An ka wajuli kɛ ka t’a fɛ
1 Ala sago don “mɔgɔ bɛɛ ka kisi, ka se ka tiɲɛ dɔn.” (1 Tim. 2:4) O de y’a to a ye ci di an ma ka kibaru duman wajuli kɛ. (Mat. 24:14) An ka kan ka wajuli kɛ ka t’a fɛ kun min na, n’an bɛ nafa don o la, ko si tɛna an bali k’o kɛ, a kɛra dusutiɲɛko ye, walima hamina ko o ko ye.
2 Mun na an k’an timinandiya ka t’a fɛ? An bɛ min fɔ mɔgɔw ye, u bɛ ɲinɛ o kɔ, walima u t’o ta sɛbɛ la, k’a sababu kɛ hamiw ni haju caman ye minnu bɛ diɲɛ kɔnɔ. O kosɔn, kisili cikan min bɛ bɔ Ala yɔrɔ, an ka kan k’u hakili jigin o la tuma bɛɛ. (Mat. 24:38, 39) Ka fara o kan, ko minnu bɛ mɔgɔ sɔrɔ a ka diɲɛnatigɛ kɔnɔ, olu bɛ yɛlɛma tuma bɛɛ la. Hali diɲɛ kow bɛ se ka yɛlɛma kosɛbɛ su ni dugujɛ cɛ. (1 Kɔr. 7:31) Sini, dɔgɔkun nata, walima kalo nata la, an bɛ kibaru duman lase mɔgɔ minnu ma, a bɛ se ka kɛ k’u bɛ kunkow, walima jɔrɔnanko kuraw sɔrɔ minnu b’a to u b’u mago sɛbɛ don o kibaru duman na. Yali waleɲumandɔn t’i la ko Seere dɔ y’i timinandiya ka to ka tiɲɛ kuma fɔ i ye wa?
3 Walasa ka Ala ka makari ladege: Jehowa bɛ muɲu k’a to waati ka tɛmɛ sanni ka kiri bin mɔgɔ juguw kan. An sababu fɛ, a b’a ɲini dusukun tilennen tigiw fɛ u ka na ale ma ka kisi sɔrɔ. (2 Piɛ. 3:9) Ala ye cikan min fɔ a ka makari kɔnɔ, n’an tɛ mɔgɔw waju o la tuma bɛɛ, n’an tɛ u lasɔmi ko Ala ka kiri bɛna bin mɔgɔw bɛɛ kan, mɔgɔ minnu t’u ka sira jugu bila, joli hakɛ bɛna kɛ an kan. (Eze. 33:1-11) Hali ni mɔgɔw tɛ sɔn tuma bɛɛ an ka wajuli ma, an man kan abada ka dɔ bɔ an ka cɛsiri la walasa an ka se ka mɔgɔ kɔnɔnajɛlen dɛmɛ u ka nafaba don Ala ka makari la.— Kɛw. 20:26, 27; Rom. 12:11.
4 Walasa k’an ka kanuya jira: Yesu sababu fɛ, Jehowa ye ci fɔ ko kibaru duman wajuli ka kan ka kɛ dugukolo yɔrɔ bɛɛ la. (Mat. 28:19, 20) An bɛ cogo sɔrɔ k’a jira k’an bɛ Ala kanu, ani k’a jira k’an nɔrɔlen b’a la, n’an b’an timinandiya ka ko tilennen kɛ tuma bɛɛ hali ni mɔgɔw b’u ban k’an lamɛn.—1 Yuh. 5:3.
5 An jɔlen ka to a kan ka wajuli kɛ ka t’a fɛ. An k’o kɛ ni cɛsiri ye k’a sɔrɔ Jehowa ka “kisili don” bɛ sen na hali bi.—2 Kɔr. 6:2.