Aw ka aw hakili to mɔgɔkɔrɔba kantigiw la
1 Anna cɛ sara, a yɛrɛ fana kɔrɔla kosɛbɛ bawo a si san tun ye 84 ye. O bɛɛ n’a ta Anna “tun ma deli ka alabato so nali dabila hali siyɛn kelen.” A ka kantigiya ye Jehowa bila k’a ladiya kɛrɛnkɛrɛnnɛnya la. (Luka 2:36-38) Bi bi in na, balimakɛ ni balimamuso caman bɛ ka Anna ka miiriya ɲɔgɔn ta, hali ni u bɛ gɛlɛyaw la. Ni o ɲɔgɔn kantigiw waajibiyalen don ka banaw kɛlɛ, walima kɔrɔya ka dɛsɛw, o ko bɛ se ka u dusu cɛn tuma dɔw la. An ka jateminɛ kɛ an bɛ se ka dusu don u la sira minnu fɛ, ani an bɛ se k’u dɛmɛ cogoya min na, u ka delinako ɲuman mara alako ta fan fɛ.
2 Lajɛw ani forobaara: Mɔgɔkɔrɔba kantigi caman bɛ se ka na kerecɛn lajɛw la tuma bɛɛ, ni tɔw bɛ u dɛmɛ ni bolifɛnko ye, kanuya la. O bɛ dɔ fara mɔgɔ kantigi ninnu ka alamɔgɔya kan, olu minnu mɛnna kosɛbɛ baara la; jɛkulu fana bɛ nafa sɔrɔ o la kosɛbɛ. Yali aw delila ka o baara ɲuman sugu dɔ kɛ ka ye wa?—Heb. 13:16.
3 K’i sen don tuma bɛɛ forobaara la, o bɛ na ni nisɔndiya ani wasa ye kerecɛn sɛbɛw ma. Nka, o kɛli tɛ ko nɔgɔn ye mɔgɔw bolo minnu kɔrɔla, ani minnu ye dɛsɛbaatɔw ye. Yali o mɔgɔ kanulen ninnu dɔ bɛ se ka bɔ ni aw ye, ka kɛ aw “baarakɛɲɔgɔn” ye waajuli kɛcogo dɔ la wa? (Rom. 16:3, 9, 21) Laala aw bɛ se ka u wele ka telefɔnina-waajuli kɛ ɲɔgɔn fɛ, walima ka taa segin-ka-bɔnye kɛ, walima ka taa Bibulu kalan kɛ ɲɔgɔn fɛ. Ni o mɔgɔkɔrɔba tɛ se ka bɔ a ka so kɔnɔ, yala aw ka Bibulu kalanden dɔ bɛ se ka na a ka so walisa aw ka jɛ ka o kalanden ka Bibulu kalan kɛ wa?
4 Yɛrɛkalan ani mɔgɔya sira: Tuma dɔw la, dɔw b’a ɲini mɔgɔkɔrɔba dɔ fɛ, walima dɛsɛbaatɔ dɔ fɛ, u ka jɛ ka denbaya ka kalan kɛ ɲɔgɔn fɛ. O kalan bɛ se ka kɛ hali o mɔgɔkɔrɔba, walima o dɛsɛbaatɔ ka so. Denba dɔ y’a ka denmisɛnin fila ta ka taa balimamuso kɔrɔba dɔ fɛ walisa u ka kalan kɛ Recueil d’histoires bibliques gafe kɔnɔ. U bɛɛ ye dusu saalo sɔrɔ o ko la. A ka di o mɔgɔ suguw ye, balimaw ka u wele ka dumuni kɛ ɲɔgɔn fɛ, walima ka jɛ ka o ɲɔgɔnna mɔgɔya siraw taama. Ni mɔgɔ tɛ ka bonye kɛ ka mɛn dɛsɛbagatɔw bara k’a sabu kɛ ko fanga bɛrɛ t’u la, aw bɛ se ka taa bɔ u ye tuma kunkurunin na ka kalan kɛ u ye, walima ka delili kɛ ni u ye, walima ka waajuli kɔnɔ kow dɔw fɔ u ye minnu bɛna dusu don u la.—Rom. 1:11, 12.
5 Mɔgɔkɔrɔba kantigiw ye fɛn sɔngɔba ye Jehowa bolo. (Heb. 6:10, 11) An bɛ se ka ale ladege ni an bɛ u dɛmɛ u ka delinako ɲuman mara alako ta fan fɛ, ka a jira u la o cogo la, k’u nafa ka bon an bolo.