“U ka kɔrɔbɔ” cogo di?
1 Mɔgɔ minnu bɛ Jehowa ka jɛkuluba la, olu bɛ ka caya. O de kosɔn, balimakɛ minnu bɛ se ka kɛ cidenyabaara magannaw ye, jɛkulu mago b’olu la ka t’a fɛ. Balimakɛ minnu ma kɛ cidenyabaara magannaw ye fɔlɔ, kamalenninw sen b’o la, olu fanba ŋaniya ye ka baara kɛ jɛkulu kɔnɔ. Ni baara dira u ma ka kɛ, u bɛ se ka wasa sɔrɔ katuguni u ye ko ɲuman kɛ. Ka t’a fɛ u ka ɲɛtaa la, o bɛ bɔ ‘u kɔrɔbɔli’ la. (1 Tim. 3:10) O bɛ se ka kɛ cogo di?
2 Maakɔrɔw jɔyɔrɔ: Ko minnu wajibiyalen don walasa ka kɛ cidenyabaara magannaw ye, olu bɛ sɔrɔ 1 Timote 3:8-13 la. Maakɔrɔw kɛtɔ k’a ye ni balimakɛ bɛ o kow dafa, u bɛna balimakɛ seko fana kɔrɔbɔ walasa k’a ye n’a bɛ se ka jɔ doni dɔ kɔrɔ jɛkulu kɔnɔ. A dɔ rɔ, u bɛna baara nafama kalifa a ma ka dɛmɛ don sɔn-ni-sɔn gafeninw ani sɛbɛnw jɛnsɛnni yɔrɔw la, walima kan labonyalan minɛni na, walima Masaya So ladonni na, walima fɛn wɛrɛw kɛli la. Waleɲumandɔn b’a la cogo min na ka ɲɛsin a ka baara ma, ani a b’o kɛ cogo min na, maakɔrɔw bɛna olu kɔlɔsi. Maakɔrɔw bɛna a jogo lajɛ walasa k’a ye n’a ye dannamɔgɔ ye; n’a bɛ baara kɛ ni timinandiya ye, k’a matarafa; n’a bɛ kuncɛdɔgɔya jira; n’a bɛ baara kɛ ni diyanye ye; n’a bɛ se baarakɛyɔrɔ ma waati jaati la; n’a bɛ se ka baara kɛ mɔgɔ wɛrɛw fɛ hɛrɛ la. (Fil. 2:20) Yali a ye misali ɲuman ye a ka fini donta ani a kun dilancogo ko la wa? Ka jɔyɔrɔ ta sɛbɛ la, yali a b’o kɔrɔ dɔn wa? U b’a fɛ ‘k’a ka kɛwalew ye a taama cogo ɲuman fɛ ni sabali ni hakilitigiya ye.’ (Yak. 3:13) Yali a b’i cɛsiri ka dɛmɛ kɛ jɛkulu kɔnɔ wa? Yali a b’i sen don cidenyabaara la ni cɛsiri ye walasa ka Yesu ka ci fɔlen dafa n’o ye ‘ka mɔgɔw kɛ kalandenw ye’ wa?—Mat. 28:19; san 1990 Sɛtanburukalo tile fɔlɔ lajɛ, La Tour de Garde ɲɛw 18-28.
3 Hali ni Bibulu tɛ si dɔgɔyalenba latigɛ walasa mɔgɔ ka lasigi iko cidenyabaara maganna, a b’a fɔ ko balimakɛ ninnu ye ‘cɛw ye minnu bɛ baara kɛ’ jɛkulu kɔnɔ. Ikomi Bibulu b’a fɔ ko muso ani denw bɛ se ka kɛ u fɛ, an tɛna sigi n’a ye k’u si bɛ se ka kɛ san 13 walima san 16 ye dɛ. (1 Tim. 3:12, 13) O cɛw kana kɛ mɔgɔw ye ‘kamalenya negew’ bɛ se ka se sɔrɔ minnu kan. Nka, u ka kan ka taama cogo sɛbɛ la, ka tɔgɔ ɲuman ani dusukun jɛlen sɔrɔ Ala ani mɔgɔw ɲɛna.—2 Tim. 2:22.
4 Hali ni nafa bɛ balimakɛ dɔ seko la, a miiricogo n’a dusukunnata minnu b’a bila ka baara kɛ, olu de nafa ka bon kosɛbɛ. Yali balimakɛ dɔ b’a kanu ni majiginnenya ye ka Jehowa tanu, ka baara kɛ a balimaw ye wa? N’a bɛ ten, ani n’a b’i cɛsiri walasa ka ɲɛtaa sɔrɔ jɛkulu kɔnɔ, Jehowa bɛna dugawu lase a ma.