An ka kɛ mɔgɔ timinandiw ye ‘ka seereya kɛ k’a dafa’
1 Yesu ni fɔlɔ mɔgɔ kantigi caman wɛrɛw tun cɛsirilen bɛ cogo min na, ciden Paul fana tun cɛsirilen bɛ o cogo kelen na ten kibaru duman waajuli la. A tun bɛ yɔrɔ o yɔrɔ la, a tun bɛ ‘seereya kɛ k’a dafa.’ Hali k’a sɔrɔ a tun minɛnen bɛ a ka so, ka garadi dɔ bila a kunna, ‘mɔgɔ minnu tun bɛna bɔ a ye, a ye u bɛɛ bisimila ka ɲɛ, ka waajuli kɛ Ala ka masaya ko la, ani ka mɔgɔw kalan Matigi Yesu Krista ko la ni kɔnɔnajɛya ye, k’a sɔrɔ mɔgɔ si ma a bali.’—Kɛw. 28:16-31.
2 An fana bɛ se ka kɛ mɔgɔ timinandiw ye, ka ‘seereya kɛ k’a dafa’ tuma bɛɛ. O kɔrɔ ye ka seereya kɛ mɔgɔw ye, an ni minnu bɛ bɛn an taatɔ ani an natɔ ka bɔ jamalajɛw ni kafobaw ka jamalajɛw la ani an ka sɛgɛnlafiyɛnwaatiw la.—Kɛw. 28:23; Zab. 145:10-13.
3 Senfɛ-seereya ye mun de ye? Senfɛ-seereya tɛ fɛn ye min bɛ na a yɛrɛ ma ten, k’a sɔrɔ a ma dabɔ a kama. A tɛ iko ni a ko ma boloda, walima iko ni a ko nafa man bon kosɛbɛ mɔgɔ bolo. A jɛlen don ko o tɛ se ka fɔ an ka cidenyabaara ko la. A nafa ka bon an bolo ka nɔɔrɔ da Ala kan an ka seereya fɛ, iko a nafa tun ka bon cogo min na Paul bolo k’o kɛ. An ŋaniya ka kan ka kɛ ka seereya kɛ an ka taamaw senfɛ, ni o bɛnnen bɛ tuma o tuma. Nka, an bɛ kuma mɔgɔw fɛ cogo min na, a bɛ se ka fɔ o ma cogo bɛnnen na ko senfɛ-seereya. O ye ka kuma mɔgɔ fɛ ni nɔgɔya ye, teriyasira la, i n’a fɔ an bɛ deli ka kuma cogo min na an ka baro gansan la. O seereya kɛcogo bɛ se ka wolo koɲuman caman na.
4 An ka an labɛn ka seereya kɛ: Paul tun ye fɛɛrɛw tigɛ walisa ka se ka kuma mɔgɔw fɛ hali k’a sɔrɔ garadi dɔ tun bilalen bɛ a kunna, a ka so Romɛ. K’a to a ka so kɔnɔ, a y’a bɔ a yɛrɛ la ka Yahutu ɲɛmɔgɔw wele u ka na a ka so. (Kɛw. 28:17) Hali k’a sɔrɔ Kerecɛn jɛkulu dɔ tun bɛ Romɛ, Paul y’a mɛn ko Yahutu jɛkulu min tun bɛ o dugu kɔnɔ, o tun tɛ ni kunnafoni bɛrɛ ye Kerecɛn diinɛ ko la. (Kɛw. 28:22; Rom. 1:7) A ma a yɛrɛ minɛ ka ‘seereya kɛ k’a dafa’ Yesu Krista ni Ala ka Masaya ko la.
5 I ka kɔn ka miiri mɔgɔw bɛɛ la, i bɛ se ka kuma minnu fɛ i ka taamaw senfɛ. I b’a sɔrɔ dɔnniya bɛrɛ tɛ u la Jehowa Seerew ko la. Laala u t’a dɔn yɛrɛ ko an bɛ mɔgɔw kalan Bibulu la fu. I bɛ se ka cogo minnu sɔrɔ walisa ka seereya kɛ mɔgɔw ye, i bɛ minnu ye i ka taamaw senfɛ, motobatigiw lafiyɛnyɔrɔ la, sansi tayɔrɔw la, bitikiw kɔnɔ, i dumunikɛtɔ lotɛliw la, foroba bolifɛnw kɔnɔ, ani ko tɔw bɛɛ la, i k’i ɲɛmajɔ o kow bɛɛ fɛ. I bɛ se ka min fɔ walisa ka baro daminɛ, ka seereya surun kɛ, i ka kɔn ka miiri o la. Walisa i ka se ka o kɛ ka ɲɛ, sani o donw ka se, i bɛ se ka i yɛrɛ dege senfɛ-seereya kɛli la n’i sigiɲɔgɔnw, n’i somɔgɔw, n’i baarakɛɲɔgɔnw ni i dɔnbaga wɛrɛw ye.
