An nisɔndiyalen de bɛ an yɛrɛ di Jehowa ka baara ma!
1 Ciden Paul tun nisɔndiyalen de ye a yɛrɛ “bɛɛ di” Kretiɛn ka waajuli baara kɛli kama. (2 Kɔr. 12:15) O cogo kelen na bi, Kretiɛn caman ye tutigɛbagaw ye, wa, u bɛ baara kɛ kosɛbɛ waajulibaara la. Kretiɛn dɔw fana ka denbaya ka doni ka bon kosɛbɛ, nka u b’u ka kow labɛn walisa ka waati bila dɔgɔkun o dɔgɔkun walisa ka waajuli kɛ. Dɔw ye banabagatɔw ye kosɛbɛ, nka fanga fitinin min bɛ olu la, u bɛ o kɛ ka Masaya kunkankow taa ɲɛ. A bɛ dusu don an kɔnɔ k’a ye ko Jehowa ka jamakulu bɛ a yɛrɛ di Jehowa ka baara ma, a ka jamakulu kɔnɔmɔgɔw si hakɛ walima u ka cogoyaw mana kɛ fɛn o fɛn ye.
2 An mɔgɔɲɔgɔn kanuya: Ni an bɛ an seko bɛɛ kɛ walisa ka baara kɛ Jehowa ye, k’a jira o cogo la ko an bɛ Ala kanu ani ko an bɛ an mɔgɔɲɔgɔn kanu, o b’a to an dusukun tɛ an tɔɔrɔ ko fosi la. Ikomi Paul ye a yɛrɛ di kibaru duman waajuli kosɔn, a sera k’a fɔ ni nisɔndiya ye ko: “Ne b’a fɔ ka jɛya bi, ko mɔgɔ si joli hakɛ tɛ ne kan.” (Kɛw. 20:24, 26; 1 Tes. 2:8) Ni an ka cogoyaw b’a to an bɛ se ka waajuli kɛ ka se hakɛ min ma, ni an bɛ o kɛ, o bɛna an bali ka kɛ mɔgɔw ye joli hakɛ bɛ minnu kan.—Eze. 3:18-21.
3 Ni an bɛ waajuli kɛ kosɛbɛ walisa ka mɔgɔ wɛrɛw dɛmɛ, o bɛ na ni nisɔndiya ye. (Kɛw. 20:35) An balimakɛ dɔ y’a fɔ ko: “Ni su kora, ni ne nana so k’a sɔrɔ ne tilenna Jehowa ka baara la, siga t’a la, ne sɛgɛnnen don. Nka, ne nisɔndiyalen don, wa, ne bɛ Jehowa fo bawo a ye sewa di ne ma mɔgɔ si tɛ se ka min bɔsi ne na.”
4 Ala kanuya: An b’an yɛrɛ di Jehowa ka baara ma kun bɛɛ la belebele min na, o ye ko o ka di an sankolola Fa ye. Ala kanuya b’an bila ka tugu a ka cikanw kɔ, waajuli ni kalandenw kɛli sen bɛ o cikan minnu na. (1 Yuh. 5:3) Hali ni mɔgɔw ye kibaru duman mɛn, nka o tɛ fɛn fosi kɛ u la, walima ni mɔgɔw b’an kɛlɛ kibaru duman kosɔn, an nisɔndiyalen de bɛ baara kɛ kosɛbɛ Jehowa ye ka taa a fɛ.
5 Sisan tɛ waati ye ka dɔ bɔ an ka baara la. An bɛ sumantigɛ waati de la. (Mat. 9:37) Sumantigɛ waati la, tuma caman na sɛnɛkɛla bɛ baara kɛ lɛrɛ caman kɔnɔ, bawo waati min b’a bolo ka suman dalajɛ sani o ka daminɛ ka tiɲɛ, dan bɛ o waati la. Waati min b’an bolo ka sumantigɛ baara kɛ alako ta fan fɛ, dan fana bɛ o waati la. An bɛɛ ka an jija kosɛbɛ waajuli la ka taa a fɛ, an kɛtɔ ka an hakili jigin an bɛ waati min na.—Luka 13:24; 1 Kɔr. 7:29-31.