Ni caman bɛ farati la!
1 Bibulu b’a jira k’a jɛya ko Jehowa sago ye ko ‘mɔgɔ sugu bɛɛ ka kisi.’ Nka, min fana ye tiɲɛ ye, o ye ko mɔgɔ miliyari caman ka siniɲɛsigi bɛ bɔ olu yɛrɛ miiricogo la ka ɲɛsin Jehowa Ala, ani a ka Masaya ma, Yesu Krista sababu fɛ. Miiricogo bɛnnen bɛ se ka sinsin dɔrɔn “tiɲɛ dɔnniya jɔnjɔn” kan. (1 Tim. 2:3, 4, NW) K’an to lasɔmini na ko dugukolo bɛna saniya sɔɔni, ko kojugu bɛɛ bɛna bɔ a kan walasa ka sira to Ala ka diɲɛ tilennen kura ye, ci dira an ma fana ka kisili baara nafama kɛ.—Mat. 24:14; 28:19, 20; Rom. 10:13-15.
2 Mun na kɔrɔtɔko don? Yesu ye lasɔmini kɛ ko ‘o bɔɲɔgɔnko tɔɔrɔ ma kɛ kabini diɲɛ da tuma na fo ka na se sisan ma, wa, k’o bɔɲɔgɔnko tɛna kɛ tun abada.’ (Mat. 24:21) O tɔɔrɔ bɛna se a dan na Harmagedɔn. (Jir. 16:16) Halakili de bɛ mɔgɔ yirika ɲɛ n’u banna kibaru duman ma. N’an balimaw, an sigiɲɔgɔnw, an baarakɛɲɔgɔnw, an kalandenɲɔgɔnw ani an dɔnbagaw ma dannaya kɛ, u bɛɛ sen bɛ o mɔgɔ yirika la. Nka, an hami ye ka ‘mɔgɔ sugu bɛɛ’ lasɔrɔ. O cogo la, an bɛna Ala ladege, ale min y’a ka kanuya jira hadamadenw bɛɛ la tuma min na a y’a denkɛ Yesu Krista di walasa ka kɛ an bɛɛ kunmabɔsara ye. (Yuh 3:16) An ka kan k’an cɛsiri ni timinandiya ye walasa ka mɔgɔ bɛɛ wele u ka boli ka taa lakanani yɔrɔ la min bɛ sɔrɔ Ala sababu fɛ. N’an b’an ka wajuli baara kɛ cogo dafalen na, an b’an yɛrɛw tanga joli hakɛ ma.—Eze. 33:1-7; 1 Kɔr. 9:16.
3 An kuntilenna ye mun ye? Sinsin kɛlen bɛ wajuli baara nafa kan Ala ka Kuma yɔrɔ bɛɛ la. Iko Pol y’a jira cogo min na, ‘Krista ka kanuya b’an wajibiya’ walasa an k’an ka diɲɛnatigɛ kɛ ka kɛɲɛ ni Ala ka siraw ye. (2 Kɔr. 5:14) Ka fara o kan, wajibi min b’an kan ka wajuli kɛ, La Tour de Garde bɛ sinsin o kan tuma caman na. An ka Masaya Cidenyabaara bɛ to ka bilasirali di an ma tuma bɛɛ wajulibaara kɛcogo kan. Maakɔrɔw bɛ baara labɛn, ka dusu don an kɔnɔ walasa an k’an sen don o la. An weleweledala ɲɔgɔnw fana b’a ɲini an fɛ ka cidenyabaara kɛ u fɛ. An bɛ fɛn caman mɛn nin fɛnw kan: jiracogo labɛnni, sɔn-ni-sɔn gafeninw ani gafenin wɛrɛw jirali, segin-ka-bɔnyew kɛli, Bibulu kalan ɲɛminɛni, ani seereya kɛli ko kelen-kelen bɛɛ la. O fɛnw bɛɛ b’an dɛmɛ k’an kuntilenna timɛ, n’o ye ka niw kisi.—1 Kɔr. 9:22, 23; Efe. 1:13