6 I mago bɛna kɛ sɛbɛnw hakɛ dɔ la walisa ka senfɛ-seereya kɛ. O sɛbɛnw ye jumɛnw ye? I bɛ se ka baara kɛ ni Aimeriez-vous en savoir plus sur la Bible ? sɛbɛndennin ye. I sinsin dakun duuru fɔlɔw kan. Kun caman minnu kosɔn Bibulu ka kan ka kalan, olu dilen bɛ o yɔrɔ la. Mɔgɔ bɛ se ka Bibulu kalan ɲini yɔrɔ min na sɛbɛndennin kɔfɛ, o jira. Ni i ye mɔgɔ sɔrɔ min b’a fɛ, i ka Wajibiya gafenin to o tigi bolo. I ka Une bonne nouvelle pour toutes les nations gafenin ta i bolo, ni a nana kɛ ko i ye mɔgɔ dɔ ye min bɛ kan wɛrɛ fɔ. O la sa, i ka a ɲɛ 2nan jira a la walisa ka seereya di o tigi ma. N’i bɛ taa kariba de fɛ, i bɛ se ka sɛbɛn dɔ wɛrɛw ta i bolo Bibulu dɔnniya jujɔ bɛ minnu kɔnɔ, mɔgɔw kama minnu bɛna a jira ko Masaya kuma ka di u ye tiɲɛ na.
7 I k’i jan to i yecogo ni i taamacogo la: An ka kan ka jɛya a la ko an taamacogo, an ka finidoncogo ani an kun dilancogo tɛna a to mɔgɔw ka hakilina jugu sɔrɔ an ko la, o ka kɛ sababu ye u ka fɛn fɔ Jehowa ka jɛkuluba ma min man ɲi. (Kɛw. 8:22) An t’an jan to o kow la dɔrɔn ni an bɛ jamalajɛw ni kafoba ka jamalajɛw la. An bɛ an jan to o kow la lafiyawaatiw la fana ani n’an bɛ taa taama na. San 2002 Utikalo tile fɔlɔ La Tour de Garde ɲɛ 18 dakun 14nan ko: “An ka fini kulɛri man kan k’a to mɔgɔw k’an kɔlɔsi kabini an bɛ yɔrɔ jan, walima ka kɛ finiw ye minnu bɛ mɔgɔw nege lawuli an nɔfɛ. U man kan ka kɛ finiw ye minnu tɛ mɔgɔ sutura. An ka finiw man kan ka kɛ sangawuli fɛnw ye fo k’a dama tɛmɛ. Ka fara o kan, an ka kan ka fini don cogo la min bɛ ‘bonya da Jehowa kan.’ Yali o t’an bila ka miiri wa? A ko tɛ dɔrɔn ka fini bɛnnenw don ni an bɛ taa jɛkulu ka lajɛw la, ka tila ka an mago bɔ pewu o ko la waati wɛrɛw la. An ka finidoncogo ka kan ka bonya ni danbe jira tuma bɛɛ, bawo an ye Kerecɛnw ni cidenyabaarakɛlaw ye sanga ni waati bɛɛ la.”—1 Tim. 2:9, 10.
8 An ka kan ka fini don cogo bɛrɛ bɛnnen na, ni danbe ye. Ni an ka finidoncogo ni an taamacogo b’a jira ko an ka dannaya bɛ Ala kan, an tɛna an yɛrɛ minɛ abada ka senfɛ-seereya kɛ k’a sababu kɛ ko an ka fini cogo t’a to an ka se ka o kɛ.—1 Pi. 3:15.
9 Senfɛ-seereya bɛ nɔ bɔ: San fila minnu kɔnɔna na Paul tun minɛnen bɛ a ka so kɔnɔ Romɛ, a ye cɛsiri minnu kɛ ka seereya kɛ, a ye o nɔ ɲumanw ye. Luka y’a sɛbɛn ko ‘dɔw dara a ka kuma fɔlen na.’ (Kɛw. 28:24) Paul ye ‘seereya min kɛ k’a dafa,’ a kumana o nafa kan, tuma min na a ye nin sɛbɛn: ‘Ko minnu kɛra ne la, olu de y’a to kibaru duman taara ɲɛ. Garadi Perotoniɲɛni [masakɛ ka garadiw] mɔgɔw bɛɛ ani tɔw bɛɛ fɛ, ne sirilen bɛ Krista kosɔn. Balima caman dusu sigira Matigi la ne sirilanw kosɔn, u jagɛlɛyara kosɛbɛ ka Ala ka kuma fɔ ni siran tɛ.’— Fil. 1:12-14.
