Jehowa ka duba b’an fɛntigiya
1 Tuma caman na mɔgɔ ka dondala bɛ suma n’a ka sarawari hakɛ ye. O de kosɔn, mɔgɔ caman bɛ fɛntigiw lajɛ i n’a fɔ wasabagatɔ minnu bɛ hɛrɛ sugu bɛɛ la. Nka, mɔgɔ minnu bɛ miiri ko hɛrɛ bɛ se ka san wari la, u bɛ fili la kosɛbɛ. (Waj. 5:11) Nisɔndiya mɛnta tɛ mɔgɔw ye ‘minnu bɛ ka sama nafolotigiya nɔfɛ.’ (1 Tim. 6:9, LK) Nka, Jehowa ka baarakɛlaw bɛ hɛrɛ lakika la. Olu de ye fɛntigiw ye ka tɛmɛ diɲɛ mɔgɔw bɛɛ kan. (Nta. 10:22; Jir. 2:9) Cogo di?
2 Fɛn minnu b’an ka nafolotigiya jira: Kow faranfasili hakili b’an na alako ta fan fɛ. Ala ka Kuma, n’o ye Bibulu ye, o fana faamuya b’an na. A ka dugukolo kan jɛkuluba sababu fɛ, Jehowa bɛ to k’an kalan tuma bɛɛ ale yɛrɛ an’a denkɛ ko la. A b’o kɛ an ka nafa mɛnta de kama. Faamuyali jɔnjɔn b’a to an bɛ se k’an gɛrɛ Jehowa la, ka teriyasira taama a fɛ. (Yak. 4:8) Ka ɲuman faranfasi ka bɔ juguman na, ani ka tugu Ala ka sariyaw la, o b’an tanga banaw ni farati kow ma. An dalen b’a la ko Jehowa bɛna a jan to an na, wa, k’o bɛna laban wasa ani hakilisigi la, Ala sira la.—Mat. 6:33.
3 An bɛ bɛn ni kelenya dɔn an ka balimaya kɔnɔna na bawo an bɛ hakili senu den baara an na. Ikomi kanuyaba bɛ k’an siri ɲɔgɔn na, an man kan ka miiri abada ko Ala, walima an balimakɛw bɛna an bila kasaara, walima bɔnɛ waati la.—Gal. 6:10.
4 Kuntilenna sɛbɛ b’an ka ɲɛnamaya la. Kibaru duman wajuli baara min bɛ ka kɛ diɲɛ yɔrɔ bɛɛ la, an b’a jate bonyaba ye ka se k’an sen don o la. Ikomi an bɛ mɔgɔ wɛrɛw dɛmɛ u ka se ka teriyasira dɔn u ni Ala cɛ, ka baara kɛ an fɛ kelenya kɔnɔ, bato senuman na, o bɛ na ni nisɔndiya mɛnta ye. An ka cidenyabaara nafa ka bon fo a tɛ se ka fɔ. A bɛ bonya da Jehowa kan. A b’an wasa bawo an bɛ se k’an ta kɛ Ala tɔgɔ saniyali la. Ikomi an b’a dɔn ko an ka sini jigiya bɛna timɛ sɔɔni, an bɛ miiricogo ɲuman to an na.
5 An ka waleɲumandɔn jira: An ka waleɲumandɔn jira tuma bɛɛ Jehowa ka dubaw ko la. Olu de sababu fɛ, an ye fɛntigiw ye ka tɛmɛ dugukolo kan mɔgɔw bɛɛ kan. (Nta. 22:4) N’an bɛ waati ta don o don ka taasi fɛnw na minnu b’an bolo, o b’an bila ka barika da Jehowa ye a ka kanuya ɲuman na, ani ka to ka ale kelenpe dɔrɔn bato.