Iko sigiɲɔgɔn ɲuman, i ka seereya kɛ
1 Yesu y’a fɔ ko: “I k’i mɔgɔ ɲɔgɔn kanu iko i yɛrɛ.” (Mat. 22:39) Siga t’a la k’i bɛ “koɲuman kɛ” i dannayakɛɲɔgɔnw ye, nka yali i bɛ se k’i ka kanuya bonya k’o lase mɔgɔ wɛrɛw ma minnu b’i kɛrɛfɛ wa? (Gal. 6:10) Sira jumɛnw fɛ?
2 I yɛrɛ jirali fɛ: Yali i sigiɲɔgɔnw b’a dɔn k’i ye Jehowa Seere ye wa? N’u t’o dɔn, mun na i tɛna taa bɔ u ye foro baara kɔnɔna na? O bɛ wolo fɛn min na, o bɛ se ka kɛ fɛn ye min bɛna bala i la. Walima n’o ka nɔgɔn i ma kosɛbɛ, a ɲini ka kuma u fɛ senfɛ seereya cogo fɛ. N’i bɛ kɛnɛmana na, i bɛ se k’u ye baara la u ka du kɛnɛmana na, walima k’u yaala-yaalatɔ ye sira kan. I ka gɛrɛ u la ni nisɔndiya ye. I jija walasa ka kuma i ka dannayakow kan. Masaya So bɛ yɔrɔ min na, ani fɛn minnu bɛ kɛ o yɔrɔ la, i k’o fɔ. Ni mɔgɔ wɛrɛ b’i sigida la min bɛ na lajɛw la, i k’o fana fɔ u ye. I k’u wele lajɛw la. I jɔlen ka to a kan walasa i ka seereya dafalen kɛ kibaru duman ko la i dɔnbaga kelen-kelen bɛɛ ye.— Kɛw. 10:42; 28:23.
3 I taamacogo ɲuman fɛ: I ka sigiɲɔgɔnya ɲuman bɛ fɛn caman jira i ko la, wa, a bɛ se ka sira dayɛlɛ i ka se ka seereya kɛ. O fana bɛ ‘Ala ka kalan bonya ko bɛɛ la.’ (Tit. 2:7, 10) I k’i mago don tigitigi i sigiɲɔgɔnw na. I ka teriyasira taama u fɛ, ka kɛ mɔgɔ faamuyalen ye. I kana u tɔɔrɔ. I k’u ka yɔrɔ sumanen to. N’u dɔ la kelen man kɛnɛ, i ka bonya kɛ ka ɲɛsin u ma, k’u ɲininka n’i bɛ se k’u dɛmɛ. Ni denbaya dɔ yɛlɛmana i sigida la, i ka taa bɔ u ye, k’a jira u la k’u nali diyara i ye. K’o ko ɲuman sugu kɛ, o bɛ nɔ ɲuman to, wa, o ka di Jehowa ye.—Heb. 13:16.
4 I ka du cogoya fɛ: K’i ka du minɛ koɲuman walasa a ka se ka filɛ ni nisɔndiya ye, o fana sen bɛ sigiɲɔgɔnya ɲuman kow la. So min n’a dukɛnɛ saniyalenw don, n’a cɛ ka ɲi, olu ye u dama seereya ye. Nka, so min nɔgɔlen don, walima ni fɛnw fili-fililenw bɛ a lamini na, a ka c’a la, o bɛna dɔ bɔ Masaya cikan nafa la. O la sa, nafaba de b’a la i ka du, i ka dukɛnɛ n’i ka mobili saniyalen ka to, ani minɛcogo ɲuman na.
5 K’a jira k’i bɛ hami mɔgɔw la minnu tɛ Krecɛn jɛkulu la, o b’a jira k’i b’i sigiɲɔgɔnw kanu. O kɔ bɛ se ka kɛ mun ye? O bɛ se ka kɛ ko ‘u na aw ka wale ɲumanbaw ye u ɲɛ na,’ wa, u dɔw bɛna ‘Ala tanu.’— 1 Piɛ. 2:12.