Sɔn-ni-sɔn gafeninw jira, olu minnu bɛ “tiɲɛ seereya”
1. La Tour de Garde ni Réveillez-vous ! jɔyɔrɔ ye jumɛn ye?
1 La Tour de Garde annonce le Royaume de Jéhovah ani sɛbɛn min bɛ taa ɲɔgɔn fɛ, n’o ye Réveillez-vous ! ye, o sɛbɛn fila tolen bɛ jɔyɔrɔ fɔlɔ la Masaya-waajuli ni kalanden-kɛli baara la. (Mat. 24:14; 28:19, 20) O sɛbɛnw fila minnu bɛ bɔ waati bɛnnen na, an bɛ nisɔndiya sɔrɔ u jirali la tuma bɛɛ, n’an b’an sen don Masaya baara ɲɛw dɔ la kelen na.
2. Yɛlɛma jumɛnw donna La Tour de Garde ni Réveillez-vous ! la, ani kun jumɛn na?
2 Sanw kɔnɔna na, an y’a ye ko yɛlɛmaw donna o sɛbɛnw bonya ani u kɔnɔkow la, u jɛnsɛncogo fana la. O yɛlɛmaw kun tun ye u ka diya mɔgɔw ye, wa, u ka nɔ bɔ kosɛbɛ walisa Masaya cikan min bɛ u kɔnɔ, o ka don mɔgɔ suguw bɛɛ la, ‘mɔgɔw ka se ka kisi, ka tiɲɛ dɔn.’—1 Tim. 2:4.
3. An bɛna se ka baara kɛ ni sɔn-ni-sɔn gafeninw ye cidenyabaara la cogo di?
3 Kabini san 2006 Zanwuyekalo la, Réveillez-vous ! nimɔrɔ kelen de bɛ bɔ kalo o kalo. Min ye ka baara kɛ ni hakilila dilen caman ye a jiracogo kan, an kɛra sisan o nimɔrɔ jirabaga ŋanaw ye. An bɛna baara kɛ o cogo kelen na fana ni La Tour de Garde Annonce le Royaume de Jéhovah ye walisa a nimɔrɔ fila minnu bɛ bɔ kalo o kalo, an ka a nimɔrɔ kelen dɔrɔn jira mɔgɔw la cidenyabaara la. La Tour de Garde ani Réveillez-vous ! jiracogo misaliw bɛna ye An ka Masaya Cidenyabaara ɲɛ laban na. O jiracogow bɛna sinsin tuma caman na barokunw dɔ la kelen kan min bɛ o gafenin ɲɛ fɔlɔ la. Nka, waati ni waati, o jiracogow bɛna sinsin barokun wɛrɛw kan minnu ka di mɔgɔ caman ye. An bɛ se ka baara kɛ ni o hakilila dilenw ye cogo la min bɛ nɔ bɔ kosɛbɛ, ni an yɛrɛ bɛ barokun jirata kɔnɔkuma dɔn koɲuman, ani ni an bɛ o barokun jira an yɛrɛ ka kuma fɔcogo la walisa ka o bɛn an ka wajulikɛyɔrɔ ma.
4. Munna nafa bɛ se ka kɛ a la ka baara kɛ ni hakilila wɛrɛw ye, ka fara hakililaw kan minnu dilen bɛ An ka Masaya Cidenyabaara kɔnɔ?
4 Hali ni An ka Masaya Cidenyabaara bɛ hakilila fila di sɔn-ni-sɔn gafenin kelen-kelen bɛɛ jiracogo kan, n’a ka di i ye, i bɛ se ka baara kɛ ni hakilila wɛrɛ ye min ni hakilila dilenw tɛ kelen ye fewu. O kun dɔ la kelen ye ko barokun wɛrɛ bɛ se ka diya kosɛbɛ mɔgɔw ye i ka wajulikɛyɔrɔ la. Walima, a bɛ se ka kɛ ko i hakili la, n’i ye baara kɛ ni barokun ye min nafa ka bon kosɛbɛ e yɛrɛ bolo, i bɛ se k’o jira cogo la min bɛna nɔ bɔ kosɛbɛ.
5. Sani i ka sɔn-ni-sɔn gafenin barokun jirata labɛn, i ka kan ka mun kɛ?
5 I bɛ se ka i ka gafenin jiracogo labɛn cogo min na: A fɛn fɔlɔ ye ko i bɛ barokun min sugandi k’a jira, i ka kan k’o kɔnɔko bɛɛ dɔn koɲuman. I tɛna se tuma bɛɛ ka gafenin barokun kelen-kelen bɛɛ kɔnɔko dɔn sani k’a baara daminɛ ni u ye foro cidenyabaara la. Nka, i ye barokun minnu sugandi k’a jira, n’i bɛ ka kuma olu kan tuma min na, i ka kan k’o kɛ ni nisɔndiya ye ani ni kɔnɔnajɛya ye. I bɛ se ka baara kɛ o cogo la ni barokunw ye, n’a y’a sɔrɔ dɔrɔn i bɛ u kɔnɔko dɔn koɲuman.
