“Aw ka baara tɛna kɛ fu ye”
1 Nin ye dusulamin kumaw ye dɛ! An bɛ sɛgɛn min kɛ Jehowa ka baara la, o tɛna kɛ fu ye. (1 Kɔr. 15:58) Nka, i ka miiri mɔgɔw ma minnu bɛ waati caman kɛ sɛgɛn na walasa ka dɔ fara u sekow n’u ka sɔrɔ kan. A bɛ se ka kɛ k’u bɛ kalanba kɛ san caman kɔnɔ, walima ka baara kɛ iko jɔn walasa ka taa ɲɛ sɔrɔ ta fan fɛ. Nka, k’a sababu kɛ “waatiw ni ko cunnenw” ye, a bɛ se ka kɛ k’u tun bɛ bonyaba min nɔfɛ, u tɛna se k’o sɔrɔ abada, walima u tun tɛ min fɛ sɔrɔ ta fan fɛ, u bɛ diyagoya ka sɔn o la. U ka sɛgɛn bɛ kɛ fu ye, i n’a fɔ n’u bɛ “fiɲɛ ɲinini” na. (Ekl. (Waj.) 1:14; 9:11) O la sa, nafaba b’a la an ka caman kɛ baara la, baara kelen min tɛna kɛ fu ye bawo a nafa tɛna ban.
2 Baara don min nafa ka bon tiɲɛ yɛrɛ la: Ka Ala ka masaya kibaru duman wajuli kɛ, o baara nafa de ka bon kosɛbɛ ka tɛmɛ baara tɔw bɛɛ kan dugukolo kan. Mɔgɔw ye lamɛnni kɛ wo, mɔgɔw ma lamɛnni kɛ wo, baara don min ka kan ka kɛ. An k’a fɔ iko Pol y’a fɔ cogo min na ko: “Mɔgɔ si joli hakɛ tɛ ne kan, katuguni ne ye Ala sago bɛɛ fɔ aw ye.”— Kɛw. 20:26, 27.
3 Ni mɔgɔw bɛ Masaya cikan lamɛn k’a sɔn a ma, o ye nisɔndiyako ye sa dɛ! Musomisɛn dɔ tɛnɛmuso banna. A y’a yɛrɛ ɲininka a tɛnɛmuso taara min: sankolo la wa, walima jahanama na? A ye Ala deli walasa a k’a dɛmɛ. A y’a tɔgɔ Jehowa fɔ iko a balimamuso y’a kalan a la cogo min na. A ma mɛn a ye Bibulu kalan daminɛ, ka taa Krecɛn lajɛw la. A ye hakilina kura sɔrɔ ɲɛnamaya ko kan, k’a sen bɔ a jɛɲɔgɔnw sen na. O muso ye sigarɛti minni, dɔrɔgu tali ni sonyɛni dabila. A sɔnna a ma, ko: “Jehowa kelenpe kanuya de ye ne diyagoya n ka nin sira jugu bila. Jehowa kelenpe ka makariba de sera ka ɲɛnamaya banbali jigiya di ne ma.” A ma tugu fɛn fuw nɔfɛ tuguni.
4 Hali ni mɔgɔw b’u ban k’i lamɛn, o bɛɛ n’a ta, i bɛ ka fɛn kɛ min nafa ka bon tuma bɛɛ. U b’a dɔn ko Jehowa Seerew nana bɔ u ye. I ka dafalenya, n’i ka kantigiya n’i ka kanuya bɛna sinsin kosɛbɛ. O la sa, an bɛ ka sɛgɛn min kɛ Matigi ka baara la, yali o ye fu ye wa? Abada.