Yali i b’a fɛ ka mɔgɔ wɛrɛw dɛmɛ wa?
1 Yesu tun bɛ mɔgɔw kanu, wa, a tun bɛ a mago don u la kosɛbɛ. Tuma min na kunatɔ dɔ y’a deli a k’a dɛmɛ, Yesu y’a bolo mɔɔnɔbɔ, ka maga o cɛ la, k’a fɔ ko: ‘Ne b’a fɛ, i ka saniya.’ (Mar. 1:40-42) An bɛ se ka mun ni mun kɛ walisa ka Yesu ladege a ka mɔgɔ dɛmɛcogo la ?
2 Dɛmɛ, ka ɲɛsin mɔgɔw ma, kibaru duman ka di minnu ye: Kibaru duman ko ka di mɔgɔ minnu ye, jɛkulu kɔnɔmɔgɔ kelen-kelen bɛɛ bɛ se ka dɔ kɛ, walasa k’olu dɛmɛ u ka kɛ Jehowa batobagaw ye. Ni mɔgɔ kuraw nana lajɛw la, u fo, k’a ɲini ka dɔnniya don aw ni ɲɔgɔn cɛ. A filɛ i bɛ se ka min ni min kɛ, walasa ka dusu don u kɔnɔ. U tanu ni u ye kuma ta ka jaabiw di. U bɛ cɛsiri minnu kɛ walasa ka Bibulu sariyakolow sirataama u ka ɲɛnamaya kɔnɔ, u tanu ka da o fana kan. U dɛmɛ u k’a faamu k’u bɛ se ka teri sɛbɛw sɔrɔ jɛkulu kɔnɔ.
3 Dɛmɛ, ka ɲɛsin an batokɛɲɔgɔnw ma: Sira caman fɛ, “an balima dannabagaw,” ka kan ni an ka dɛmɛ ye, kɛrɛnkɛrɛnnenya la. (Gal. 6:10) U caman ni banaw bɛ ɲɔgɔn na. N’i bɛ taa bɔ u ye ka dusu don u kɔnɔ, u mago bɛ jɛɲɔgɔnya min na, i bɛ se k’o lase u ma. Laala fana, i na se k’u dɛmɛ cogo nafama caman na. Gɛlɛya wɛrɛw bɛ dɔw kan. A jira k’u hami b’i la, i kɛtɔ ka waati ta k’u lamɛn, ka u sabati (1 Tes. 5:14) Maakɔrɔw fana mago bɛ an ka dɛmɛ na walasa k’u jɔyɔrɔw fa. (Heb. 13:17) N’an b’a jira ko an b’a fɛ ka mɔgɔ wɛrɛw dɛmɛ, an bɛ se ka kɛ an batokɛɲɔgɔnw bolo, ‘dɛmɛbaga ye min bɛ barika don tɔw la.”— Kol. 4:11.
4 Dɛmɛ, ka ɲɛsin denbaya kɔnɔmɔgɔw ma: Yesu tun bɛ a mago don cogo min na mɔgɔw la, an ka kan k’an jija k’o ladege an ka denbaya kɔnɔ. Ikomi bangebagaw bɛ u denw ka hɛrɛ fɛ, o de b’u bila k’u “denw lamɔ ni Jehowa ka kololi ni a ka laadili ye.” (Efɛ. 6:4) Denmisɛnninw fana bɛ se k’u ta kɛ, ka teliya k’u labɛn ka kɛɲɛ denbaya ka kalan waati ma, ani jɛkulu lajɛw, walima foro baara lajɛw waati ma. Den kɔrɔbalenw bɛ se ka Yesu ka hinɛ cogo ladege, k’u bangebagaw dɛmɛ ni kanuya ye walasa bangebagaw ka se ka gɛlɛyaw kun, kɔrɔya bɛ na ni gɛlɛya minnu ye. O siraw fɛ, ani sira wɛrɛw fɛ, an bɛɛ bɛ se ‘ka alaɲɛsiranyɛ walew kɛ an ka denbaya kɔnɔ.’—1 Tim. 5:4.
5 N’an bɛ Yesu ladege mɔgɔ wɛrɛw dɛmɛni sira fɛ, an bɛ se ka dɔ bɔ kunkow la, ka an ka denbaya ni jɛkulu gɛrɛ ɲɔgɔn na kosɛbɛ. Min nafa ka bon ni fɛn bɛɛ ye, o ye ko an bɛ bonya da Jehowa kan, ale min ye ‘Makari Fa’ ye—2 Kɔr. 1:3.