An mago bɛ aw ka dɛmɛ na
1 “Aw ye fɛn minnu bɛɛ kɛ an ye, aw ni ce olu bɛɛ la. Aw ka baaraw ye an nafa kosɛbɛ.” Nin kuma b’a jira koɲuman waleɲumandɔn min bɛ an na ka ɲɛsin an ka maakɔrɔw ni an ka cidenyabaara magannaw ma. Ikomi Ala ka jɛkuluba bɛ ka bonya ka taga a fɛ, an mago fana bɛ ka taga a fɛ cɛ mɔlenw na alako ta fan fɛ walisa u ka baara kɛ jɛkuluw kɔnɔ minnu hakɛ bɛ taa 100 000 ɲɔgɔn na diɲɛ mumɛ bɛɛ kɔnɔ. Ni i ye balimakɛ ye min ye batɛmu ta, an mago bɛ i ka dɛmɛ na.
2 ‘A ɲini’: I bɛ se k’a ɲini jɔyɔrɔ wɛrɛw ka di i ma alako ta fan fɛ cogo di? (1 Tim. 3:1) A tɛ taa fɛn min yɛrɛ kɔ fewu, o ye ka kɛ ɲɛjirabaga ɲuman ye i ka ɲɛnamaya kɛcogo bɛɛ la. (1 Tim. 4:12; Ti. 2:6-8; 1 Pi. 5:3) I ka i sen don waajulibaara la cogo ɲɛnama na, ka mɔgɔ wɛrɛw dɛmɛ olu fana ka u sen don waajulibaara la o cogo kelen na. (2 Tim. 4:5) I k’i jan to tiɲɛ yɛrɛ la i balimakɛw ni i balimamusow ka hɛrɛ sɔrɔli la. (Rom. 12:13) I ka kɛ Ala ka Kuma kalanden timinandi ye, i ka ‘se mɔgɔw kalancogo la.’ (Ti. 1:9; 1 Tim. 4:13) Maakɔrɔw bɛ baara minnu kalifa i ma ka kɛ, i timinandiya k’olu kɛ ka ɲɛ. (1 Tim. 3:10) Ni i ye dutigi ye, ‘i k’i ka du mara koɲuman.’—1 Tim. 3:4, 5, 12.
3 Maakɔrɔ jɔyɔrɔ walima cidenyabaara maganna jɔyɔrɔ tɛ taa baara gɛlɛn kɔ, wa a bɛ yɛrɛdi-hakili de fana waajibiya. (1 Tim. 5:17) O la sa, ni i bɛ ka o jɔyɔrɔ ɲini tuma min na, i ka kan k’i jija min na, o ye ka baara kɛ tɔw ye ni majigilenya ye. (Mat. 20:25-28; Yuh. 13:3-5, 12-17) Hakilila ɲuman min tun bɛ Timote la, hakilijakabɔ o kan, i k’a ɲini ka a ladege. (Fil. 2:20-22 ) Timote taamacogo ɲuman y’a to a ka jɔyɔrɔ wɛrɛw sɔrɔ alako ta fan fɛ cogo min na, e fana taamacogo ɲuman k’a to jɔyɔrɔ wɛrɛw ka se ka di i ma. (Kɛw. 16:1, 2) Jogo ɲuman minnu bɛnnen bɛ alako ta fan fɛ, ni i bɛ olu baara i la walisa ka jɔyɔrɔ wɛrɛw sɔrɔ, ani i bɛ laadilikan fɛn o fɛn sɔrɔ walisa i ka se ka taa ɲɛ, ni i bɛ tugu olu bɛɛ kɔ fana, ‘mɔgɔw bɛɛ bɛ se ka a ye ko i bɛ ka taa ɲɛ.’—1 Tim. 4:15.
4 Bangebagaw, aw y’aw denw dege mɔgɔ-dɛmɛ na: Denmisɛnninw bɛ se ka mɔgɔ-dɛmɛ degeli daminɛ kabini u fitinin. Aw y’u dege u k’u tulomajɔ ni u bɛ lajɛw la, u ka waajuli kɛ, u ka kɛ ɲɛjirabaga ɲuman ye u taamacogo la Masaya So kɔnɔ ani lakɔli la. Aw ye u dege u ka mɔgɔ wɛrɛw dɛmɛ ni nisɔndiya ye, u ka kow kɛ i na a fɔ ka Masaya so saniya, ka mɔgɔkɔrɔbaw dɛmɛ, ani o ɲɔgɔnna ko wɛrɛw. Nisɔndiya min bɛ dili la, aw ka a to u ka se ka o dɔn. (Kɛw. 20:35) O degeli sugu bɛ se k’u dɛmɛ u ka kɛ sini tutigɛbagaw ye, sini cidenyabaara magannaw ani sini maakɔrɔw ye.