6. An yɛrɛ bɛ se k’an ka gafenin jiracogow labɛn cogo jumɛn na?
6 O kɔfɛ, n’i bɛ ka i ka kuma fɔlɔw labɛn, i ka kɛ mɔgɔ ye min bɛ sɔn ka a ka kuma fɔlɔw yɛlɛma-yɛlɛma. Ɲininkali min bɛ se ka mɔgɔw bila ka nafa don i ka kumaw na, ni o ɲininkali ni i ka barokun bɛ ɲɔgɔn minɛ, i bɛ se ka baara kɛ ni o ye walisa k’i ka baro daminɛ. Se min bɛ Ala ka Kuma ye ka don mɔgɔ dusukun na, i jigi da o se kan tuma bɛɛ. (Heb. 4:12) I ka Bibulu tɛmɛsira bɛnnen dɔ ta min ni i ka barokun jirata bɛ ɲɔgɔn minɛ. A ka fisa a ka kɛ tɛmɛsira ye min kofɔra walima min sɛbɛnnen bɛ i ka barokun jirata kɔnɔ. A lajɛ kun min na o tɛmɛsira kofɔra i ka barokun kɔnɔ.
7. An bɛ se k’an ka sɛbɛn jiracogo ɲɛ ka taa a fɛ cogo jumɛn na?
7 Ko bɛɛ la: Walisa barokun jiracogo dɔ ka nɔ bɔ tiɲɛ na, i ka kan ka baara kɛ ni o ye. I fara jɛkulu kan Sibiridonw na, ka seereya kɛ ni sɔn-ni-sɔn gafeninw ye. Mɔgɔ minnu sɔnna sɛbɛn wɛrɛw la ka tɛmɛ, sɔn-ni-sɔn gafeninw jira olu la. U jira tuma bɛɛ i ka Bibulukalandenw na, ani n’i seginna ka na bɔ mɔgɔ dɔ ye, i bɛ mɔgɔ wɛrɛ minnu sɔrɔ yen, i bɛ se k’a jira olu fana na. Laala i bɛ se ka sɔn-ni-sɔn gafeninw di mɔgɔw ma, i bɛ kuma minnu fɛ n’i taara sanni na, n’i bɛ ka taa taama na, walima n’i bɛ ka dɔgɔtɔrɔ makɔnɔ dɔgɔtɔrɔso la. I bɛ baara kɛ ni gafenin jiracogo minnu ye, i ka olu ɲɛ ka taa a fɛ kalo kɔnɔna bɛɛ la.
8. La Tour de Garde ni Réveillez-vous ! ɲɔgɔn tɛ yen, sira jumɛn fɛ?
8 La Tour de Garde ni Réveillez-vous ! ɲɔgɔn tɛ yen. U bɛ Jehowa tanu bawo ale de ye dunuya bɛɛ Masaba ye. (Kɛw. 4:24) U bɛ mɔgɔw dusu saalo ni Ala ka Masaya kibaru duman ye, ka dusu don u kɔnɔ, ka dannaya da Yesu Krisita kan. (Mat. 24:14; Kɛw. 10:43) Ka fara o kan, diɲɛ kow bɛ ka Bibulu kirayakuma tiimɛ cogo min na, u bɛ to o kɔlɔsili la. (Mat. 25:13) Mɔgɔ minnu bɛ i ka wajulikɛyɔrɔ la, olu dɛmɛ u ka nafa sɔrɔ o sɛbɛnw la, i kɛlen k’i labɛn ka u jira n’a bɛnnen don tuma o tuma.
9. I bɛ se ka mun kɛ walisa ka sira dayɛlɛ segin-ka-bɔnye dɔ kama?
9 N’i sera ka sɔn-ni-sɔn gafenin di mɔgɔ dɔ ma, walima n’i ye baro duman kɛ mɔgɔ dɔ fɛ Ala ko kan, i ka ɲininkali dɔ labɛn, walima i ka fɛn ɲuman dɔ sɔrɔ k’a fɔ a ye min bɛ se ka sira dayɛlɛ walisa ka segin ka na bɔ a ye ani ka baro wɛrɛ kɛ a fɛ Ala ko kan. N’an timinan ka di tiɲɛ ɲɛfɔli la i ko n’an bɛ ka suman si dan, an bɛ se ka da a la ko mɔgɔ minnu b’a fɛ ka Jehowa dɔn tiɲɛ na, ka baara kɛ A ye, Jehowa bɛna olu dusukun dayɛlɛ.—1 Kɔr. 3:6.