a daminɛ ka na jɛkulu kɔnɔ. A ye nin fɔ: “Tuma caman na, denbaya dɔ tun bɛ ne sen don u ka denbaya ka Bibulu-kalan na. Ikomi dɔ tun bɛ ka fara ne ka ɲɛtaa kan, tutigɛbaga fila, cɛ dɔ ni a muso, olu tun bɛ to ka ne wele an ka taa waajuli kɛ ɲɔgɔn fɛ tile kuuru bɛɛ. Tuma bɛɛ an tun bɛ alako-barow kɛ, nafaba tun bɛ minnu na.” A ye nin fana fɔ ka fara a kan: “Yanni ne tun ka kɛ Kerecɛn ye, ne tun bɛ deli ka bɔ sibiri ani kari donw na, su fɛ. Nka ne ni balimaw tun bɛ waati minnu tɛmɛ ɲɔgɔn fɛ, o tun bɛ ne ka o bɔli nege ban.” Jɛkulu ye a mago don o balimakɛ la ni kanuya ye cogo min na, o ye o balimakɛ dɛmɛ a ka limaniya ka basigi tiɲɛ kɔnɔ. Sisan a bɛ baara kɛ betɛliso dɔ la.​—Kol. 2:​6, 7.

³ An ka dɔ fara ɲɔgɔn barika kan: Ni an bɛ kɔlɔsili kɛ, an na se ka an bolo mɔɔnɔbɔ ka dɛmɛ kɛ an balimaw ye, tuma min na u bɛ gɛlɛyaw kɔnɔ. Yali i bɛ se ka seereya kɛ telefɔni fɛ ni an balima dɛsɛbagatɔ dɔ ye wa, walima yɛrɛ ka taga a nɔfɛ, aw ka bɔ ɲɔgɔn fɛ ka Bibulu-kalan dɔ kɛ wa, walima yɛrɛ ka taga ni Bibulu-kalanden ye o dɛsɛbagatɔ ka so wa? Yali bangebaga dɔ bɛ yen min denw ma kɔrɔbaya fɔlɔ, ni o mago bɛ dɛmɛ la waajuli kɛtuma na wa? Yali mɔgɔw bɛ yen minnu bɛ maloya ni a bɛ diya u ye i ka taga u bilasira segin-ka-bɔnye dɔ sen fɛ wa? Yali u bɛ a fɛ ka u sen don waajuli kɛcogo dɔ la wa? Ni an bɛ an mago don an balimaw la ni kanuya ye o bɛ an yɛrɛ dɛmɛ ka a lajɛ sira minnu fɛ an bɛ se ka u dɛmɛ, ka u nafa.​—Rom. 14:19.

⁴ Jehowa bɛ a mago don ni kanuya ye a ka baarakɛlaw la cogo min na, ni an bɛ o ladege, an na fanga don ɲɔgɔn na, o na jɛkulu dɛmɛ a kɔnɔmɔgɔw ka taama ɲɔgɔn fɛ kanuya kɔnɔ, ka nɔɔrɔ da an sankolola Fa kan.​—Efe. 4:​16.