An ka Jehowa tanu an kɛtɔ ka senfɛ-seereya kɛ
1 Jehowa ka baarakɛla sɛbɛw bɛ ko bɛɛ kɛ walisa ka a tanu don o don. (Zab. 96:2, 3; Heb. 13:15) An bɛ se k’o kɛ sira minnu fɛ, olu dɔ la kelen ye senfɛ-seereya ye. Jehowa batobaga caman bɛ barika da, k’a sabu kɛ ko senfɛ-seereya baara fɛ, mɔgɔ dɔ ye Masaya kibaru kofɔ u ye.
2 Ni an bɛ senfɛ-seereya kɛ mɔgɔ dɔ fɛ, tuma caman o b’a to mɔgɔ wɛrɛw ka masaya kibaruya mɛn. Misali la, Yesu ye baro min kɛ samarika muso fɛ, Yakuba ka kɔlɔn da la, o kɛra sababu ye mɔgɔ caman wɛrɛw k’a jira k’u mago bɛ kibaru duman na. (Yuh. 4:6-30, 39-42) Tuma min na Pol ni Silasi tun bɛ kaso la, Filipi dugu la, u ye seereya kɛ kasoladenw lakɔlɔsibaga ye. Wa o cɛ ni a somɔgɔw bɛɛ sɔnna tiɲɛ ma.—Kɛw. 16:25-34.
3 Waati bɛnnenw: Tuma jumɛn, a se bɛ an ye ka senfɛ-seereya kɛ? Dɔw bɛ a kɛ ka u to sanni la, wala k’u to fana foroba bolifɛnw kɔnɔ, wala yɛrɛ k’u to makɔnɔni na dɔgɔtɔrɔso la. Dɔw fana bɛ a kɛ lafiɲɛ waati la, baarakɛyɔrɔ la wala lakɔliso la. Hali ni a danna, an k’an ka gafe dɔ bila yɔrɔ la, a ye ka di yɔrɔ min na, o bɛ a to mɔgɔ dɔ k’a ɲini ka fɛn dɔ dɔn an ka dannaya kan.—1 Piɛrɛ 3:15.
4 A bɛ se ka daminɛ cogo min na: Npogotiginin dɔ min bɛ maloya ka kuma ni a si tun ye san 7 ye, o y’a mɛn lajɛ dɔ la ko a nafa ka bon, an bɛɛ ka waajuli kɛ. O la sa, tuma min na a tun bɛna bɔ ni a ba ye ka taa sanni kɛyɔrɔ la, a ye gafenin fila ta ka bila a ka sakɔsi kɔnɔ. Ka a ba to wari sarayɔrɔ la, npogotiginin ye gafenin di muso dɔ ma, min sɔnna k’a minɛ. A ɲininkalen, ko a sera cogo di ka dusu ta ka kuma muso fɛ, npogotiginin ye nin jaabi di: “Ne ko ne yɛrɛ kɔnɔ, i labɛn! Taa! Coyi! Wa ne taara!”
5 Walisa ka senfɛ-seereya kɛ, fo a baara ka diya an ye iko nin npogotiginin cogo. Mun dun bɛ se k’an dɛmɛ? An ka delili kɛ walisa an ka dusu sɔrɔ ka kuma. (1 Tes. 2:2) An ka ɲininkali dɔ labɛn, walima ka masalakun nafama dɔ ɲɛfɔlicogo labɛn baro bɛ daminɛ ni min ye. O kɔ, an ka da a la ko Jehowa bɛ duba an ka cɛsiri ye.—Luka 12:11, 12.
6 An bɛ bɛn ni mɔgɔ minnu ye don o don, ni an bɛ to ka senfɛ-seereya kɛ olu fɛ, o bɛ kɛ tanuli ye Jehowa ma, ani o bɛ nisɔndiya lase an ma. O bɛ se ka a to mɔgɔ dɔ ka ɲɛnamaya sira ta.