10 Kasamansi jɛkulu dɔ la, weleweledaw ye taratadon bila senfɛ-seereya kama. Salon, weleweledala dɔ kumana lakɔliba kamalennin dɔ fɛ yen, nbɛda la. Baro surun dɔ kɔfɛ Bibulu kan, a sɔnna Avez-vous un esprit immortel ? sɛbɛndennin na. Weleweledala y’a wele fana ka na foroba jɛmukan dɔ la min tun bolodara o kari nata. A tun ye Masaya so ladɛrɛsi sɛbɛn o sɛbɛndennin kɔfɛ. A kɛra nisɔndiyakoba ye ka o kamalenin ye mɔgɔ fɔlɔw la minnu nana lajɛ la o don na! Lajɛ bannen kɔfɛ dɔrɔn, fɛɛrɛw tigɛra walisa Bibulu kalan ka kɛ a kun a ka so. K’a ta o don ma, a y’a daminɛ ka taa jɛkulu ka lajɛw bɛɛ la, jɛkulu ka gafe kalan sen bɛ o la. Kalo saba Bibulu kalan kɔfɛ, a tilara Wajibiya gafenin kalan na. O kɔfɛ, a ye Dɔnniya gafe kalan daminɛ. O tun bɛ kɛ siɲɛ fila dɔgɔkun kɔnɔ. A ye taali dabila a ka diinɛ kɔrɔ batoso la. E fana bɛ se ka nafa jumɛn sɔrɔ ni i ye i ɲɛmajɔ ka ‘seereya kɛ k’a dafa’?
11 An ka dɔ kɛ walisa Kibaru duman ka taa ɲɛ cogo dafalen na: E ka miiri Paul ka nisɔndiya bonya ma, tuma min na a y’a mɛn ko a Kerecɛn ɲɔgɔnw y’a ka timinandiya ladege seereya kɛli la! An fana ka an seko damajira bɛɛ kɛ walisa kibaru duman ka taa ɲɛ, an kɛtɔ ka senfɛ-seereya kɛ an ka dannayakow ko la minnu sinsinnen bɛ Bibulu kan.
[Study Questions]
1, 2. Kibaru duman tun bɛ Paul bolo cogo min na, o bɛ nɔ jumɛn bila i la? An bɛ se k’a ladege cogo di ‘seereya dili la k’a dafa’?
3. An bɛ se ka mun kɛ walisa an ka senfɛ-seereya kana laban ka kɛ fɛn ye an bɛ bala ka min kɛ dɔrɔn waati ni waati?
4. Mun y’a to Paul sera ka seereya kɛ k’a to a ka so kɔnɔ?
5, 6. Cogo jumɛnw b’an bolo walisa ka senfɛ-seereya kɛ, ani an ka kan ka labɛn jumɛnw kɛ walisa ka se k’o kɛ ka ɲɛ?
7, 8. An ka kan ka an ɲɛmajɔ laadilikan jumɛn fɛ an yecogo ni an taamacogo la, an ka lafiyawaati la ani ni an bɛ taa taama na?
9. Paul ye seereya min kɛ Romɛ, nafa jumɛn sɔrɔla o la?
10. Weleweledala dɔ ye nafa jumɛn sɔrɔ salon senfɛ-seereya la?
11. An kɛtɔ ka ‘seereya kɛ k’a dafa’ walisa kibaru duman ka taa ɲɛ, an ka kan ka jogo ɲuman jumɛnw baara an na?
[Box on page 3]
I mago bɛ sɛbɛn minnu na senfɛ-seereya kama
■ Aimeriez-vous en savoir plus sur la Bible ? (Sɛbɛndennin)
■ Ala bɛ mun wajibiya anw ma ? (gafenin)
■ Une bonne nouvelle pour toutes les nations (gafenin)
■ Sɛbɛn wɛrɛw
[Box on page 4]
I kana ɲinɛ u kɔ!
I kana ɲinɛ jɔni kɔ? Kibaru duman ka di mɔgɔ minnu bɛɛ ye ni u nana Krista ka saya Hakilijigin na walima foroba jɛmukan kɛrɛnkɛrɛnnen na. Yali an ye u wele walisa u ka na tuma bɛɛ Foroba jɛmukan ni La Tour de Garde kalanw na wa? A ka c’a la, u caman bɛna na ni an bɛ dusu don u kɔnɔ ni ɲumanya ye. Ikomi u bɛna jɛɲɔgɔnya ɲuman sɔrɔ Masaya so kɔnɔ, ka alako kalan sɔrɔ min bɛ dusu don mɔgɔ kɔnɔ, o bɛna u gɛrɛ kosɛbɛ Jehowa ni a ka jɛkuluba la. Mun na an tɛna u wele k’a lajɛ ni u bɛna na? U mago bɛ kunnafoni minnu bɛɛ la, i ka olu di u ma. Foroba jɛmukan nataw ani La Tour de Garde minnu bɛna kɛ, ani lajɛw kɛwaatiw sen bɛ o kunnafoniw na.