I seko bɛɛ kɛ sumantigɛ la
1 Jehowa ka fɔlɔ kiraw ni Yesu yɛrɛ kumana dalajɛli baara ko la. (Esa. 56:8; Eze. 34:11; Yuh. 10:16) O Masaya kibaru duman wajuli baara in b’a la ka dafa sisan diɲɛ bɛɛ kɔnɔ. (Mat. 24:14) Mɔgɔ minnu bɛ baara kɛ Ala ye ani minnu tɛ baara kɛ a ye, olu ni ɲɔgɔn cɛ danfara bɛ ka ye kɛnɛ kan kosɛbɛ. (Mal. 3:18) O kɔrɔ ye mun ye an bolo?
2 An bɛɛ kelen-kelen ka doni don: An bɛ se ka kalan sɔrɔ Pol ka misali la, Pol min y’a seko bɛɛ kɛ Krecɛnw ka cidenyabaara daminɛ na. A tun b’a miiri ko wajibi tun don ale ma, a ka wajuli kɛ walasa mɔgɔw bɛɛ ka kibaru duman mɛnnicogo sɔrɔ, ka kisi. O y’a bila ka baara kɛ sanga ni waati bɛɛ la u ka nafa kama. (Rom. 1:14-17) Hadamadenw bɛ faratiba min na bi, n’an y’o mafilɛ, yali a tɛ kɛ an fana ma wajibiba ye, k’an ka wajulikɛyɔrɔ mɔgɔw waju wa?—1 Kɔr. 9:16.
3 Wale teliman kɛtuma: Wajuli baara bɛ se ka sanga ni mɔgɔ tununnenw ɲinini n’u kisili baara ye. Mɔgɔw yɔrɔ ka kan ka dɔn, ani u ka kan ka dɛmɛ u kisili kama sanni ko ka taa ka dan kɛ. Waati dan tigɛlen don. Ɲɛnamayaw bɛ farati la! A tɛ bala mɔgɔ la Yesu k’a fɔ a ka kalandenw ye ko “ka suman tigi deli ko a ka baarakɛlaw bila ka taa a ka suman tigɛ.”—Mat. 9:38.
4 U kɛlen k’a dɔn ko bi ye kɔrɔtɔ waati ye, Masaya baarakɛla caman ye dɔ fara u ka baara kan ɲɛnamaya kisili kama. Funankɛ dɔ n’a dɔgɔnin naani bɛ u woloba kelen de bolo. A tɔgɔ ko Hirohisa. Walasa k’a somɔgɔw dɛmɛ, a bɛ soli ka wuli kabini sɔgɔma nɛgɛ kan ɲɛ sabanan na, ka taa donkibarusɛbɛnw di. Ikomi Hirohisa tun b’a fɛ ka caman fara a ka cidenyabaara kan, o la, a y’a daminɛ ka tutigɛbaga basigilen baara kɛ. Yali cogo dɔw bɛ yen wa, cogo minnu fɛ i bɛ se ka caman kɛ nin baara la, baara min tɛna kɛ siɲɛ fila abada?
5 “Waati tɔ tɛ bɛrɛ ye.” (1 Kɔr. 7:29, Layidu Kura) O la sa, an bɛ se ka fɛn o fɛn kɛ, an k’o kɛ baara la min nafa ka bon ni tɔw bɛɛ ye, baara min b’a la ka kɛ diɲɛ kɔnɔ bi, n’o ye ka Masaya kibaru duman wajuli kɛ, ani ka mɔgɔw kɛ kalandenw ye. Yesu tun ye nin cidenyabaara ni sumantigɛ sanga ɲɔgɔn ma. (Mat. 9:35-38) An mana an seko bɛɛ kɛ sumantigɛ la, an ka baara nɔ bɛ se ka kɛ mɔgɔ dɔ dɛmɛni ye ka kɛ batobagaw ka jamaba mɔgɔ ye, jamaba min kofɔlen don Jirali 7:9, 10 kɔnɔ.