Kibaru duman ci kalifalen bɛ an ma

¹ Bonyaba don an fɛ dɛ, Ala ka kibaru duman ci ka kalifa an ma! (1 Tes. 2:4) Ni mɔgɔ dɔw tɛ sɔn nin cikan barikama in na, mɔgɔ tilennenw kɔni bɛ sama a nɔfɛ, iko fɛn kasa duman. (2 Kɔr.​2:14-​16) Minnu bɛ sɔn kibaru duman na, k’a sira taama, a bɛ olu kisi. (Rom. 1:16) An ka kan ka nin baara in minɛ cogo di?

² Yesu ani cidenw: Yesu ye kibaru duman weleweledali bila jɔyɔrɔ fɔlɔ la. (Luka 4:​18, 43 ) Hali k’a sɔrɔ a sɛgɛnnen bɛ, ka kɔngɔ to a la, mɔgɔw kanuya min tun bɛ a la, ani a tun bɛ cikan minɛ cogo min, o tun bɛ a to a k’a kuma fɔ mɔgɔ tɔw ye. (Mar. 6:​30-​34) A kumacogo ni a kɛcogo fɛ, Yesu ye a ka cidenw dɛmɛ u k’a faamu ko Masaya weleweledali baara nafa ka bon.​—Mat. 28:18-20; Mar. 13:10.

³ U kɛtɔ ka Yesu ladege, cidenw ye Masaya cikan fɔ ni cɛsiri ye. Hali u bugɔlen kɔ ani a fɔlen u ye k’u ka waajuli dabila, “u ma mɔgɔ kalanni ni kibaru duman fɔli dabila.” (Kɛw. 5:​40-​42) Ciden Pol ye baara kɛ o cogo la. A tun tɛ sɛgɛn jate. (1 Kɔr. 15:​9, 10; Kol. 1:​29) Bonya min tun bɛ a bolo ka kibaru duman jɛnsɛn a tun ye o kɛ iko juru min bɛ ale la ka ɲɛsin a mɔgɔɲɔgɔn ma. Ani fana a tun labɛnnen don ka jɛn a yɛrɛ ka nafaw kɔ walisa k’a ka baara kɛ k’a dafa.​—Kɛw. 20:24; Rom. 1:​14-​16.

⁴ Bonya min b’an bolo bi: Ci senuma min kalifalen bɛ an ma ni o sɔngɔ ko ka bon an bolo kosɛbɛ, o b’an bila ka fɛɛrɛw ɲini walisa an ka dɔ fara an ka kɛta kan waajuli baara la. (Rom. 15:16) Eduwari tun ye nanbara dɔ ye. A tun bɛ sigi a ka wotoronin kɔnɔ lotɛli dɔ da la, ka to ka kuma mɔgɔw fɛ a ka dannaya kan. Ikomi a tun bɛ a fɛ ka dɔ fara a ka waajuli baara kan, a ye bolifɛn dɔ dilan a yɛrɛ ye; o cogo la a ye tutigɛbagaya baara kɛ san damadɔ, ka kilomɛtɛrɛ ba caman boli. Eduwari cogo la, bi bi in na, mɔgɔ caman bɛ u ka waati labɛn cogo la, walisa u ka se ka dɔ fara u ka kɛta kan foro baara la, ka kibaru duman jɛnsɛn.

⁵ Yesu ni a ka cidenw cogoya la, an fana ka waajuli baara bila jɔyɔrɔ fɔlɔ la an ka ɲɛnamaya kɔnɔ. Ni an bɛ a kɛ ten, o bɛ a jira ko an bɛ mɔgɔw kanu ani ko an bɛ waleɲumandɔn jira k’a sabu kɛ kibaru duman ci kalifalen ye an ma.