Tila 9: Ka Bibulu-kalanw ɲɛminɛ minnu bɛ taa ɲɛ
An ka kalandenw labɛn walisa u ka se ka senfɛ-seereya kɛ
1 Andre ni Filipe y’a faamu tuma min na ko Yesu de ye Masiya kofɔlen ye, u ma se k’u yɛrɛ minɛ, u ye o nisɔndiyakoba fɔ tɔw ye. (Yuh. 1:40-45) O cogoya kelen na bi, ni an ka Bibulu-kalandenw dalen bɛ u ka fɛn kalantaw la, o b’u bila ka kuma o kan. (2 Kɔr. 4:13) Cogoya jumɛn na an bɛ se ka dusu don Bibulu-kalandenw kɔnɔ walisa u ka senfɛ-seereya kɛ, ani cogoya jumɛn na, an bɛ se ka u labɛn walisa u ka o baara kɛ ka nɔ ɲuman bɔ?
2 I bɛ se ka Bibulu-kalanden ɲininka dɔrɔn n’a sɔrɔ a ye fɛn minnu kalan, a kumana olu kan mɔgɔ wɛrɛw ye. Laala kalanden teriw bɛ yen, wala a somɔgɔw, a bɛ se ka minnu wele ka na Bibulu-kalan na. A ɲininka n’a sɔrɔ a baarakɛɲɔgɔn, wala a lakɔlidenɲɔgɔn, wala a dɔnbaga wɛrɛw y’a jira ko kibaru duman ka di u ye. Ni an ka Bibulu-kalanden bɛ mɔgɔ wɛrɛw wele ka na Bibulu-kalan na, ani ni a bɛ baro kɛ ni mɔgɔw ye minnu y’a jira ko kibaru duman ka di u ye, o bɛ se ka kɛ a ka seereyabaara daminɛtɔ ye. Kalanden lafaamuya ko o baara in tɛ taa jateminɛ ni mɔgɔ-bonya kɔ. Ani kalanden yɛrɛ ka kan ka kɛ mɔgɔ nisɔndiyalen ye n’a bɛ kuma mɔgɔw fɛ Jehowa Ala kan ani Jehowa ka kuntilennaw ko la.—Kol. 4:6; 2 Tim. 2:24, 25.
3 U k’u ka dannakow fɔ mɔgɔw ye: Nafaba bɛ a la ka an ka Bibulu-kalandenw dege u ka baara kɛ ni Ala ka Kumakan ye, u kɛtɔ ka u ka dannakow fɔ mɔgɔ wɛrɛw ye. I mana se i ɲɛna yɔrɔ damadɔw la kalan kɔnɔna na, i bɛ kalanden ɲininka o yɔrɔw kan ko: “E bɛ se ka Bibulu ta ka nin tiɲɛ in ɲɛfɔ i ka denbaya ye cogo di?” wala i bɛ se ka a ɲininka ko: “E bɛna Bibulu tɛmɛsira jumɛn de ta walisa k’a jira i terikɛ la ko nin ye tiɲɛ ye?” I tulomajɔ a ka jaabi la, i k’a jira a la, a bɛ se k’a ka kuma sinsin Bibulu Sɛbɛnniw kan cogoya min na. (2 Tim. 2:15) N’i bɛ to ka o kɛ, i na se ka kalanden labɛn walisa a ka seereya kɛ, a kɛra senfɛ-seereya ye wo walima ni yamaruya dira a ma ko a ka a sen don jɛkulu ka waajuli-baara-labɛnnen na.
4 Hakilitigiya don ni an ye Bibulu-kalanden labɛn a ka se ka mɔgɔw ka juguya kun. (Mat. 10:36; Luka 8:13; 2 Tim. 3:12) Ni mɔgɔ wɛrɛw ye ɲininkaliw lawuli walima ni u ye kuma dɔw fɔ Jehowa Seerew kan, o bɛ se ka sira dayɛlɛ kalanden ye a ka seereya kɛ. Gafenin min tɔgɔ ye ko Les Témoins de Jéhovah—Qui sont-ils ? Quelles sont leurs croyances ? (Jehowa Seerew ye jɔni ye? U dalen bɛ mun la?) O gafenin bɛ se ka kɛ baarakɛminɛn ye u bolo walisa ‘u labɛnnen ka sɔrɔ jaabi dili la.’ (1 Pi. 3:15) Kunnafoni jɔnjɔn bɛ sɔrɔ o gafenin kɔnɔ. Mɔgɔ kuraw bɛ se ka u teriw ŋaniyaɲumantigiw ani u yɛrɛ somɔgɔw lafaamuya ni o ye. O cogo la olu bɛ se ka an ka dannakow ni an ka kɛwalew faamu, minnu sinsinnen bɛ Bibulu kan.